សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
តាសក់ផ្អែម គឺជាប្រភេទដំណាំសក្តានុពលដែលមានតម្លៃបន្ថែមខ្ពស់ ប៉ុន្តែទាមទារឱ្យកសិករយល់ដឹងពីបច្ចេកទេសដាំច្បាស់លាស់ ទើបអាចដាំដុះ និងទទួលបានផ្លែល្អ មានរសជាតិផ្អែមឆ្ងាញ់ ជាពិសេសទទួលបានទិន្នផលខ្ពស់ពីមួយឆ្នាំទៅមួយឆ្នាំ។
បើតាមការផ្សព្វផ្សាយរបស់ក្រសួងកសិកម្ម រុក្ខាប្រមាញ់ និងនេសាទ បានលើកយកបទពិសោធន៍ក្នុងការដាំដុះរបស់លោក ញឹក ថន ដែលជាកសិករដាំតាសក់ផ្អែមទទួលបានផលល្អ នៅស្រុកអន្លង់វែង ខេត្តឧត្ដរមានជ័យ មកបង្ហាញ ជាមួយនឹងដកស្រង់សម្ដីមកបញ្ជាក់យ៉ាងដូច្នេះថា ៖
«ខ្ញុំដាំតាសក់នេះជិត ១០ឆ្នាំហើយ តាំងពីដាំវិលជុំតាមទម្លាប់ជាមួយបងប្អូនដែលជាកសិករក្នុងតំបន់ រហូតដល់បានរៀនបច្ចេកទេសពីមន្ត្រីកសិកម្មបន្ថែម ដែលធ្វើឱ្យការដាំដុះកាន់តែល្អ ទទួលបានផលខ្ពស់ ជាក់ស្ដែងបច្ចុប្បន្ននេះ ខ្ញុំដាំលើដីត្រឹមកន្លះហិកតា អាចប្រមូលផលបាន និងលក់ទៅកាន់ទីផ្សារបានចំណូលប្រមាណ ២៥លានរៀល ក្នុងមួយរដូវ»។
លោកបន្ថែមថា ៖
«លើផ្ទៃដីកន្លះហិកតា យើងដាំបាន ៩ពាន់កូន ក្នុងនោះមានពូជតាសក់សំបកពណ៌លឿង ពណ៌ស ពូជសំបកសំណាញ់ និងសំបកសំណាញ់សាច់ពណ៌ការ៉ុតផងដែរ ដោយពូជនីមួយៗមានតម្លៃខុសៗគ្នា។ ពូជសំណាញ់សាច់ការ៉ុតលក់បានតម្លៃ ៥០០០រៀល សំបកសំណាញ់សាច់ស ៣៥០០រៀល និងពូជពណ៌លឿង ៣០០០រៀលក្នុងមួយគីឡូក្រាម»។
ពាក់ព័ន្ធនឹងការដាំដុះ កសិកររូបនេះបន្តឱ្យដឹងថា តាសក់ផ្អែមមិនចំណាយពេលយូរនោះទេ ពោលគឺដាំត្រឹមរយៈពេល ២ខែ ឬអាកាសធាតុក្ដៅល្អអាចប្រមូលផលបានត្រឹម ៥៥ថ្ងៃប៉ុណ្ណោះ ហើយក្នុងមួយឆ្នាំ អាចដាំបាន ២-៣ដង។ ដោយឡែក ផ្លែតាសក់ល្អអាចមានទម្ងន់ដលក់ ២-៣គីឡូក្រាមក្នុងមួយផ្លែ ខណៈដែលតម្លៃក៏ទទួលបានថ្លៃ ដោយមិនបារម្ភពីការខាតបង់នោះទេ ពោលឱ្យតែដាំត្រូវតាមបច្ចេកទេស គឺអាចទទួលបានផលល្អ។ យ៉ាងណាក៏ដោយ លោកបញ្ជាក់ដែរថា ការដាំតាសក់ផ្អែមក៏ត្រូវចំណាយលើជីដើម្បីបំប៉នផ្លែឱ្យបានល្អដែរ ដោយលោកផ្ទាល់បានចំណាយលើជីអស់ប្រមាណ ៩-១០លានរៀលក្នុងមួយរដូវដាំដុះ។
សម្រាប់កសិករដែលចង់ដាំដំណាំប្រភេទនេះ អាចសាកល្បងបាន ប៉ុន្តែទាមទារឱ្យកសិករដែលជាអ្នកដាំត្រូវរៀនពីបច្ចេកទេសដាំដុះជាមុនសិន។ ជាជំនួយពីក្រសួងកសិកម្ម រុក្ខាប្រមាញ់ និងនេសាទ កសិករខ្នាតតូចដែលធ្វើកសិកម្មជាលក្ខណៈគ្រួសារ អាចនឹងមានបញ្ហាខ្លះក្នុងការវិភាគសេដ្ឋកិច្ច និងព្យាករណ៍ពីតម្រូវការទីផ្សារឱ្យបានត្រឹមត្រូវនោះទេ ហេតុដូច្នេះហើយបានជាក្រសួងលើកទឹកចិត្តឱ្យបងប្អូនកសិករដែលតែងជួបបញ្ហាប្រឈមទាំងផ្នែកបច្ចេកទេស ទីផ្សារ និងដើមទុន ពិចារណាចងក្រងគ្នាជាសហគមន៍កសិកម្មទំនើប ដើម្បីឱ្យសហគមន៍ដើរតួនាទីនេះជំនួសក្នុងការស្វែងយល់ពីតម្រូវការទីផ្សារ និងងាកមកចាប់យកការធ្វើផលិតកម្មកសិកម្មតាមកិច្ចសន្យាវិញម្តង ដែលអាចផ្តល់ភាពច្បាស់លាស់ជាងមុនដល់ការធ្វើកសិកម្មរបស់ពួកគាត់៕
Account
Security
Favourite Content