ភ្នំពេញ ៖ អតិផរណាថ្លៃទំនិញប្រើប្រាស់រួមក្នុងខែមករា ឆ្នាំ២០២៣ នេះ បានកើនឡើងបន្តិចបន្តួច ធៀបនឹងខែមុន ខណៈអត្រាប្តូរប្រាក់រៀលបានឡើងថ្លៃធៀបនឹងប្រាក់ដុល្លារអាមេរិក។ ទោះជាយ៉ាងនេះក្តី ជារួម អតិផរណានៅកម្ពុជាត្រូវបានព្យាករថានឹងមានកម្រិតទាបអាចគ្រប់គ្រងបាន ដោយសារនិន្នាការថមថយនៃថ្លៃម្ហូបអាហារនិងថ្លៃប្រេងឥន្ធនៈសកល។

យោងតាមរបាយការណ៍ស្តីពី ស្ថិតិសេដ្ឋកិច្ច និងរូបិយវត្ថុ ខែមករា ឆ្នាំ២០២៣ របស់ធនការជាតិនៃកម្ពុជា បានបង្ហាញថា អតិផរណាថ្លៃទំនិញប្រើប្រាស់ (ខែលើខែ) នៅភ្នំពេញ បានកើនឡើងដល់ ០,៦៦% ក្នុងខែមករា ឆ្នាំ២០២៣ បន្ទាប់បានថយចុះដល់កម្រិតអវិជ្ជមាន -០,៤១% ក្នុងខែធ្នូ ឆ្នាំ២០២២ ក្នុងនោះសន្ទស្សន៍ទំនិញទាំងដប់ពីរក្រុមបានកើនឡើង។

ផ្អែកលើបម្រែប្រួលឆ្នាំលើឆ្នាំនៃសន្ទស្សន៍ថ្លៃទំនិញប្រើប្រាស់រួមបានកើនឡើងបន្តិចដល់ ៣% ក្នុងខែមករា ឆ្នាំ២០២៣ ពីអត្រា ២,៩% ក្នុងខែធ្នូ ឆ្នាំ២០២២ ដែលឆ្លុះបញ្ចាំងជាចម្បងពីការកើនឡើងនៃថ្លៃប្រេងឥន្ធនៈ។

ទាក់ទងនឹងអត្រាប្តូរប្រាក់វិញ ក្នុងខែមករា ឆ្នាំ២០២៣ នេះ អត្រាទិញទីផ្សារចុងគ្រាប្រាក់រៀល ធៀបនឹងប្រាក់ដុល្លារអាមេរិក មានអត្រា ៤​ ១០២ រៀល ក្នុងមួយដុល្លារអាមេរិក ដោយបានឡើងថ្លៃ ០,២៧% ធៀបនឹងខែធ្នូ ឆ្នាំ២០២៣។

ការវាយតម្លៃបឋមរបស់ មូលនិធិរូបិយវត្ថុអន្តរជាតិ (IMF) កាលថ្មីៗនេះ បានបង្ហាញថា សេដ្ឋកិច្ចកម្ពុជានៅឆ្នាំ២០២៣ នឹងបន្តមានភាពរឹងមាំ និងបន្តមានកំណើនខ្ពស់ជាងការប៉ាន់ស្មានដែលបានធ្វើឡើងនៅក្នុងរបាយការណ៍ពិគ្រោះយោបល់មាត្រា IV កាលពីចុងឆ្នាំ២០២២ ដោយសារការងើបឡើងវិញលឿនជាងការរំពឹងទុកនៃវិស័យទេសចរណ៍ ទោះជាការនាំចេញផលិតផលកាត់ដេរប្រឈមនឹងភាពមិនច្បាស់លាស់ ដោយសារភាពទន់ខ្សោយនៃតម្រូវការខាងក្រៅក្តី។

របាយការណ៍បានបញ្ជាក់ថា អតិផរណាត្រូវបានព្យាករថានឹងមានកម្រិតទាបអាចគ្រប់គ្រងបាន ដោយសារនិន្នាការថមថយនៃថ្លៃម្ហូបអាហារនិងថ្លៃប្រេងឥន្ធនៈសកល។ ចំពោះវិស័យក្រៅប្រទេស ឱនភាពគណនីចរន្តរំពឹងថានឹងថយចុះ ដោយសារការថយចុះគួរឱ្យកត់សម្គាល់នៃកំណើនការនាំចូល (រាប់ទាំងការនាំចូលមាស) ខណៈដែលលំហូរមូលធនបន្តមានភាពរឹងមាំ ដែលគាំទ្រដោយលំហូរចូលនៃវិនិយោគក្រៅប្រទេសដែលនឹងជួយផាត់ទាត់ឱនភាពគណនីចរន្ត។ ទន្ទឹមនេះ ទុនបម្រុងអន្តរជាតិបន្តមានកម្រិតខ្ពស់ ស្របពេលដែលអត្រាប្ដូរប្រាក់បន្តមានស្ថិរភាព។ វិស័យធនាគារនិងហិរញ្ញវត្ថុបន្តមានភាពធន់និងរឹងមាំ ជាមួយនឹងការថយចុះឥណទានរៀបចំឡើងវិញ និងកម្រិតទាបនៃឥណទានមិនដំណើរការ ដោយសារការបន្តងើបឡើងនិងការវិលទៅរកប្រក្រតីភាពនៃសកម្មភាពសេដ្ឋកិច្ច ស្របពេលដែលការធ្វើប្រក្រតីកម្មឡើងវិញនៃវិធានការគាំទ្រដែលបានដាក់ចេញក្នុងអំឡុងពេលវិបត្តិជំងឺកូវីដ-១៩ ត្រូវបានអនុវត្តជាបណ្តើរៗ ដើម្បីបន្តពង្រឹងស្ថិរភាពហិរញ្ញវត្ថុ៕