សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នាព្រឹកថ្ងៃទី ១៩ ខែវិច្ឆិកា ឆ្នាំ២០២៤ ក្រុមហ៊ុនអប្សរាមេឌាសឺវីស (AMS) សហការពីសមាគមធនាគារនៅកម្ពុជា សមាគមមីក្រូហិរញ្ញវត្ថុនៅកម្ពុជា និងក្រុមហ៊ុនក្រេឌីតប្យូរ៉ូខេមបូឌា (CBC) ក្រោមការគាំទ្រពីធនាគារជាតិនៃកម្ពុជា បានរៀបចំនូវកិច្ចពិភាក្សាលើក ទី២ ក្រោមប្រធានបទ «ហេតុអ្វីបានជាយុវជនគួរយល់ដឹងពីកម្ចីផ្លូវការ និងកម្ចីក្រៅផ្លូវការ?»។ កិច្ចពិភាក្សានេះ ជាផ្នែកមួយនៃកម្មវិធី «វិថីហិរញ្ញវត្ថុ» ដែលធ្វើឡើងក្នុងគោលបំណងលើកកម្ពស់ចំណេះដឹងផ្នែកហិរញ្ញវត្ថុឱ្យកាន់តែទូលំទូលាយក្នុងចំណោមប្រជាជនខ្មែរ។
ក្នុងឱកាសបើកកិច្ចពិភាក្សាខាងលើ លោកជំទាវ ឌិត នីតា ប្រធានសមាគមមីក្រូហិរញ្ញវត្ថុនៅកម្ពុជា បានមានប្រសាសន៍ថា ការលើកកម្ពស់ចំណេះដឹងហិរញ្ញវត្ថុ គឺជាកិច្ចការអាទិភាពមួយដ៏សំខាន់សម្រាប់សមាគមមីក្រូហិរញ្ញវត្ថុកម្ពុជា ដោយចំណេះដឹងហិរញ្ញវត្ថុនឹងជួយឱ្យប្រជាពលរដ្ឋធ្វើការសម្រេចចិត្តបានត្រឹមត្រូវលើផ្នែកហិរញ្ញវត្ថុ និងសេដ្ឋកិច្ចគ្រួសារ ដែលចូលរួមចំណែកយ៉ាងសំខាន់ដល់ការអភិវឌ្ឍសង្គមជាតិ។
លោកជំទាវបានបន្តមានប្រសាសន៍ទៀតថា៖
«ខ្ញុំសូមបង្ហាញត្រួសៗថា កម្ចីផ្លូវការគឺជាកម្ចីទាំងឡាយណាដែលផ្តល់ជូនដោយគ្រឹះស្ថានធនាគារ និងហិរញ្ញវត្ថុ ដែលបានចុះបញ្ជីនៅធនាគារជាតិនៃកម្ពុជា ដើម្បីផ្តល់សេវាហិរញ្ញវត្ថុស្របច្បាប់។ កម្ចីពីគ្រឹះស្ថានផ្លូវការនេះមានអត្រាការប្រាក់សមរម្យ ហានិភ័យទាប និងមានយន្តការកិច្ចការពារអតិថិជនផងដែរ។ ចំណែកឯកម្ចីក្រៅផ្លូវការ គឺជាកម្ចីទំាងឡាយណាដែលផ្តល់ដោយស្ថាប័នមិនចុះបញ្ជី (ខុសច្បាប់) ឬផ្តល់ដោយបុគ្គលនានានៅក្រៅប្រព័ន្ធ រួមទាំងកម្ចីតាមអនឡាញ»។
បន្ទាប់ពីកិច្ចពិភាក្សាដែលមានរយៈពេលជាងមួយម៉ោង លោក រ័ត្ន សោភ័ណ ប្រធានសមាគមធនាគារនៅកម្ពុជា ក៏បានមានបង្ហាញក្ដីរំពឹងខ្ពស់ថា និស្សិតនឹងបានយល់កាន់តែច្បាស់អំពីទិដ្ឋភាព និងរូបភាពនៃកម្ចីផ្លូវការ និងកម្ចីក្រៅផ្លូវការ។
លោកបានបញ្ជាក់ថា៖
« ការយល់ដឹងអំពីការផ្តល់កម្ចីផ្លូវការ និងក្រៅផ្លូវការ មិនត្រឹមតែជាការយល់ដឹងអំពីការខ្ចីលុយប៉ុណ្ណោះទេ ប៉ុន្តែវាបានបណ្តុះនូវចំណេះដឹងហិរញ្ញវត្ថុ លើកកម្ពស់ការទទួលខុសត្រូវ និងចៀសវាងការធ្លាក់ក្នុងអន្ទាក់បំណុលលើសលប់»។
គួរបញ្ជាក់ថា កិច្ចពិភាក្សាលើកទី២នេះមានការចូលរួមពី សិស្ស-និស្សិត ប្រមាណជិត ៣០០នាក់។ កិច្ចពិភាក្សានេះផងដែរអាចដំណើរការទៅបាន ដោយមានការគាំទ្រពីធនាគារជាតិនៃកម្ពុជា និងកិច្ចសហការពីសមាគមធនាគារនៅកម្ពុជា សមាគមមីក្រូហិរញ្ញវត្ថុនៅកម្ពុជា និងក្រុមហ៊ុនក្រេឌីតប្យូរ៉ូខេមបូឌា (CBC)៕
Account
Security
Favourite Content