ផ្សាររាត្រី ត្រូវបានគេស្គាល់តាំងពីយូរមកហើយថាជាទីកន្លែងដែលអាជីវករអាចយកទំនិញ និងផលិតផលមកតាំងលក់នៅពេលយប់ ហើយក៏ជាកន្លែងសម្រាប់ភ្ញៀវអាចដើរទិញទំនិញ ចំណីអាហារចំរុះទទួលទានយ៉ាងឆ្ងាញ់ពិសារ ជាមួយនឹងការដើរលេងកម្សាន្តនៅថ្ងៃចុងសប្ដាហ៍។ ជាក់ស្ដែងថ្មីៗនេះ មានផ្សាររាត្រីចំនួនពីរទីតាំងដែលកំពុងមមាញឹក និងប្រជាប្រិយភាពយ៉ាងខ្លាំង ទាក់ទាញចិត្តភ្ញៀវទេសចរជាតិ និងអន្តរជាតិ ជាពិសេសស្រទាប់យុវវ័យឱ្យទៅលេងកម្សាន្តយ៉ាងរីករាយ ។

Riverwalk Night Market មានទីតាំងនៅតំបន់ ដឹអេលីហ្សេ ប្របតាមច្រាំងទន្លេ ទឹកដីកោះពេជ្រ និង​ភូមិអាហារ មានទីតាំងនៅតំបន់ Prince Times Square ជាផ្សាររាត្រីកំពុងពេញនិយមក្នុងរាជធានីភ្នំពេញ ហើយកំពុងបើកដំណើរការសម្រាប់ឱ្យបងប្អូនទៅលេង ទិញទំនិញ គ្រឿងសម្ភារប្រើប្រាស់ ក៏ដូចជាចំណីអាហារ បង្អែម ភេសជ្ជៈថ្មីៗ ប្លែកៗ ជាច្រើនមុខ នៅរៀងរាល់ថ្ងៃ សុក្រ សៅរ៍ និងអាទិត្យ ចាប់ពីម៉ោង ៤ល្ងាច រហូតដល់ម៉ោង ១០យប់។

សម្រាប់អ្នកដែលចូលចិត្តញ៉ាំអាហារសម្រន់ ឬក៏អាហារបែប Street food ផ្សាររាត្រីទាំងពីរនេះជាកន្លែងដែលអ្នកមិនគួរមើលរំលងនោះទេ ដោយសារនៅទីនោះបងប្អូនអាជីវករដាក់លក់នូវម្ហូបជាច្រើនមុខ ក្នុងតម្លៃសមរម្យ រសជាតិឆ្ងាញ់ មិនថាម្ហូបបែបខ្មែរ ថៃ កូរ៉េ ឬជប៉ុននោះទេ ដែលអាចភ្លក្ស ទិញ និងមានកន្លែងសម្រាប់អង្គុយញ៉ាំភ្លាមៗតែម្ដង។

ក្រៅពីនេះ វាក៏ជាកន្លែងដែលបងប្អូនអាជីវករអាចដាក់លក់នៅតាមស្តង់ នូវផលិតផល ក៏ដូចជាទំនិញ​ គ្រឿងអលង្ការ សម្លៀកបំពាក់ សម្ភារប្រើប្រាស់ច្រើនមុខ ច្រើនប្រភេទ ដែលពួកគាត់ពុំមានកន្លែងដាក់លក់តាមផ្សារនៅពេលថ្ងៃ ឬសម្រាប់បងប្អូនសិស្សនិស្សិត ក៏ដូចជាអ្នកធ្វើការអាចឆ្លៀតជួលស្តង់ដាក់លក់ដើម្បីរកចំណូលបន្ថែមក្រៅម៉ោងសិក្សា និងក្រៅម៉ោងការងារនាពេលចុងសប្ដាហ៍ផងដែរ។

មិនត្រឹមតែប៉ុណ្ណោះ ផ្សាររាត្រីទាំងពីរនេះក៏ផ្ដល់នូវបរិយាកាសស្រស់ស្រាយ សប្បាយរីករាយ ដែលមានការរាំ Random dance មានបទចម្រៀងល្បីៗ ពិសេសក៏ផ្ដល់នូវបរិស្ថានស្អាត ដោយមានធុងសំរាមគ្រប់គ្រាន់ ងាយស្រួលក្នុងការរកកន្លែងទុកដាក់សំរាមបន្ទាប់ពីទទួលទានរួចរាល់។

ជារួមមក តាមរយៈការបើកដំណើរផ្សាររាត្រីទាំងពីរកន្លែងនេះគេសង្កេតឃើញថា វាជាទីកន្លែងសម្រាប់សម្រាកកម្សាន្តរបស់បងប្អូនអ្នករាជធានីភ្នំពេញ ជាពិសេសបណ្តាមិត្តយុវវ័យ ខណៈដែលផ្សាររាត្រីទាំង២នេះក៏ជាកន្លែងសម្រាប់អាជីវករខ្នាតតូចអាចរកកន្លែងលក់ទទួលបានចំណូលបន្ថែមទៀតនៅរាល់រាត្រីចុងសប្ដាហ៍៕