ភ្នំពេញ ៖ ធនាគារអភិវឌ្ឍន៍ជនបទ និងកសិកម្ម (ARDB) ទទួលបានតួនាទីគន្លឹះ ពីរាជរដ្ឋាភិបាល ក្នុងការអនុវត្តកម្មវិធីគោលនយោបាយ «យន្តការសម្របសម្រួល និងកម្មវិធីហិរញ្ញប្បទាន សំដៅលើកស្ទួយផលិតកម្ម, ស្វែងរកទីផ្សារ និងរក្សាលំនឹងថ្លៃកសិផលសំខាន់ៗក្នុងកម្រិតសមរម្យ» ក្នុងករណីមានវិបត្តិនៃថ្លៃកសិផល ដែលមានទឹកប្រាក់ប្រមាណ ១០០ លានដុល្លារអាម៉េរិកសម្រាប់អន្តរាគមន៍ជួយលើកស្ទួយផលិតកម្ម ស្វែងរកទីផ្សារ និងរក្សាលំនឹងថ្លៃកសិផលសំខាន់ៗក្នុងកម្រិតសមរម្យ។

នេះបើតាមការបញ្ជាក់របស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ ថ្លែងក្នុងពិធីអបអរសាទរខួប ២៥ ឆ្នាំ នៃការបង្កើតធនាគារអភិវឌ្ឍន៍ជនបទ និងកសិកម្ម (ARDB) កាលពីថ្មីៗនេះ។

ឯកឧត្តមអគ្គបណ្ឌិតសភាចារ្យបានថ្លែងថា លើមូលដ្ឋាននៃសមិទ្ធផលដែលសម្រេចបានក្នុងរយៈពេល ២៥ ឆ្នាំកន្លងមកនេះ ធនាគារអភិវឌ្ឍន៍ជនបទ និងកសិកម្ម នឹងបន្តបំពេញតួនាទីដ៏សំខាន់ក្នុងការចូលរួមអនុវត្តយុទ្ធសាស្ត្របញ្ចកោណដំណាក់កាលទី១ ជាពិសេស មុំទី ៣ នៃបញ្ចកោណទី៤ ពោលគឺការលើកស្ទួយកសិកម្ម និងការអភិវឌ្ឍជនបទ ដែលត្រូវបានដាក់ចេញដោយរាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំដ៏ប៉ិនប្រសប់ ស្វាហាប់ និងឈ្លាសវៃ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលជាអគ្គមគ្គុទេសក៍វ័យក្មេងដ៏ឆ្នើម ពោរពេញដោយសមត្ថភាព ចំណេះដឹង និងថាមពល។

ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន បានថ្លែងដូច្នេះថា ៖

“ជាក់ស្ដែង រាជរដ្ឋាភិបាលបានសម្រេចប្រគល់ជូនធនាគារអភិវឌ្ឍន៍ជនបទ និងកសិកម្មនូវតួនាទីគន្លឹះ ក្នុងការអនុវត្តកម្មវិធីគោលនយោបាយអាទិភាពទី៥ របស់រាជរដ្ឋាភិបាលនីតិកាលទី៧ នៃរដ្ឋសភា នៅក្នុង «យន្តការសម្របសម្រួល និងកម្មវិធីហិរញ្ញប្បទាន សំដៅលើកស្ទួយផលិតកម្ម ស្វែងរកទីផ្សារ និងរក្សាលំនឹងថ្លៃកសិផលសំខាន់ៗ ក្នុងកម្រិតសមរម្យ» ក្នុងករណីមានវិបត្តិនៃថ្លៃកសិផល ដែលមានទឹកប្រាក់ប្រមាណ ១០០ លានដុល្លារអាម៉េរិក។”

ឯកឧត្តមអគ្គបណ្ឌិតសភាចារ្យ បានថ្លែងបន្តថា ការលើកស្ទួយវិស័យកសិកម្ម និងការអភិវឌ្ឍជនបទនៅតែជាអាទិភាពចម្បងមួយរបស់រាជរាដ្ឋាភិបាល នីតិកាលទី៧ នៃរដ្ឋសភា។ យុទ្ធសាស្តបញ្ចកោណដំណាក់កាលទី១ បានដាក់ចេញនូវគោលដៅយុទ្ធសាស្ត្រនៃការបន្តពង្រឹងតួនាទី និងអភិវឌ្ឍវិស័យកសិកម្មកម្ពុជាឱ្យកាន់តែមានលក្ខណៈទំនើប និងមានភាពធន់កាន់តែខ្ពស់ ព្រមទាំងការបន្តគាំទ្រដល់ការអភិវឌ្ឍជនបទ សំដៅធានាសន្តិសុខ និងសុវត្ថិភាពស្បៀង បង្កើនតម្លៃបន្ថែមកាន់តែខ្ពស់ ជំរុញភាពប្រកួតប្រជែង និងលើកកម្ពស់គុណភាព និងកម្រិតជីវភាពរស់នៅរបស់ប្រជាពលរដ្ឋនៅជនបទ ក៏ដូចជាកាត់បន្ថយគម្លាតរវាងអ្នករស់នៅទីក្រុង និងអ្នករស់នៅជនបទ។

សូមបញ្ជាក់ថា សមិទ្ធផលសំខាន់ៗរបស់ធនាគារអភិវឌ្ឍន៍ជនបទ និងកសិកម្ម ក្នុងការចូលរួមអនុវត្តគោលនយោបាយ និងកម្មវិធីពិសេសរបស់រាជរដ្ឋាភិបាលមានដូចខាងក្រោម ៖

១៖ បានបង្កើតនូវ «មូលនិធិទ្រទ្រង់ និងអភិវឌ្ឍន៍វិស័យកសិកម្ម» ដើម្បីពង្រីកសមត្ថភាពឃ្លាំងស្តុក, ឡសម្ងួត និងម៉ាស៊ីនកិន និងកែច្នៃស្រូវ-អង្ករ ក្នុងគោលដៅធានាស្ថិរភាពថ្លៃស្រូវ-អង្ករ និង សន្តិសុខស្បៀង, ដែលមានទឹកប្រាក់ ប្រមាណ ៣៦លានដុល្លារ

២៖ បានផ្តល់ទុនសម្រាប់សាងសង់ឃ្លាំងស្តុក និងឡសម្ងួតស្រូវ ដែលមានទឹកប្រាក់ប្រមាណ ៣០ លានដុល្លារ នៅក្នុងខេត្តបាត់ដំបង, កំពង់ធំ, កំពង់ស្ពឺ និង ព្រៃវែង និងបានផ្តល់ហិរញ្ញប្បទានអន្តរាគមន៍ពិសេសជាទុនបង្វិល ដែលមានទឹកប្រាក់ប្រមាណ៩០ លានដុល្លារ សម្រាប់ប្រមូលទិញស្រូវពីកសិករ ដើម្បីធានាស្ថិរភាព និងរក្សាលំនឹងថ្លៃស្រូវ របស់ប្រជាកសិករ

៣៖ បានផ្តល់ហិរញ្ញប្បទានដល់គម្រោងផ្សេងទៀត ពាក់ព័ន្ធនឹងវិស័យកសិកម្ម, ដែលមានទឹកប្រាក់ប្រមាណ ៦៧.៥លានដុល្លារ, ដោយមានកិច្ចសហការ ជាមួយដៃគូអភិវឌ្ឍន៍អន្តរជាតិដូចជា ៖ ទីភ្នាក់ងារបារាំងសម្រាប់ការអភិវឌ្ឍ (AFD), ធនាគារអភិវឌ្ឍន៍អាស៊ី (ADB), ធនាគារពិភពលោក (World Bank) និងមូលនិធិអន្តរជាតិសម្រាប់ការអភិវឌ្ឍកសិកម្ម (IFAD) ក្នុងអត្រាការប្រាក់សម្បទាន ទោះបីជាអត្រាការប្រាក់នៅលើទីផ្សារអន្តរជាតិ និងអត្រាការប្រាក់ក្នុងស្រុកបានកើនឡើងយ៉ាងណាក្តី

៤៖ បានអនុវត្តកញ្ចប់វិធានការអន្តរាគមន៍ពិសេស ក្នុង «ក្របខណ្ឌយុទ្ធសាស្ត្រ និងកម្មវិធីស្តារ និងជំរុញកំណើនសេដ្ឋកិច្ច ក្នុងការរស់នៅជាមួយជំងឺកូវីដ-១៩ តាមគន្លងប្រក្រតីភាពថ្មីឆ្នាំ ២០២១-២០២៣» ដែលមានទឹកប្រាក់ប្រមាណ ១៧៨លានដុល្លារ៕