សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រុមអ្នកជំនាញេសេដ្ឋកិច្ច និងហិរញ្ញវត្ថុ បានជំរុញដល់ពលរដ្ឋខ្មែរ ចេះបង្កើតទម្លាប់សន្សំប្រាក់ជាប្រចាំ ប្រសើរជាងចំណាយទៅលើការសេពគ្រឿងស្រវឹងដែលមិនត្រឹមតែនាំឱ្យប៉ះពាល់ដល់ថវិកាគ្រួសារ និងប៉ះពាល់ដល់សុខភាពប៉ុណ្ណោះទេ ថែមទាំងនាំទៅរកភាពទន់ខ្សោយនៃសេដ្ឋកិច្ចគ្រួសារទៀតផង។
លោក ទិត្យ កំរង ស្ថាបនិកក្រុមហ៊ុន ឬទ្ធិពល និងកត់លុយ និងជាអ្នកឯកទេសហិរញ្ញវត្ថុបានមានប្រសាសន៍ថា ការបង្កើតទម្លាប់ពិសាស្រាបៀរជាប្រចាំ បានបង្កឱ្យពលរដ្ឋខាតពេលវេលា ខាតបង់ថវិកាគ្រួសារអស់ជាច្រើនជារៀងរាល់ថ្ងៃ។
លោកថា ៖
«ហូបច្រើនទៅស្រវឹងអត់បានទៅប្រកបរបរការងារ វាអត់បានចំណូលមួយ ហើយត្រូវចំណាយទៀតបើសិនឈឺ អ្នកហូបស្រាច្រើនភាគច្រើនព្រលឹមឡើងនឹងត្រូវទិញភេសជ្ជៈប៉ូវកម្លាំង គ្រឿងផ្អែមឱ្យស្វាងមកវិញវាត្រូវចាយលុយមួយតង់ទៀត» ។
នៅលើពិភពលោក គេមិនអាចហាមឃាត់ និងទប់ស្កាត់ពលរដ្ឋមិនឱ្យពិសាស្រាបៀរទាំងស្រុងនោះទេ ប៉ុន្តែពួកគាត់ត្រូវចេះពិសាដោយទទួលខុសត្រូវ ពិសានៅពេលមានការណាត់ជួប ឬពិធីជប់លៀងម្តងម្កាល។ ផ្ទុយទៅវិញ បើសិនការហូបស្រាបៀរច្រើនជាប្រចាំនោះ ប្រាកដជាប៉ះពាល់ដល់សុខភាព សេដ្ឋកិច្ចគ្រួសារ ប៉ះពាល់ដល់សង្គមជាមិនខាន។
ករណីនេះលោក ទិត្យ កំរង បញ្ជាក់បន្ថែមថា ការពិសាស្រាច្រើនបង្កឱ្យកើតមានអំពើហឹង្សា បាត់បង់ចំណូលគ្រួសារ កើតមានជំងឺដង្កាត់ និងកើតមានគ្រោះថ្នាក់ចរាចរណ៍ជាដើម ធ្វើឱ្យគ្រួសារខ្លះត្រូវបង្ខំចិត្តខ្ចីបុលអ្នកដទៃសម្រាប់ការព្យាបាលបន្ទាន់ ដែលនាំឱ្យបង្កើតបំណុលក្នុងគ្រួសារថែមទៀត។
លោកបណ្ឌិត ជ័យ តិច អ្នកស្រាវជ្រាវការអភិវឌ្ឍសង្គម-សេដ្ឋកិច្ច បានលើកឡើងដែរថា ស្ថិតក្នុងបរិបទសេដ្ឋកិច្ចដ៏លំបាកនេះ ពលរដ្ឋគួរចេះសន្សំថវិកាបម្រុងទុក ជាជាងយកប្រាក់ទៅចំណាយលើការពិសាស្រាបៀរជាប្រចាំ ដែលនាំឱ្យខាតបង់សេដ្ឋកិច្ចគ្រួសារ និងកើតជំងឺឈឺថ្កាត់ផ្សេងៗទៅថ្ងៃអនាគត។
លោកបញ្ជាក់ថា ៖
«យើងឃើញហើយបញ្ហាជំងឺមិនឆ្លងនៅកម្ពុជាកើនឡើងយ៉ាងច្រើន ជាពិសេសការញៀនស្រា ជំងឺដាច់សរសៃរឈាមខួរក្បាល ជំងឺមហារីក ជំងឺថ្លើម ជំងឺទាចទឹក និងជំងឺផ្សេងៗជាច្រើន ជាពិសេស ពលរដ្ឋនៅទីជនបទ គឺកើតឡើងយ៉ាងច្រើន។ នេះជាពេលវេលាដែលពលរដ្ឋត្រូវគិតឡើងវិញអំពីការចំណាយលុយទៅលើការទិញស្រាបៀរ ដែលមានជាតិអាល់កុល មិនអាចផ្តល់ផលចំណេញឡើយ ជាពិសេស ក្នុងស្ថានភាពសេដ្ឋកិច្ចជួបការលំបាករកប្រាក់ចំណូលនេះ ហើយគួរផ្តោតលើការសន្សំសំចៃសម្រាប់ការវិនិយោគបង្កើតមុខរបរស្វែងរកប្រាក់ចំណូលបន្ថែម ឬវិនិយោគទៅលើការសិក្សារបស់កូនវិញទើបជាការប្រសើរ» ។
យោងតាមការស្ទង់មតិរបស់ក្រសួងសុខាភិបាល មានបុរស ០៧នាក់ ក្នុងចំណោម ១០នាក់ ស្មើនឹង ៧០% សេពគ្រឿងស្រវឹង។ ក្នុងមួយខែមានបុរសប្រមាណ ១០% ពិសាគ្រឿងស្រវឹងជារៀងរាល់ថ្ងៃ ឬស្ទើរាល់ថ្ងៃ រីឯបុរស ៦០% ផ្សេងទៀតសេពគ្រឿងស្រវឹងពី ១ថ្ងៃ ទៅ៥ថ្ងៃក្នុងមួយខែ និង ១៨% សេពគ្រឿងស្រវឹងពី ០៦ ទៅ១០ថ្ងៃ និងបុរស ១២% ពិសាគ្រឿងស្រវឹងពី១១ ថ្ងៃទៅ ២៤ថ្ងៃ ក្នុងមួយខែ។
តាមការសិក្សាស្រាវជ្រាវរបស់ក្រសួងសុខាភិបាល បានឱ្យដឹងថា ក្នុង១ឆ្នាំៗ ពលរដ្ឋកម្ពុជាម្នាក់អាចចំណាយថវិកាប្រមាណជា ៤៨៦ដុល្លារ លើការទិញគ្រឿងស្រវឹង។ ដោយឡែកក្នុង១ឆ្នាំៗ មានពលរដ្ឋខ្មែរអាយុចាប់ពី ១៥ឆ្នាំឡើងទៅ ជាង ៤លាននាក់ បានចំណាយថវិកាប្រមាណ ១,៩៤៤លានដុល្លារ លើការទិញគ្រឿងស្រវឹងនេះ៕
Account
Security
Favourite Content