បន្ទាយមានជ័យ ៖ អ្នកជំនាញបានលើកឡើងថា វត្តមានមន្រ្តីកសិកម្មឃុំ ដែលបានរៀបចំឡើងដោយក្រសួងកសិកម្ម រុក្ខាប្រមាញ់ និងនេសាទ ពិតជាមានតួនាទីសំខាន់សម្រាប់កសិករ ជាពិសេស ជួយតម្រង់ទិសឱ្យកសិករធ្វើដំណាំបានផលច្រើន ហើយជួយរកទីផ្សារសម្រាប់លក់ចេញបានក្នុងតម្លៃសមរម្យទៀតផង។

កញ្ញា ថុន ចាន់រី មន្រ្តីកសិកម្មឃុំសំបួរ ស្រុកមង្គលបូរី ខេត្តបន្ទាយមានជ័យ បានឱ្យដឹងថា តាមពិតទៅកសិករនៅទីជនបទមានបទពិសោធន៍ធ្វើស្រែចំការយូរលង់មកហើយ ពោលគឺតាំងពីដូនតាជំនាន់មុនៗមកម្ល៉េះ គ្រាន់តែពួកគាត់មិនសូវចេះច្បាស់ពីបច្ចេកទេសថ្មីៗផលិតស្រូវឱ្យបានផលច្រើន ឬធ្វើស្រូវពូជប្រភេទណាដែលមានទីផ្សារល្អ។

កញ្ញា បានបញ្ជាក់ថា ៖

«នៅក្នុងឃុំសំបួរខ្ញុំនេះ ស្រូវពុំដែលសល់ទេ ​ធ្វើបានប៉ុណ្ណា លក់បានប៉ុណ្ណឹងចេញអស់ៗតែម្តង ប៉ុន្តែតម្លៃស្រូវទាប ឬខ្ពស់អស្រ័យទៅតាមពូជស្រូវផ្សេងៗគ្នា ដូចជាស្រូវ OM54 លក់បានថ្លៃចន្លោះពី៧០០-៩០០រៀលក្នុងមួយគីឡូ ស្រូវស្រង៉ែ ៨០០-៩០០រៀល ចំណែកស្រូវសែនក្រអូប ១៣៥០រៀលក្នុងមួយគីឡូ ហើយមានម៉ូយឈរចាំទិញទៀត»។

កញ្ញាបន្តឱ្យដឹងថា ដោយសារកង្វះបច្ចេកទេសនេះហើយ ទើបមន្រ្តីកសិកម្មឃុំបានធ្វើការចុះណែនាំ និងពន្យល់ឱ្យពួកគាត់បានយល់ពីវិធីធ្វើយ៉ាងណាឱ្យទិន្នផលល្អ ពិសេសធ្វើដំណាំស្រូវឱ្យទទួលបានផលច្រើន ដូចជាបង្រៀនឱ្យចេះវិធីប្រើថ្នាំកំចាត់សត្វល្អិតកុំឱ្យប៉ះពាល់សុខភាព ប្រើថ្នាំប្រភេទណាមានគុណភាពល្អ ពន្យល់កសិករឱ្យចេះធ្វើដីឱ្យរាបស្មើ ព្រោះស្រូវឱ្យផលបានច្រើន ពិសេសសម្របសម្រូលឈ្មួញឱ្យចុះមកទិញស្រូវពីកសិករ ពេលខ្លះធ្វើការដល់យប់ជ្រៅ ម៉ោង១២ ឬម៉ោង ០១យប់ក៏មានដែរ។ អ្វីដែលសំខាន់ ឱ្យពួកកសិករចេះជ្រើសរើសពូជដំណាំស្រូវណាដែលត្រូវការចាំបាច់សម្រាប់ទីផ្សារ

កញ្ញា ថុន ចាន់រី បានបញ្ជាក់ថា ៖

«យើងបង្រៀនគាត់ឱ្យចេះប្រើពូជច្រើនប្រភេទជៀសវាងកុំឱ្យសល់ បើខុសមួយត្រូវមួយ ពិសេសកសិករមានដីធំៗ ឱ្យពួកគាត់ធ្វើស្រែពូជ ២ប្រភេទឡើងទៅ ដូចជាពូជស្រូវស្រង៉ែ ពូជOM 54 ពិសេសពូជសែនក្រអូបតែម្តង។ សម្រាប់នៅក្នុងឃុំស្រង៉ែនោះ កសិករធ្វើស្រែមិនសម្រាប់តែផលិតអង្ករតែមួយមុខទេ ប៉ុន្តែធ្វើស្រែសម្រាប់ផលិតជាចំណីសត្វ និងផលិតជាស្រូវពូជទុកឆ្នាំក្រោយៗទៀតផង»។

កសិករឈ្មោះ សាម៉ុន ប៊ុនធឿម រស់នៅក្នុងឃុំសាបួរខាងលើបានឱ្យដឹងថា គ្រួសារគាត់ និងគ្រួសារឪពុកម្តាយ មានដីស្រែប្រមាណជា២៥ហិចតា កាលដើមឡើយធ្វើស្រែតាមយថាផល ពោលគឺធ្វើស្រែពឹងលើទឹកភ្លៀងទាំងស្រុង បើមានភ្ញៀងច្រើនបានផលច្រើន បើគ្មានភ្លៀងទេប្រាកដជាមិនបានផល ប៉ុន្តែក្រោយពេលមានមន្រ្តីកសិកម្មឃុំ ដែលបង្កើតឡើងដោយក្រសួងកសិកម្ម រុក្ខាប្រមាញ់ និងនេសាទ​ បានណែនាំឱ្យធ្វើមួយឆ្នាំត្រឹមតែ២ដងប៉ុណ្ណោះ ដោយផ្អែកលើទឹកភ្លៀង និងទឹកនៅសល់សម្រាប់ធ្វើរដូវប្រាំង។ ក្រៅពីនេះ មន្រ្តីកសិកម្មបានណែនាំឱ្យប្រើជី ប្រើថ្នាំប្រភេទណាដែលមានគុណភាព ជាពិសេសជួយរកទីផ្សារឱ្យតែម្តង។

អាស្រ័យហេតុនេះ កសិកររូបនេះចង់បានមន្រ្តីឃុំបានច្រើននាក់ (ម្នាក់ ឬពីរនាក់បន្ថែមទៀត)សម្រាប់​ជួយការងារកសិករឱ្យបានកាន់តែច្រើន ព្រោះថាមួយឃុំ មានមន្រ្តីកសិកម្មម្នាក់ ហាក់​មានចំនួនតិច ធ្វើឱ្យជួបការលំបាកខ្លាំងក្នុងការបំពេញការងារ។ សម្រាប់កសិករខាងលើអះអាងថា ​តម្លៃស្រូវឆ្នាំបានថ្លៃសមរម្យហើយ តែយ៉ាងណាចង់ឱ្យក្រសួងជួយអន្តរាគន៍ទៅលើឈ្មួញ​លក់ជីកសិកម្ម និងថ្នាំកសិកម្មឱ្យបានតម្លៃទាបជាងនេះ ដើម្បីសម្រួលដល់ការចំ​ណាយ​​របស់កសិករ។

គួរបញ្ជាក់ថា មន្រ្តីកសិកម្មឃុំ បាន និងកំពុងបន្តដើរតួនាទីសំខាន់ក្នុងការជំរុញផលិតកម្មបង្កើនគុណភាពផលិតផលកសិកម្ម និងសម្របសម្រួលទីផ្សារកសិផលជូនកសិករ។ លើសពីនេះទៀត មន្រ្តីកសិកម្មឃុំបានចូលរួមផ្សព្វផ្សាយពីកម្មវិធីអភិវឌ្ឍន៍វិស័យកសិកម្ម និងតម្លៃស្រូវសើមដោយផ្ទាល់ជាមួយកសិករ និងតាមប្រព័ន្ធបណ្ដាញសង្គមយ៉ាងសកម្ម។

គួរបញ្ជាក់ដែរថា តាមរបាយការណ៍ក្រសួងកសិកម្ម រុក្ខា​ប្រមាញ់ និងនេសាទ បានឱ្យដឹងថា នៅក្នុងឆ្នាំ២០២៥នេះ មន្ដ្រីកសិកម្មឃុំចំនួន ១,០០០នាក់ នឹងត្រូវដាក់ពង្រាយនៅគ្រប់រាជធានី-ខេត្តទាំង២៥ ទូទាំងប្រទេសកម្ពុជា បន្ថែមលើមន្ដ្រីកសិកម្មឃុំចំនួ២៥០នាក់ ដែលមានស្រាប់ និងកំពុងបម្រើប្រជាកសិករដោយផ្ទាល់៕ វិន ឈុនហ៊ាត