ភ្នំពេញ ៖ វិស័យមីក្រូហិរញ្ញវត្ថុបានបង្កើតផលិតផលឥណទានកសិកម្ម និងសេវាកម្មហិរញ្ញវត្ថុសម្បូរបែប ដើម្បីឆ្លើយតបនឹងតម្រូវការរបស់ប្រជាកសិករ និងសហគមន៍កសិកម្មនៅតាមមូលដ្ឋាន ជាពិសេស វិស័យនេះនឹងបន្តជំរុញការផ្តល់ឥណទានដល់ប្រជាពលរដ្ឋ ក៏ដូចជារបរពាក់ព័ន្ធក្នុងវិស័យកសិកម្ម ដើម្បីជំរុញឱ្យវិស័យនេះរីកចម្រើនប្រកបដោយនិរន្តរភាព។

អ្នកស្រី វ៉ន ឈិន អាយុ ៥២ ឆ្នាំ ដែលជាកសិករប្រកបរបរជាអ្នកចិញ្ចឹមសត្វ មានទីលំនៅក្នុងភូមិតាម៉ៅ ឃុំកំពង់សឹង ស្រុកព្រះស្តេច ខេត្តព្រៃវែង បានឱ្យដឹងថា នៅក្នុងឆ្នាំ ២០១៩ អ្នកស្រីបានសម្រេចចិត្តប្រើប្រាស់កម្ចីជាលើកទី១ ជាមួយគ្រឹះស្ថានមីក្រូហិរញ្ញវត្ថុ ចំនួន ១ ៥០០ ០០០ រៀល មួយផ្នែកយកទៅទិញបន្លែ និងមួយផ្នែកទៀតទិញមាន់ ទា យកមកចិញ្ចឹម។

ដោយឃើញថាមុខរបរនេះមានការនឿយហត់ខ្លាំង ហើយរូបអ្នកស្រីក៏កាន់តែចាស់ផងនោះ អ្នកស្រីក៏សម្រេចចិត្តផ្លាស់ប្តូរមុខរបរខ្លួនពីអ្នកលក់បន្លែមកចិញ្ចឹមសត្វវិញ។ នៅក្នុងឆ្នាំ២០២០ ដោយមានដើមទុនខ្លួនឯងខ្លះ និងប្រើកម្ចីពីគ្រឹះស្ថានមីក្រូហិញ្ញវត្ថុចំនួន ២ ៥០០ ០០០ រៀល អ្នកស្រីបានទិញ មាន់ ទា បន្ថែម និងជីសម្រាប់ដាក់ស្រែ។ មកដល់បច្ចុប្បន្ននេះ អ្នកស្រីបានប្រើប្រាស់កម្ចីជាមួយគ្រឹះស្ថានមីក្រូហិរញ្ញវត្ថុដដែលជាលើកទី៥ ចំនួន ៧ ០០០ ០០០ រៀល សម្រាប់ទិញជ្រូកមកចិញ្ចឹម និងមួយផ្នែកទៀតសាងសង់ទ្រុង។

អ្នកស្រីបានមានប្រសាសន៍បន្តទៀតថា តាំងពីអ្នកស្រីបានប្រើប្រាស់កម្ចីជាមួយគ្រឹះស្ថានមីក្រូហិរញ្ញវត្ថុមក ធ្វើឱ្យជីវភាពគ្រួសាររបស់អ្នកស្រីមានភាពល្អប្រសើរជាងមុន។ បើប្រៀបធៀបពីចំណូលវិញ អ្នកស្រីអាចរកចំណូលបាន ១ ២០០ ០០០ រៀល ក្នុងមួយខែ ធៀបពីមុនអ្នកស្រីអាចរកចំណូលបានត្រឹមតែ ៦០០ ០០០ រៀល ក្នុងមួយខែតែប៉ុណ្ណោះ។

បំណងប្រាថ្នាទៅថ្ងៃអនាគត អ្នកស្រីចង់ពង្រីកមុខរបរចិញ្ចឹមសត្វនេះឱ្យក្លាយទៅជាកសិដ្ឋានធំមួយ ដើម្បីបន្សល់ទុកនូវអាជីវកម្មនេះដល់កូនៗទៅថ្ងៃអនាគត។ ជាចុងក្រោយអ្នកស្រីបានថ្លែងអំណរគុណដល់គ្រឹះស្ថានមីក្រូហិរញ្ញវត្ថុដែលបានផ្តល់នូវទំហំឥណទានដែលសមស្របទៅនឹងសមត្ថភាពចំណូលរបស់អ្នកស្រី ដែលធ្វើឱ្យអ្នកស្រី និងក្រុមគ្រួសារមានលទ្ធភាពប្រើប្រាស់កម្ចីដើម្បីបង្កើតអាជីវកម្មផ្ទាល់ខ្លួន ដែលមានដំណើរការរហូតមកដល់សព្វថ្ងៃនេះ។

លោក កាំង តុងងី​ អ្នក​នាំពាក្យ​សមាគម​គ្រឹះស្ថាន​មីក្រូហិរញ្ញវត្ថុ​ បានថ្លែងប្រាប់ថា បើមើលពីប្រវត្តិដើម វិស័យមីក្រូហិរញ្ញវត្ថុបានកើតចេញពីវិស័យកសិកម្មដែរ ដូច្នេះយើងនឹងបន្តជំរុញការផ្តល់ឥណទានដល់ប្រជាពលរដ្ឋ ក៏ដូចជារបរពាក់ព័ន្ធក្នុងវិស័យកសិកម្ម។ វិស័យមីក្រូហិរញ្ញវត្ថុចាត់ទុកវិស័យកសិកម្មជាវិស័យអាទិភាព។

លោកបានថ្លែងបន្តថា ក្នុងទីផ្សារបច្ចុប្បន្ន គឺមានផលិតផល និងសេវាកម្មមួយចំនួន ត្រូវបានបង្កើតឡើង ដើម្បីបម្រើដល់តម្រូវការជាក់ស្តែងរបស់ប្រជាពលរដ្ឋក្នុងវិស័យកសិកម្ម មិនថា ឥណទានកសិកម្មតាមរដូវកាល និងឥណទានស្របទៅតម្រូវការរបស់ប្រជាកសិករ។ ឱទាហរណ៍ ជាទូទៅ ឥណទានក្នុងវិស័យកសិកម្មមិនតម្រូវឱ្យអ្នកប្រើប្រាស់បង់ប្រាក់ដើមជារៀងរាល់ខែនោះទេ ដោយអាចបង់ប្រាក់ដើមក្នុងមួយឆ្នាំម្តង ឬពីរដង នៅពេលដែលប្រមូលផលបាន។

លោក កាំង តុងងី​ បានថ្លែងដូច្នេះថា ៖

«ក្រៅតែពីផលិតផលឥណទាននៅលើទីផ្សារ មានគ្រឹះស្ថានមួយចំនួនបង្កើតផលិតផលថ្មីៗបន្ថែមទៀត ដើម្បីបំពេញតាមតម្រូវការរបស់អតិថិជន។ ឱទាហរណ៍ ថ្មីៗនេះ យើងជំរុញឱ្យមានឥណទានទៅសហគមន៍កសិកម្ម ដែលវានឹងជួយជំរុញពង្រឹងសេដ្ឋកិច្ច ឬសហគមន៍កសិកម្មនៅតាមមូលដ្ឋាន ពិសេសតាមរយៈការផ្តល់ឥណទានដល់សហគមន៍ ដោយមិនទាមទារទ្រព្យធានា នៅពេលសហគមន៍មានលក្ខខណ្ឌគ្រប់គ្រាន់ក្នុងការទទួលបានឥណទាន»។

លោកបានបន្តថា បច្ចុប្បន្ន ដើម្បីកាត់បន្ថយហានិភ័យក្នុងការ យើងកំពុងតែធ្វើការជាមួយក្រុមហ៊ុនធានារ៉ាប់រង និងដៃគូអភិវឌ្ឍន៍មួយចំនួន ដើម្បីសាកល្បងនូវផលិតផលធានារ៉ាបរងដំណាំ ហើយនៅពេលដំណាំនោះមានផលប៉ះពាល់ គឺមានធានារ៉ាប់រងជួយការពារ និងបង្ការហានិភ័យ។

អ្នកនាំពាក្យរូបនេះបានលើកឡើងថា បច្ចុប្បន្ន កម្ចីក្រៅផ្លូវការនៅតែជាបញ្ហាប្រឈមសម្រាប់វិស័យកសិកម្ម ដោយសារវាមានអត្រាប្រាក់ខ្ពស់ហួសហេតុ និងគ្មានការការពារផ្នែកច្បាប់ ដូច្នេះហើយបានសមាគមបានជំរុញសមាកជិករបស់ខ្លួនសិក្សាពីតម្រូវការជាក់ស្តែងរបស់ប្រជាកសិករ ហើយបង្កើតផលិតឥណទានឱ្យស្របទៅតម្រូវការរបស់ពួកគាត់។

យោងតាមរបាយការណ៍របស់សមាគមមីក្រូហិរញ្ញវត្ថុកម្ពុជា គិតត្រឹមដំណាច់ត្រីមាសទី១ ឆ្នាំ២០២៤ វិស័យមីក្រូហិរញ្ញវត្ថុបានជួយគំាទ្រដល់ប្រជាពលរដ្ឋចំនួន ១,៥៥លាននាក់ និងបានផ្តល់ឥណទានចំនួន ៥,១៦ពាន់លានដុល្លារសហរដ្ឋអាមេរិកនៅទូទាំងប្រទេសនិងលើគ្រប់វិស័យនៃខឿនសេដ្ឋកិច្ចជាតិ៕