បរទេស ៖ ក្រោយការប្រកាសអំពីផែនការលក់ផែសមុទ្រចំនួន២កន្លែងនៅក្នុងប្រទេសប៉ាណាម៉ាទៅឲ្យក្រុមហ៊ុនបុត្រសម្ព័ន្ធក្រុមហ៊ុនអាមេរិក BlackRock រួចមក រដ្ឋាភិបាលទីក្រុងប៉េកាំង កំពុងបញ្ចេញប្រតិកម្មយ៉ាងខ្លាំង ជាមួយនឹងការដាក់ចេញនូវបទបញ្ជាមួយចំនួនពាក់ព័ន្ធនឹងទំនាក់ទំនងពាណិជ្ជកម្មជាមួយក្រុមហ៊ុនខាងលើនេះ។

កាសែត The Bloomberg នៅថ្ងៃព្រហស្បតិ៍ម្សិលមិញនេះបានចេញផ្សាយថា ប្រទេសចិនបានដាក់ចេញនូវបទបញ្ជាឲ្យក្រុមហ៊ុនរដ្ឋទាំងឡាយត្រូវតែបញ្ឈប់រាល់ដំណើរការកិច្ចព្រមព្រៀងពាណិជ្ជកម្មទាំងអស់ដែលមានជាមួយនឹងក្រុមហ៊ុនធំៗនៅហុងកុងដែលមានទំនាក់ទំនងជាមួយនឹងមហាសេដ្ឋី លោក Li Ka Shing។

ក្រុមហ៊ុនយក្សមួយរបស់លោក Li ដែលត្រូវបានស្គាល់ឈ្មោះថា CK Hutchison ដែលជាអ្នកជំនាញលក់សេវាកម្មទូរគមនាគមន៍ត្រូវបានរដ្ឋាភិបាលចិនរកឃើញថាកំពុងព្យាយាមចុះកិច្ចព្រមព្រៀងដ៏សំខាន់មួយដែលអាចធ្វើឲ្យប៉ះពាល់ដល់នយោបាយការបរទេសរបស់ចិនជាមួយនឹងសហរដ្ឋអាមេរិក។

ក្រុមហ៊ុនដែលមានមូលដ្ឋាននៅក្នុងទីក្រុងហុងកុងមួយនេះកាលពីដើមខែមីនា បានឈានទៅដល់ការព្រមព្រៀងក្នុងការលក់ចេញរាល់អាជីវកម្មដែលពាក់ព័ន្ធទៅនឹងកំពង់ផែស្ទើរតែទាំងអស់ដែលខ្លួនគ្រប់គ្រង បូករួមទាំងផែចំនួន២ដ៏សំខាន់ស្ថិតនៅក្បែរព្រែកជីកប៉ាណាមាផង ទៅឲ្យក្រុមហ៊ុនអាមេរិកជាមួយនឹងកញ្ចប់ជាទឹកប្រាក់សុទ្ធប្រមាណជា១៩ពាន់លានដុល្លារ។

កាសែត Bloomberg ដដែលបានរាយការណ៍ថា ការណែនាំនេះត្រូវបានដាក់ចេញទៅដល់សហគ្រាសរដ្ឋទាំងឡាយតាំងតែពីសប្តាហ៍មុនមកម្ល៉េះ ពោល គឺតាមសំណើរបស់មន្ត្រីជាន់ខ្ពស់នៃរដ្ឋាភិបាលក្រុងប៉េកាំង។ អត្ថបទដដែលបានបន្ថែមថា និយតករចិនក៏កំពុងពិនិត្យមើលផងដែរនូវការវិនិយោគដែលគ្រួសារលោក Li កំពុងប្រតិបត្តិនៅក្នុងប្រទេសចិន និងនៅបរទេសក្នុងគោលបំណងដើម្បីយល់កាន់តែច្បាស់ពីទំហំនៃការធ្វើជំនួញរបស់ពួកគេ។

ភ្លាមៗក្រោយព័ត៌មាននេះចេញផ្សាយ តម្លៃភាគហ៊ុនរបស់ក្រុមហ៊ុន CK Hutchison Holdings បានកើនឡើងបន្តិចត្រឹមតែ១,២ភាគរយប៉ុណ្ណោះនៅត្រឹមថ្ងៃម្សិលមិញនេះគឺទាបជាងឆ្ងាយធៀបទៅនឹងរយៈពេលមួយថ្ងៃមុននេះដែលវាបានហក់ឡើងទៅដល់៣,៦ភាគរយ។

គួរឲ្យដឹងដែរថា មានប្រតិកម្មជាច្រើនពីសំណាក់រដ្ឋាភិបាលចិនដីគោកដោយក្នុងនោះក្នុងរយៈពេលពីរសប្តាហ៍កន្លងមកនេះ កាសែត Ta Kung Pao ដែលគាំទ្រទីក្រុងប៉េកាំងបានបោះពុម្ពផ្សាយអត្ថបទអត្ថាធិប្បាយជាបន្តបន្ទាប់ដែលរិះគន់ទៅលើកិច្ចព្រមព្រៀងនេះថា បានធ្វើឱ្យប៉ះពាល់ដល់ផលប្រយោជន៍ជាតិរបស់ប្រទេសចិន និងពណ៌នាថា វាគឺជាអំពើក្បត់ជាមួយនឹងរដ្ឋាភិបាលចិនផងដែរ។

បន្ថែមពីនេះផងដែរ ការិយាល័យកិច្ចការហុងកុង និងម៉ាកាវរបស់ចិនបានបង្ហោះឡើងវិញនូវការអត្ថាធិប្បាយមួយចំនួននៅលើគេហទំព័ររបស់ខ្លួនស្រដៀងគ្នានេះ ដែលជំរុញឱ្យមានការរំពឹងទុកថា ក្រុងប៉េកាំងអាចចាត់វិធានការដើម្បីរារាំងកិច្ចព្រមព្រៀងលក់កំពង់ផែទាំង២នេះឲ្យទាល់តែបាន៕