ឪឡឹកសាច់លឿង គឺជាដំណាំមួយប្រភេទដែលមនុស្សទូទៅនិយមចូលចិត្តទទួលទានជាបង្អែម ឬទទួលទានជាមួយបាយ ហើយបើបានផ្សំជាមួយត្រីងៀតអាំងពិតជាមានឱជារសឆ្ងាញ់ ជាពិសេសក្នុងរដូវក្ដៅតែម្ដង ខណៈដែលបច្ចុប្បន្ន ដំណាំមួយប្រភេទនេះកំពុងមានតម្រូវការទីផ្សារខ្ពស់ ទទួលបានប្រាក់ចំណេញពីការលក់ច្រើនគួរសម ខណៈដែលវិធីសាស្ត្រថែទាំ និងរយៈពេលដាំដុះត្រឹមតែប្រមាណ៣ខែប៉ុណ្ណោះ។

លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប បានប្រាប់ AMS ថា ឪឡឹកសាច់លឿងបានក្លាយជាដំណាំដែលប្រជាកសិករពេញនិយមដាំនៅខេត្តសៀមរាប ហើយថែមទាំងទទួលផលល្អទៀត ខណៈដែលតម្រូវការទីផ្សារក៏មានច្រើនផងដែរ។

លោកបញ្ជាក់ថា ៖

“បច្ចុប្បន្ននេះ ដំណាំឪឡឹកសាច់រឿង ត្រូវបានកសិករនៅក្នុងខេត្តសៀមរាប នាំគ្នាដាំយ៉ាងច្រើន ព្រោះមានតម្រូវការទីផ្សារខ្ពស់ ហើយតម្លៃក៏លក់បានថ្លៃគួរសមដែរ ដោយភាគច្រើនមានដាំនៅស្រុកក្រឡាញ់ ស្រុកបន្ទាយស្រី  ព្រះដាក់ ជីក្រែង ហើយក៏ទទួលផលបានល្អដែរ។”

លោកទា គឹមសុទ្ធ បានមានប្រសាសន៍ថា ៖

“ប្រជាពលរដ្ឋ បាននាំគ្នាដាំច្រើន ព្រោះមន្ទីរកសិកម្ម បានផ្សព្វផ្សាយឱ្យដាំដើម្បីត្រៀមសម្រាប់រដូវក្តៅ កសិករដឹងថាលក់បានថ្លែ ទើបគាត់នាំគ្នាដាំ គាត់ដាំព្រោះសំខាន់មានទីផ្សារស្រាប់។”

លោក ទួត សេងហ័ង អ្នកសម្របសម្រួលផ្នែកអភិវឌ្ឍន៍សហគ្រាស និងទីផ្សារនៃសមាគមត្រសក់ផ្អែមសៀមរាបមានជ័យ ដែលមានសមាជិក នៅខេត្តសៀមរាប ខេត្តបន្ទាយមានជ័យ និងខេត្តឧត្តរមានជ័យ បានប្រាប់ AMS ឱ្យដឹងដែរថា ការដាំដំណាំឳឡឹកសាច់លឿងរបស់កសិករដែលជាសមាជិករបស់សមាគមទទួលបានទិន្នផលល្អ ជាពិសេសដំណាំនៅក្នុងភូមិអូរទទឹង ឃុំព្រះដាក់ ស្រុកបន្ទាយស្រី ខេត្តសៀមរាប។

លោកបានបញ្ជាក់ថា មិនថាចំពោះតែផ្លែឪឡឹកសាច់លឿងទេដែលមានទីផ្សារ សម្រាប់ឪឡឹកសាច់ក្រហមក៏កសិករនៅតែដាំដែរ ព្រោះឪឡឹកក្រហមងាយស្រួលដាំ និងងាយចំណេញ។ បើសរុបទាំង ៣ ខេត្ត កសិករជាសមាជិកសមាគម ដាំឪឡឹកបានប្រមាណ១៣០០ហិកតា ដោយខេត្តបន្ទាយមានជ័យ និងខេត្តសៀមរាបមានច្រើនហិកតា ហើយក្នុង១ហិកតាកសិករអាចប្រមូលផលលក់បានចន្លោះពី ១៤-១៥ លានរៀល» ។

ដោយឡែកកសិករដែលបានអនុវត្តការដាំដុះផ្ទាល់ លោក សាត់ សែន និងភរិយា រស់នៅក្នុងភូមិអូរទទឹង ឃុំព្រះដាក់ ស្រុកបន្ទាយស្រី ខេត្តសៀមរាប បានធ្វើការដាំដុះស្របតាមបច្ចេកទេស និងស្ដង់ដារកំណត់ត្រឹមត្រូវសម្រាប់ដាក់លក់នៅតាមបណ្តាផ្សារទំនើបក្រោមកិច្ចគាំទ្រដោយគម្រោងធ្វើពាណិជ្ជកម្មសាកវប្បកម្មមានលក្ខណវៃឆ្លាតក្នុងលក្ខខណ្ឌបម្រែបម្រួលអាកាសធាតុនៅកម្ពុជា ឬហៅកាត់ថា ស៊ីស្មាត ក្រោមកម្មវិធីសម្របសម្រួលជំនួញកសិកម្មនៅកម្ពុជា(CADF) របស់អង្គការអាយឌីអ៊ី(iDE)កម្ពុជា។

លោកបានបន្តទៀតថា សម្រាប់ផ្ទៃដីដាំឪឡឹករបស់សមាគមខេត្តឧត្តរមានជ័យមានតែចំនួនជាង២០០ហិកតា ចំណែកឯខេត្តសៀមរាបមានប្រមាណ៣០០ហិកតា។ ឪឡឹកទាំងនោះ ត្រូវបានឈ្មួញខាងខេត្តកំពង់ធំ បាត់ដំបង មកទិញដឹកទៅប្រទេសវៀតណាម និងប្រទេសចិន ហើយចំពោះការដាំទៀតសោត ប្រជាកសិករដាំក្រោយពេលធ្វើការច្រូតកាត់ស្រូវរួចរាល់ ទើបភ្ជួរត្រឡប់ដីដាំឪឡឹកបន្ត ដោយក្នុងមួយឆ្នាំអាចដាំបាន២ដង៕