កាលពីពេលថ្មីៗនេះ ក្រុមហ៊ុនធានារ៉ាប់រងអាយុជីវិត និងសុខភាព អេ អាយ អេ ខេមបូឌា សហការជាមួយមន្ទីរពេទ្យអន្តរជាតិ InterCare បានបិទយុទ្ធនាការប្រចាំឆ្នាំ AIA Fit For Hope 2024 ដែលមានរយៈពេល 2ខែកន្លងទៅនេះ ប្រកបដោយផ្លែផ្កា តាមរយៈផ្តល់ការពិនិត្យជំងឺមហារីកសុដន់ដោយឥតគិតថ្លៃដល់ស្ត្រីនៅកម្ពុជា និងកម្មវិធីអប់រំនានាៗ។ភាពជាដៃគូដែលបានចាប់ផ្តើមនៅក្នុងខែសីហា ឆ្នាំ 2024 បានបញ្ចប់ជាមួយនឹងលទ្ធផលលើសពីការរំពឹងទុក ដោយឃើញស្ត្រីកម្ពុជាមកទទួលការពិនិត្យរហូតដល់ 5,369 នាក់ ដែលក្នុងនោះមានស្ត្រី 1,122 នាក់នៅចន្លោះ 25 ដល់ 49ឆ្នាំ បានរកឃើញភាពមិនប្រក្រតីដូចជាមានដុំក្នុងសុដន់ (85.5% នៃ 1,122) រីឯ 12.55% តម្រូវឱ្យធ្វើម៉ាម៉ូក្រាម និង 1.89% បានរកឃើញថាមានហានិភ័យខ្ពស់ក្នុងការ​ប្រឈមនឹង ជំងឺមហារីកសុដន់។​

លទ្ធផលនេះបានបញ្ជាក់ពីការប្តេជ្ញាចិត្តរួមគ្នារវាងស្ថាប័នទាំងពីរក្នុងការលើកកម្ពស់សុខភាពស្ត្រី និងការយល់ដឹងអំពីជំងឺមហារីកសុដន់ដែលជាជំងឺមិនឆ្លងដ៏កាចសាហាវនៅកម្ពុជា។ ជាមួយការគាំទ្រពីអ្នកជំនាញ និងឧបករណ៍ទំនើបរបស់មន្ទីរពេទ្យ InterCare យុទ្ធនាការ AIA Fit For Hope 2024 ឆ្នាំនេះបានធ្វើដំណើរទៅកាន់ 24 ទីតាំង ដោយផ្តល់ជូននូវសេវាសុខភាពសំខាន់ៗរួមមានផ្តល់ជូនការពិនិត្យស្វែងរកជំងឺមហារីកសុដន់ដោយឥតគិតថ្លៃ ការវាយតម្លៃរោគវិនិច្ឆ័យ ការពិនិត្យដំបូង និងការពិនិត្យអ៊ុលត្រាសោនសម្រាប់អ្នករកឃើញមានដុំសាច់សុដន់។ កិច្ចខិតខំប្រឹងប្រែងរួមគ្នានេះ ក៏បានសង្កត់ធ្ងន់អំពីការយល់ដឹងសំខាន់ៗអំពីសុខភាពសុដន់ទៅដល់ស្ត្រីកម្ពុជា ជាពិសេសការរកឃើញបឋមនៅដំណាក់កាលដំបូងទាន់ពេលវេលា​ ដែលផ្តល់ភាគរយខ្ពស់ក្នុងការព្យាបាលប្រកបដោយប្រសិទ្ធភាព និងឱ្យជាសះស្បើយ។

លោកស្រី Jane Tay បានបង្ហាញអារម្មណ៍ចំពោះភាពជាដៃគូនេះថា៖ “យើងខ្ញុំសូមថ្លែងអំណរគុណយ៉ាងជ្រាលជ្រៅចំពោះភាពជាដៃគូដ៏រឹងមាំជាមួយមន្ទីរពេទ្យ InterCare ដែលមានទស្សនវិស័យរួមគ្នា និងបានរួមចំណែកយ៉ាងធំចំពោះ ជោគជ័យរបស់យុទ្ធនាការ AIA Fit For Hope 2024។ តាមរយៈផ្តល់ការពិនិត្យពីអ្នកជំនាញ និងឧបករណ៍ទំនើបរបស់មន្ទីរពេទ្យបានជួយសង្គ្រោះដល់ស្ត្រីកម្ពុជា រាប់ពាន់នាក់ដែលអញ្ជើញមកពិនិត្យស្វែងរកជំងឺមហារីកសុដន់ ទទួលយកការអប់រំ និងការបង្ការថែទាំដល់ស្ត្រីកម្ពុជា។ យើងខ្ញុំសង្ឃឹមយ៉ាងមុតមាំថានឹងមានវត្តមានរបស់មន្ទីរពេទ្យ InterCare ចូលរួមជាដៃគូក្នុងយុទ្ធនាការ AIA Fit For Hope នាឆ្នាំក្រោយដើម្បីបន្តបេសកក្មរួមគ្នាក្នុងការជួយឱ្យស្ត្រីកម្ពុជាកាន់តែច្រើនប្រយុទ្ធនឹងជំងឺមហារីកសុដន់ដ៏កាចសាហាវ ដើម្បីជួយឱ្យពួកគាត់រស់នៅមានសុខភាព និងជីវិតកាន់តែប្រសើរ។” លោក Jason Harrison សហស្ថាបនិក និងជាអ្នកគ្រប់គ្រងទូទៅនៃមន្ទីរពេទ្យ InterCare ក៏បានថ្លែងថា “យើងខ្ញុំមានក្តីរីករាយ យ៉ាងខ្លាំងដែលបានគាំទ្រជ្រោមជ្រែង AIA Fit For Hope ដែលជាយុទ្ធនាការប្រចាំឆ្នាំដ៏មានអត្ថន័យសម្រាប់ជីវិតស្ត្រីកម្ពុជាគ្រប់រូប។​ ភាពជាដៃគូរបស់យើងខ្ញុំជាមួយ អេ អាយ អេ ខេមបូឌា ឆ្លុះបញ្ចាំងពីចក្ខុវិស័យរួមគ្នាក្នុងការជួយឱ្យសុខមាលភាពរបស់ប្រជាជនកម្ពុជា កាន់តែប្រសើរ​ ជាពិសេសសេវាសុខភាពប្រកបដោយប្រសិទ្ធភាពដែលជាគុណតម្លៃរបស់មន្ទីរពេទ្យរបស់យើងខ្ញុំ”។ ជោគជ័យ នៃយុទ្ធនាការនេះ គឺជាសក្ខីភាពមួយចំពោះការគាំទ្រ និងជ្រោមជ្រែងពីរាជរដ្ឋាភិបាល ស្ថាប័នពាក់ព័ន្ធទាំងអស់ ក៏ដូចជាសាធារណជនទាំងអស់ដែលបានរួមគ្នា បង្ហាញពីសាមគ្គីភាព លើកកម្ពស់ការយល់ដឹងអំពីជំងឺមហារីកសុដន់​ដែល​ជាជំងឺមិនឆ្លងធំជាងគេមួយនៅកម្ពុជា ដែលជនរងគ្រោះភាពច្រើនជាស្ត្រី។”

គួរបញ្ជាក់ផងដែរថា ឆ្នាំនេះជាឆ្នាំទី ៨ របស់យុទ្ធនាការ AIA Fit For Hope ក្នុងការផ្សព្វផ្សាយការយល់ដឹងអំពីជំងឺមហារីកសុដន់ និងផ្តល់ការពិនិត្យស្វែងរកជំងឺមហារីកសុដន់ដំណាក់កាលដំបូង ដើម្បីជួយជំរុញឱ្យស្ត្រីទាំងអស់នៅក្នុងប្រទេសកម្ពុជាយល់ដឹងជំងឺ មហារីកសុដន់ រួមគ្នាប្រយុទ្ធប្រឆាំងនឹងជំងឺ និងលើកកម្ពស់ក្នុងសហគមន៍តាមរយៈការចែករំលែកបទពិសោធ ផ្តល់ការគាំទ្រគ្នាទៅវិញទៅមក និងជំរុញភាពអង់អាច។ យុទ្ធនាការ AIA Fit for Hope 2024 គឺជាឆ្នាំទី៣ ដែលទទួលបានការគាំទ្រដោយក្រសួងកិច្ចការនារី ក្រោមក្របខ័ណ្ឌនៃកិច្ចសហការរវាងក្រសួងកិច្ចការនារី។ ជាមួយកិច្ចប្រឹងប្រែងរបស់ក្រុមហ៊ុន រួមនឹងការទទួលស្គាល់របស់រាជរដ្ឋាភិបាល បានធ្វើឱ្យ AIA Fit For Hope ក្លាយជាយុទ្ធនាការថ្នាក់ជាតិដើម្បីប្រយុទ្ធប្រឆាំងនឹងជំងឺមហារីកសុដន់ បានពង្រឹងការប្តេជ្ញាចិត្តរបស់ អេ អាយ​ អេ ខេមបូឌា ក្នុងការចែករំលែកព័ត៌មាន បង្កើនការយល់ដឹង បង្កើនសារៈសំខាន់នៃការរកឃើញនិងការការពារទាន់ពេលវេលា និងផ្តល់មធ្យោបាយឱ្យស្ត្រីទទួលបាននូវរបៀបរស់នៅមានសុខភាពល្អ។

សម្រាប់ព័ត៌មានលម្អិតអំពី អេ អាយ អេ ខេមបូឌា និងលើដំណោះស្រាយការពារអាយុជីវិត ជំងឺធ្ងន់ធ្ងរ គ្រោះថ្នាក់ចៃដន្យ និងការការពាសុខភាព សូមទាក់ទង AIA Client Care តាមរយៈលេខ 086 999 242 ចូលទៅកាន់ aia.com.kh។ សម្រាប់ព័ត៌មានលម្អិតអំពីមន្ទីរពេទ្យ InterCare សូមចូលទៅកាន់គេហទំព័រ៖ www.intercarehospital.com​​ ឬ តេលេក្រាម៖ https://t.me/intercarehospital