សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ឆ្នាំ២០២៣ កន្លងនេះ គឺជាឆ្នាំដ៏ពិសេសមួយ ដែលផ្សារមូលបត្រកម្ពុជាទទួលបានចំនួនក្រុមហ៊ុនចុះបញ្ជីច្រើនជាងគេ ស្របពេលដែលទីផ្សារមូលបត្រនេះបានក្លាយជាច្រកមួយសម្រាប់ការធ្វើពិពិធកម្មហិរញ្ញប្បទានដល់ក្រុមហ៊ុន និងជាឱកាសវិនិយោគសម្រាប់វិនិយោគិន។
ថ្លែងនៅពិធីចុះបញ្ជីលក់សញ្ញាបណ្ណសាជីវកម្មជាផ្លូវការឆ្នាំ២០២៣ របស់ក្រុមហ៊ុន ស៊ីអាយអេ ហ្វឺស អ៊ិនធើណេសិនណល ស្គួល នៅផ្សារមូលបត្រកម្ពុជា កាលពីថ្មីៗនេះ ឯកឧត្តម ហុង សុហួរ អគ្គនាយកនៃផ្សារមូលបត្រកម្ពុជា បានមានប្រសាសន៍ថា ក្នុងឆ្នាំ២០២៣ នេះ គឺជាឆ្នាំដ៏ពិសេសមួយដែលផ្សារមូលបត្រកម្ពុជា ទទួលបានចំនួនក្រុមហ៊ុនចុះបញ្ជីច្រើនជាងគេ រួមមានក្រុមហ៊ុនចុះបញ្ជីលក់មូលបត្រកម្មសិទ្ធិចំនួន២ និងសញ្ញាបណ្ណសាជីវកម្មចំនួន៣។
យោងតាមឯកឧត្តម ហុង សុហួរ គិតត្រឹមចុងឆ្នាំ២០២៣ ផ្សារមូលបត្រកម្ពុជាមានក្រុមហ៊ុនចុះបញ្ជីចំនួន២២ ដែលរួមមានក្រុមហ៊ុនចំនួន១១ បានចុះបញ្ជីជាមូលបត្រកម្មសិទ្ធិ និងក្រុមហ៊ុន១១ ទៀតបានចុះបញ្ជីជាសញ្ញាបណ្ណសាជីវកម្ម ហើយក្រុមហ៊ុនទាំង២២នេះបានប្រមូលទុនពីផ្សារមូលបត្រសរុបប្រមាណជា ៣៥៩ លានដុល្លារអាមេរិក។
ឯកឧត្តម បានថ្លែងបន្តថា បើក្រលេកមើលពីបរិមាណជួញដូរ ភាគហ៊ុនប្រចាំថ្ងៃជាមធ្យម គិតត្រឹមខែវិច្ឆិកា ឆ្នាំ២០២៣ មានប្រមាណ ១៣ ម៉ឺនភាគហ៊ុនក្នុងមួយថ្ងៃ និងទំហំជួញដូរភាគហ៊ុនប្រចាំថ្ងៃជាមធ្យមមានប្រមាណជិត ២១ ម៉ឺនដុល្លារអាមេរិក។ រីឯចំនួនគណនីជួញដូរមានការកើនឡើងគួរឱ្យកត់សម្គាល់ពីប្រមាណ ៤៤ ០០០ គណនី ទៅ ៤៧ ០០០ គណនី។
ឯកឧត្តម ហុង សុហួរ បានលើកឡើងដូច្នេះថា ៖
“ផ្សារមូលបត្រកម្ពុជា ក៏មានមហិច្ឆតាចង់ឱ្យចំនួនគណនីជួញដូរកើនឡើងដល់ ១០ ម៉ឺនគណនីជួញដូរក្នុងឆ្នាំ ២០២៤ ខាងមុខនេះ និងសម្រេចបានទំហំជួញដូរភាគហ៊ុនប្រចាំថ្ងៃជាមធ្យម ១០០ លានដុល្លារអាមេរិកត្រឹមឆ្នាំ២០៣០។ ឯកឧត្តមប្រតិភូ ក៏បានស្នើសុំឱ្យមានការចូលរួម និងគាំទ្រពីភាគីពាក់ព័ន្ធទាំងអស់ ដើម្បីអភិវឌ្ឍទីផ្សារមួយនេះបោះជំហានទៅមុខមួយកម្រិតទៀត”។
ឯកឧត្តម ស៊ូ សុជាតិ អគ្គនាយកនៃនិយ័តករមូលបត្រកម្ពុជា បានមានប្រសាសន៍ថា ទីផ្សារមូលបត្រកំពុងតែមានការរីកចម្រើនជាមួយនឹងកំណើននៃក្រុមហ៊ុនចុះបញ្ជី និងបានឆ្លុះបញ្ចាំងឱ្យឃើញថា ទាំងក្រុមហ៊ុន និងវិនិយោគិនបាន និងកំពុងផ្តល់ទំនុកចិត្តដល់ទីផ្សារមួយនេះ ដែលទីផ្សារមូលបត្រនេះបានក្លាយជាច្រកមួយសម្រាប់ការធ្វើពិពិធកម្មហិរញ្ញប្បទានដល់ក្រុមហ៊ុន និងជាឱកាសវិនិយោគសម្រាប់វិនិយោគិនផងដែរ៕
Account
Security
Favourite Content