សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កោះកុង ជាខេត្តមួយក្នុងតំបន់ឆ្នេរសមុទ្រនៃប្រទេសកម្ពុជា និងជាគោលដៅអភិវឌ្ឍន៍របស់រាជរដ្ឋាភិបាលផងដែរ ។ សក្ដានុពលនៃខេត្តមួយនេះ នឹងកាន់តែទាក់ទាញនៅពេលបច្ចុប្បន្ន និងអនាគត ស្របនឹងហេដ្ឋារចនាសម្ព័ន្ធតភ្ជាប់ទៅកាន់ខេត្តកោះកុងក៏កាន់តែរីកចម្រើនជាងបន្តបន្ទាប់ ទាំងផ្លូវគោក ផ្លូវទឹក និងផ្លូវអាកាស ។
រាជរដ្ឋាភិបាលបានចំណាយថវិការាប់រយលានដុល្លារអាមេរិកដើម្បីសាងសង់ផ្លូវទៅកាន់ខេត្តកោះកុង ក្នុងនោះផ្លូវជាតិចំនួនពីរខ្សែ បាន និងកំពុងសាងសង់ ហើយរំពឹងថានឹងចប់សព្វគ្រប់នៅពេលឆាប់ៗដ៏ខ្លីខាងមុខ ក្នុងនោះមានផ្លូវជាតិលេខ៤៨ តភ្ជាប់ពីផ្លូវជាតិលេខ៤ត្រង់ចំណុចផ្លូវបំបែកស្រែអំបិល និងផ្លូវជាតិលេខ១០តភ្ជាប់ពីខេត្តបាត់ដំបង ពោធិ៍សាត់ទៅកាន់ទីរួមខេត្តកោះកុង ។
ក្រៅពីផ្លូវជាតិទាំងពីរខ្សែនេះ ខេត្តកោះកុងក៏មានផ្លូវទឹក និងផ្លូវអាកាសដែលអាចនាំភ្ញៀវទេសចរ និងវិនិយោគិនទៅកាន់តំបន់នោះបានផងដែរ ដោយក្នុងនោះ ក្រុមហ៊ុនរបស់អ្នកឧកញ៉ា សួរ វីរៈ បានបើកដំណើរការដឹកជញ្ជូនភ្ញៀវទេសចរពីកំពង់ផែទេសចរណ៍ខេត្តកំពតទៅកាន់កោះស្ដេច ដែលជាកោះកំពុងអភិវឌ្ឍន៍មួយក្នុងខេត្តកោះកុង ហើយអាកាសយានដ្ឋានអន្តរជាតិតារាសាគរក្នុងស្រុកបុទុមសាគរ ខេត្តកោះកុងក៏បានដាក់ដំណើរការហើយដែរកាលពីចុងឆ្នាំ២០២៤ និងចាប់ផ្ដើមភ្ជាប់ជើងហោះហើរពីភ្នំពេញទៅកាន់អាកាសយានដ្ឋាននេះមួយសប្ដាហ៍មួយជើងនៅរៀងរាល់ថ្ងៃសុក្រ ។
បើតាមលោកជំទាវ មិថុនា ភូថង អភិបាលខេត្តកោះកុង បានថ្លែងប្រាប់អ្នកសារព័ត៌មាន AMS Economy កាលពីពេលថ្មីៗនេះឱ្យដឹងថា ទន្ទឹមនឹងហេដ្ឋារចនាសម្ព័ន្ធតភ្ជាប់ពីតំបន់ផ្សេងមកកាន់ខេត្តកោះកុងកាន់តែអភិវឌ្ឍន៍និងរីកចម្រើន រដ្ឋបាលខេត្តកោះកុងក៏បាននិងកំពុងជំរុញ និងលើកទឹកចិត្តដល់វិនិយោគិនក្នុងស្រុកនិងបរទេសដើម្បីបណ្ដាក់ទុនវិនិយោគ ជាពិសេសលើតំបន់រមណីយដ្ឋានទេសចរណ៍ ដូចជាសណ្ឋាគារ រីសត ផ្ទះសំណាក់ និងភោជនីយដ្ឋានជាដើម ។
លោកជំទាវបន្តថា តាមរយៈការអភិវឌ្ឍហេដ្ឋារចនាសម្ព័ន្ធ តភ្ជាប់មកកាន់ខេត្តកោះកុងនឹងអាចធ្វើឱ្យខេត្តមួយនេះ កាន់តែមានសក្ដានុពលទាក់ទាញទាំងទេសចរជាតិ និងអន្តរជាតិ និងវិនិយោគិនមកពីបរទេសបន្ថែមផងដែរ ខណៈរាជរដ្ឋាភិបាលក៏បានយកចិត្តទុកដាក់ក្នុងការអភិវឌ្ឍខេត្តតំបន់សមុទ្រក្លាយជាខេត្តទាក់ទាញមួយក្នុងប្រទេសកម្ពុជា ។
អ្នកជំនាញនៃវិស័យអចលនទ្រព្យកម្ពុជាជាច្រើនបានលើកឡើងថា តំបន់ដែលមានការតភ្ជាប់ហេដ្ឋារចនាសម្ព័ន្ធឬតំបន់ដែលមានការអភិឌ្ឍហេដ្ឋារចនាសម្ព័ន្ធច្រើន តំបន់នោះនឹងមានការទាក់ទាញ ហើយវិនិយោគិននឹងចាប់អារម្មណ៍ ទៅបណ្ដាក់ទុនវិនិយោគនៅតំបន់នោះ ជាក់ស្ដែងកន្លងមក គេឃើញថាតំបន់ណាមានការអភិវឌ្ឍផ្លូវ ទឹក ភ្លើង វិនិយោគិនក្នុងនិងក្រៅប្រទេសចូលទៅកាន់តំបន់នោះ និងបណ្ដាក់ទុនវិនិយោគនៅតំបន់នោះ ដូច្នេះហើយទើបរាជរដ្ឋាភិបាលបានអភិវឌ្ឍន៍ហេដ្ឋារចនាសម្ព័ន្ធជាច្រើននៅទូទាំងប្រទេស ៕
Account
Security
Favourite Content