ភ្នំពេញ ៖ ធនាគារអភិវឌ្ឍន៍ជនបទ និងកសិកម្ម (ARDB)  បាន និងកំពុងសហការយ៉ាងសកម្មជាមួយភាគីពាក់ព័ន្ធ ដើម្បីអនុវត្តគម្រោងហិរញ្ញប្បទានអាកាសធាតុកម្ពុជា (CCFF) ដែលមានទំហំទឹកប្រាក់ប្រមាណ ១០៩ លានដុល្លារនៅឆ្នាំ២០២៥ ខណៈគម្រោងនេះមានគោលដៅបង្កើនការផ្តល់ឥណទានបៃតង កាត់បន្ថយការបំភាយឧស្ម័នផ្ទះកញ្ចក់ និងលើកកម្ពស់ភាពធន់នឹងការប្រែប្រួលអាកាសធាតុក្នុងប្រទេសកម្ពុជា ហើយក៏ចូលរួមគាំទ្រដល់របៀបវារៈអាទិភាពរបស់រាជរដ្ឋាភិបាលកម្ពុជាដែរ។

ថ្លែងក្នុងពិធីចុះហត្ថលេខាលើអនុស្សារណៈយោគយល់គ្នាមួយរវាងធនាគារ ARDB និងក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ និងគណៈកម្មាធិការជាតិជំរុញចលនាភូមិមួយផលិតផលមួយ កាលពីពេលកន្លងទៅនេះ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម  បានឱ្យដឹងថា នៅឆ្នាំ២០២២ ធនាគារ ARDB បានបង្កើតនាយកដ្ឋានហិរញ្ញប្បទានបៃតងក្នុងគោលបំណងចូលរួមកាត់បន្ថយផលប៉ះពាល់ដល់បរិស្ថាន បង្កើនភាពធន់ទៅនឹងការប្រែប្រួលអាកាសធាតុ និងជំរុញការចាប់យកបច្ចេកវិទ្យាថ្មីៗ ដែលអាចធ្វើឱ្យវិស័យកសិកម្មអាចសម្របខ្លួនបានទៅនឹងការប្រែប្រួលអាកាសធាតុ តាមរយៈការផ្តល់ទុនបង្វិល និងការគាំទ្រដល់ការវិនិយោគក្នុងខ្សែច្រវាក់តម្លៃកសិកម្ម។

ឯកឧត្តមបណ្ឌិត កៅ ថាច បានបន្តថា ទន្ទឹមនេះ មូលនិធិអាកាសធាតុបៃតង (Green Climate Fund) ហៅកាត់ថា GCF បានអនុម័តគម្រោងហិរញ្ញប្បទានអាកាសធាតុកម្ពុជា (Cambodian Climate Finance Facility– CCFF) ទំហំប្រមាណ ១០៩ លានដុល្លារ កាលពីដើមខែមីនា ឆ្នាំ២០២៤ ដែលឥណទានទំហំ ៥០ លានដុល្លារ និងជំនួយបច្ចេកទេសទំហំ ៥ លានដុល្លារនឹងត្រូវបានផ្តល់ដោយមូលនិធិ GCF ហើយហិរញ្ញប្បទានទំហំ ៥៤ លានដុល្លារទៀត នឹងត្រូវបានផ្តល់ដោយដៃគូហិរញ្ញប្បទាននានា ដែលរួមមានក្រសួងសេដ្ឋកិច្ច និងហិរញ្ញវត្ថុផងដែរ។

ឯកឧត្តមបណ្ឌិត កៅ ថាច បានបញ្ជាក់ថា គម្រោងនេះមានគោលដៅបង្កើនការផ្តល់ឥណទានបៃតង កាត់បន្ថយការបំភាយឧស្ម័នផ្ទះកញ្ចក់ និងលើកកម្ពស់ភាពធន់នឹងការប្រែប្រួលអាកាសធាតុក្នុងប្រទេសកម្ពុជា ហើយក៏ចូលរួមគាំទ្រដល់របៀបវារៈអាទិភាពរបស់រាជរដ្ឋាភិបាលកម្ពុជា ដូចដែលបានរំលេចក្នុងយុទ្ធសាស្ត្របញ្ចកោណដំណាក់កាលទី ១ ដែលមានគោលដៅចម្បងមួយ គឺដើម្បីលើកកម្ពស់ការអភិវឌ្ឍប្រកបដោយភាពធន់ ចីរភាព និងបរិយាប័ន្ន ដោយផ្តោតការយកចិត្តទុកដាក់លើការធានាចីរភាពបរិស្ថាន, ការរៀបចំខ្លួនឆ្លើយតប នឹងការប្រែប្រួលអាកាសធាតុ និងការលើកកម្ពស់សេដ្ឋកិច្ចបៃតង ខណៈដែលបច្ចុប្បន្ន ធនាគារ ARDB បាន និងកំពុងសហការយ៉ាងសកម្មជាមួយភាគីពាក់ព័ន្ធដើម្បីអនុវត្តគម្រោងនេះនៅឆ្នាំ២០២៥។

សូមបញ្ជាក់ដែរថា គិតត្រឹមខែកញ្ញា ឆ្នាំ២០២៤ ធនាគារ ARDB មានសំពៀតឥណទានសរុបចំនួនប្រមាណ ៤៣៣ លានដុល្លារអាមេរិក ក្នុងនោះសំពៀតឥណទានបៃតងសរុប ២០ លានដុល្លារអាមេរិក បានគាំទ្រដល់វិស័យស្រូវអង្ករ បន្លែសុវត្ថិភាព ប្រព័ន្ធស្រោចស្រព និងផ្ទះសំណាញ់។ ជាងនេះទៅទៀត ធនាគារ ARDB ក៏បាននិងកំពុងសហការជាមួយមូល និធិអាកាសធាតុបៃតង និងដៃគូអភិវឌ្ឍន៍ដទៃទៀត ដើម្បីផ្តល់ឥណទានបៃតងក្រោមគម្រោងហិរញ្ញប្បទានអាកាសធាតុកម្ពុជា សំដៅជំរុញអន្តរកាលឆ្ពោះទៅរកសេដ្ឋកិច្ចបៃតងផងដែរ៕