ភ្នំពេញ ​៖ ធនាគារជាតិនៃកម្ពុជា បានអំពាវនាវឱ្យប្រជាពលរដ្ឋបង្កើនការប្រុងប្រយ័ត្នជាប់ជាប្រចាំ ដើម្បីកុំឱ្យធ្លាក់ចូលក្នុងល្បិចឆបោកដែលអាចនាំឱ្យបាត់បង់ប្រាក់កាស ឬទ្រព្យសម្បត្តិផ្សេងៗ តាមរយៈការចូលរួមវិនិយោគជាក្រុម ជាពិសេសប្រើប្រាស់និមិ្មត្តសញ្ញា និងឈ្មោះធនាគារជាតិនៃកម្ពុជា ជារូបភាពបំភាន់ភ្នែក ដើម្បីផ្សព្វផ្សាយពីគម្រោងវិនិយោគ ឬប្រតិបត្តិការជួញដូរផលិតផលហិរញ្ញវត្ថុក្រៅផ្លូវការ។

នាពេលថ្មីៗនេះ ធនាគារជាតិនៃកម្ពុជា បានសង្កេតឃើញគណនីបណ្តាញសង្គមមួយចំនួនបានប្រើប្រាស់និមិ្មត្តសញ្ញា និងឈ្មោះធនាគារជាតិនៃកម្ពុជា ដោយមិនមានការអនុញ្ញាតក្នុងចេតនាទុច្ចរិតបង្កើតរូបភាពបំភាន់ភ្នែក ដើម្បីផ្សព្វផ្សាយពីគម្រោងវិនិយោគ ឬប្រតិបត្តិការជួញដូរផលិតផលហិរញ្ញវត្ថុក្រៅផ្លូវការ។

ធនាគារជាតិនៃកម្ពុជា បានបដិសេធទាំងស្រុងចំពោះបណ្តាញខុសច្បាប់ទាំងនោះ និងសូមអំពាវនាវឱ្យសាធារណជនបង្កើនការប្រុងប្រយ័ត្នជាប់ជាប្រចាំ ដើម្បីកុំឱ្យធ្លាក់ចូលល្បិចឆបោក ដែលអាចនាំឱ្យបាត់បង់ប្រាក់កាស ឬទ្រព្យសម្បត្តិផ្សេងៗ តាមរយៈការចូលរួមវិនិយោគជាមួយក្រុមទាំងឡាយណាដែលពុំមានអាជ្ញាប័ណ្ណ និងការត្រួតពិនិត្យត្រឹមត្រូវពីអាជ្ញាធរមានសមត្ថកិច្ច។

សូមបញ្ជាក់ផងដែរថា ធនាគារជាតិនៃកម្ពុជា ពុំមានក្រុម ឆាណែល ឬគណនី Telegram ឬបណ្តាញទំនាក់ទំនងសង្គមផ្សេងៗទៀតសម្រាប់ផ្សព្វផ្សាយឱ្យសាធារណជនចូលរួមវិនិយោគលើទីផ្សារហិរញ្ញវត្ថុ ដូចជា ហាងឆេងមាស អត្រាប្តូរប្រាក់ ឬទ្រព្យឌីជីថលនោះឡើយ។

ស្រដៀងគ្នានេះដែរ អ្នកជំនាញក្នុងវិស័យធនាគារ និងហិរញ្ញវត្ថុ បានណែនាំឱ្យប្រជាពលរដ្ឋបង្កើនការប្រុងប្រយ័ត្នចំពោះករណីឆបោកដែលអាចកើតមានពីសំណាក់ជនខិលខូច ដោយប្រើប្រាស់រូបភាពជាបុគ្គលិករបស់ធនាគារ និងគ្រឹះស្ថានហិរញ្ញវត្ថុ ក្នុងការផ្តល់សេវាហិរញ្ញវត្ថុដល់ប្រជាពលរដ្ឋ ជាពិសេសគឺការបង់ប្រាក់ទៅធនាគារ និងគ្រឹះស្ថានហិរញ្ញវត្ថុ តាមរយៈពួកគេ ហើយនឹងតម្រូវបង់ថ្លៃសេវាមុននឹងទទួលបានកម្ចីជាដើម។

ក្នុងករណីដែលអាចកើតមាន ជនឆបោកបន្លំខ្លួនជាបុគ្គលិកធនាគារ និងគ្រឹះស្ថានហិរញ្ញវត្ថុ ហើយតម្រូវឱ្យអតិថិជនបង់ប្រាក់តាមរយៈគណនីរបស់ពួកគេផ្ទាល់។ ជនឆបោកមួយចំនួនបន្លំខ្លួនជាបុគ្គលិកធនាគារ ឬគ្រឹះស្ថានហិរញ្ញវត្ថុណាមួយ ហើយទាក់ទងទៅអតិថិជននៃស្ថាប័ននោះ ដោយប្រើប្រាស់មធ្យោបាយទាក់ទងទៅក្នុងរូបភាពផ្សេងៗ ដូចជាទាងក់ទងតាមទូរសព្ទ និងបណ្តាញទំនាក់ទំនង Telegram ជាដើម។ ដូច្នេះ ដើម្បីជៀសផុតពីបោកបញ្ឆោតទាំងនេះ អ្នកជំនាញបានគូសបញ្ជាក់ថា ជាទូទៅ អតិថិជនអាចការពារខ្លួនបានពីការឆបោកទាំងនេះ ដោយត្រូវដឹងថា ធនាគារ ឬគ្រឹះស្ថានមីក្រូហិរញ្ញវត្ថុមិនមានប្រាក់រង្វាន់ ឬការបញ្ចុះតម្លៃនៃទឹកប្រាក់ដែលត្រូវបង់សងនោះទេ។ ដូច្នេះ ក្នុងករណីមានរង្វាន់ អតិថិជនត្រូវមានការប្រុងប្រយ័ត្នខ្ពស់ ហើយគួរតែទាក់ទងទៅគ្រឹះស្ថានដែលខ្លួនប្រើប្រាស់កម្ចី ដើម្បីសាកសួរព័ត៌មានបញ្ជាក់ ដែលលេខទំនាក់ទំនងរបស់គ្រឹះស្ថានមាននៅលើតារាងបង់ប្រាក់ស្រាប់ ផេកហ្វេសប៊ុកផ្លូវការរបស់គ្រឹះស្ថាន និងនៅលើគេហទំព័ររបស់គ្រឹះស្ថានផ្ទាល់ជាដើម។

មួយទៀត គឺអតិថិជនត្រូវមានការប្រុងប្រយ័ត្ន ចំពោះការតម្រូវការឱ្យបង់សេវា ឬកម្រៃជើងសារមុននឹងទទួលបានកម្ចី។ សម្រាប់ស្ថាប័នហិរញ្ញវត្ថុ ជាទូទៅគឺមិនយកកម្រៃសេវាមុនទេ ដូច្នេះក្នុងករណីគេឱ្យបង់សេវាមុន ឬកម្រៃជើងសារមុន អតិថិជនអាចសួរបញ្ជាក់តាមរយៈលេខទំនាក់ទំនងរបស់ស្ថាប័ន ដែលមាននៅលើតារាងបង់ប្រាក់ គេទំព័រ និងផេកហ្វេសប៊ុកផ្លូវការ ថា តើមានករណីនេះដែរ ឬទេ។

ជាមួយគ្នានេះ ដើម្បីជៀសវាងពីការបោកបញ្ឆោតរបស់ជនខិលខូចក្លែងបន្លំជាបុគ្គលិករបស់ធនាគារ និងគ្រឹះស្ថានហិរញ្ញវត្ថុ ដែលប្រជាពលរដ្ឋបានប្រើប្រាស់សេវា លោក កាំង តុងងី អ្នកនាំពាក្យសមាគមគ្រឹះស្ថានមីក្រូហិរញ្ញវត្ថុកម្ពុជា បានលើកឡើងថា វិធីសាស្ត្រល្អ និងមានប្រសិទ្ធភាពជាងគេបំផុតគឺអតិថិជនគួរទៅបង់ប្រាក់តាមភ្នាក់ងារធនាគារ និងគ្រឹះស្ថានមីក្រូហិរញ្ញវត្ថុដែលខ្លួនបានប្រើប្រាស់សេវារបស់គេផ្ទាល់តែម្តង ឬប្រើប្រាស់លេខគណនី ឬព័ត៌មានភ្ជាប់នៅតារាងបង់ប្រាក់។

លោកបានថ្លែងបន្តថា បើមិនមានភាពចាំបាច់ទេ អតិថិជនមិនត្រូវបង់ប្រាក់តាមបុគ្គល ឬនរណាម្នាក់នោះទេ។ ប្រសិនបើគ្រឹះស្ថានដែលអតិថិជនបានប្រើប្រាស់សេវានៅក្បែរខ្លួន អតិថិជនគួរទៅបង់ដោយផ្ទាល់ ដើម្បីជៀសវាងការបោកបញ្ឆោតនានា ដែលជនខិលខូចប្រើប្រាស់។ ក្នុងករណីសង្ស័យ អតិថិជនគួរទាក់ទងលេខទូរសព្ទរបស់ស្ថាប័នផ្ទាល់ ដើម្បីសាកសួរព័ត៌មានបញ្ជាក់៕