ភ្នំពេញ ៖ អ្នកជំនាញក្នុងវិស័យធនាគារ និងហិរញ្ញវត្ថុ បានណែនាំឱ្យប្រជាពលរដ្ឋបង្កើនការប្រុងប្រយ័ត្នចំពោះករណីឆបោកដែលអាចកើតមានពីសំណាក់ជនខិលខូច ដោយប្រើប្រាស់រូបភាពជាបុគ្គលិករបស់ធនាគារ និងគ្រឹះស្ថានហិរញ្ញវត្ថុ ក្នុងការផ្តល់សេវាហិរញ្ញវត្ថុដល់ប្រជាពលរដ្ឋ ពិសេសគឺការបង់ប្រាក់ទៅធនាគារ និងគ្រឹះស្ថានហិរញ្ញវត្ថុ តាមរយៈពួកគេ ហើយនឹងតម្រូវឱ្យបង់សេវាមុននឹងទទួលកម្ចីជាដើម។

អ្នកជំនាញក្នុងវិស័យហិរញ្ញវត្ថុបានលើកឡើងថា ក្នុងករណីដែលអាចកើតមាន ជនឆបោកបន្លំខ្លួនជាបុគ្គលិកធនាគារ និងគ្រឹះស្ថានហិរញ្ញវត្ថុ ហើយតម្រូវឱ្យអតិថិជនបង់ប្រាក់តាមរយៈគណនីរបស់ពួកគេផ្ទាល់។ ជនឆបោកមួយចំនួនបន្លំខ្លួនជាបុគ្គលិកធនាគារ ឬគ្រឹះស្ថានហិរញ្ញវត្ថុណាមួយ ហើយទាក់ទងទៅអតិថិជននៃស្ថាប័ននោះ ដោយប្រើប្រាស់មធ្យោបាយទាក់ទងទៅក្នុងរូបភាពផ្សេងៗ ដូចជាទាងក់ទងតាមទូរសព្ទ និងបណ្តាញទំនាក់ទំនង Telegram ជាដើម។

អ្នកជំនាញបានលើកបន្តថា ក្រុមឆបោកខ្លះទៀតបង្កើតហ្វេសប៊ុក ផេក (Facebook Page) ក្លែងក្លាយ ដោយអះអាងថា ឱ្យខ្ចីប្រាក់ក្នុងអត្រាការប្រាក់ទាប និងខ្ចីបានលឿនជាដើម។​ ទាំងនេះគឺមធ្យោបាយឆបោករបស់ក្រុមខិលខូចប្រើប្រាស់។

អ្នកជំនាញរូបនេះ​បានលើកឡើងជាឱទាហរណ៍ថា រូបភាពដែលក្រុមឆបោកប្រើប្រាស់មានដូចជា ៖ ជនឆបោកប្រើប្រាស់រូបភាពដើរតួនាទីជាអគ្គនាយកនៃគឹ្រះស្ថាន ឬធនាគារណាមួយ ដោយអះអាងថា នៅក្នុងឱកាសដំណាច់ឆ្នាំ ឬពិធីបុណ្យផ្សេងៗ គឺមានកម្មពិធី (Promotion) ពិសេស ឬបញ្ចុះតម្លៃពិសេសសម្រាប់អតិថិជន ដូចជា បញ្ចុះតម្លៃ ៣០% នៃទឹកប្រាក់ដែលត្រូវបង់ក្នុងឱកាសពិសេសនេះ ហើយប្រសិនបើអតិថិជនចង់បានការបញ្ចុះតម្លៃនេះ ទាល់តែអតិថិជនត្រូវបង់ទៅលេខ ឬគណនីរបស់អគ្គនាយកនោះផ្ទាល់ តាមរយៈមធ្យោបាយទូទាត់ណាមួយ។ អតិថិជនមួយចំនួន នៅពេលទទួលបានព័ត៌មា​នបែបនេះ ហើយគាត់អាចងាយយល់ច្រឡំថា អគ្គនាយករូបនោះពិតជាបញ្ចុះតម្លៃមែន ដូច្នេះអតិថិជនងាយចាញ់បោកគេ។ នៅពេលបង់ផ្ទាល់ទៅលេខ ឬគណនីធនាគាររបស់អគ្គនាយកគ្រឹះស្ថាននោះ គាត់នឹងវេរលុយទៅជនឆបោកនោះតែម្តង។

ដើម្បីជៀសផុតពីបោកបញ្ឆោតទាំងនេះ ជំនាញរូបនេះបានគូសបញ្ជាក់ថា ជាទូទៅ អតិថិជនអាចការពារខ្លួនបានពីការឆបោកទាំងនោះ ដោយត្រូវដឹងថា ធនាគារ ឬគ្រឹះស្ថានមីក្រូហិរញ្ញវត្ថុមិនមានប្រាក់រង្វាន់ ឬការបញ្ចុះតម្លៃនៃទឹកប្រាក់ដែលត្រូវបង់សងនោះទេ។ ដូច្នេះ ក្នុងករណីមានរង្វន់ អតិថិជនត្រូវមានការប្រុងប្រយ័ត្នខ្ពស់ ហើយគួរតែទាក់ទងទៅគ្រឹះស្ថានដែលខ្លួនប្រើប្រាស់កម្ចី ដើម្បីសាកសួរព័ត៌មានបញ្ជាក់ ដែលលេខទំនាក់ទំនងរបស់គ្រឹះស្ថានមាននៅលើតារាងបង់ប្រាក់ស្រាប់ ផេកហ្វេសប៊ុកផ្លូវការរបស់គ្រឹះស្ថាន និងនៅលើគេហទំព័ររបស់គ្រឹះស្ថានផ្ទាល់ជាដើម។

លោកបានបន្តថា អតិថិជនអាចការពារខ្លួនបានពីឆបោកតាមប្រព័ន្ធអនឡាញ តាមរយៈការប្រើប្រាស់ប្រាក់កម្ចីគ្រឹះស្ថានផ្សេងៗដែលទទួលបានអជ្ញាប័ណ្ណប្រកបអាជីវកម្មផ្តល់សេវាកម្មហិរញ្ញវត្ថុពីធនាគារជាតិនៃកម្ពុជា ព្រោះគ្រឹះស្ថានផ្លូវការទាំងនេះមានការផ្តល់សេវាហិរញ្ញវត្ថុប្រកបដោយទំនួលខុសត្រូវ និងច្បាសលាស់។ មួយទៀត គឺអតិថិជនត្រូវមានការប្រុងប្រយ័ត្ន ចំពោះការតម្រូវការឱ្យបង់សេវា ឬកម្រៃជើងសារ មុននឹងទទួលបានកម្ចី។ សម្រាប់ស្ថាប័នហិរញ្ញវត្ថុ ជាទូទៅគឺមិនយកកម្រៃសេវាមុនទេ ដូច្នេះក្នុងករណី គេបង់សេវាមុន ឬកម្រៃជើងសារមុន អតិថិជនអាចសួរបញ្ជាក់តាមរយៈលេខទំនាក់ទំនងរបស់ស្ថាប័ន ដែលមាននៅលើតារាងបង់ប្រាក់ថា តើមានករណីនេះដែរ ឬទេ។

ដើម្បីជៀសវាងពីការបោកបញ្ឆោតរបស់ជនខិលខូចក្លែងបន្លំជាបុគ្គលិករបស់ធនាគារ និងគ្រឹះស្ថានហិរញ្ញវត្ថុ ដែលប្រជាពលរដ្ឋបានប្រើប្រាស់សេវា លោក កាំង តុងងី អ្នកនាំពាក្យសមាគមគ្រឹះស្ថានមីក្រូហិរញ្ញវត្ថុកម្ពុជា បានលើកឡើងថា វិធីសាស្ត្រល្អ និងមានប្រសិទ្ធភាពជាងគេបំផុតគឺអតិថិជនគួរទៅបង់ប្រាក់តាមភ្នាក់ងារធនាគារ និងគ្រឹះស្ថានមីក្រូហិរញ្ញវត្ថុដែលខ្លួនបានប្រើប្រាស់សេវារបស់គេផ្ទាល់តែម្តង ឬប្រើប្រាស់លេខគណនី ឬព័ត៌មានភ្ជាប់នៅតារាងបង់ប្រាក់។

លោកបានថ្លែងបន្តថា បើមិនមានភាពចាំបាច់ទេ អតិថិជនមិនត្រូវបង់ប្រាក់តាមបុគ្គល ឬនរណាម្នាក់នោះទេ។ ប្រសិនបើគ្រឹះស្ថានដែលអតិថិជនបានប្រើប្រាស់សេវានៅក្បែរខ្លួន អតិថិជនគួរទៅបង់ដោយផ្ទាល់ ដើម្បីជៀសវាងការបោកបញ្ឆោតនានា ដែលជនខិលខូចប្រើប្រាស់។ ក្នុងករណីសង្ស័យ អតិថិជនគួរទំនាក់ទំនងលេខទូរសព្ទរបស់ស្ថាប័នផ្ទាល់ ដើម្បីសាកសួរព័ត៌មានបញ្ជាក់៕