ទឹកឃ្មុំ ជាសារធាតុរាវដែលបានពីសត្វឃ្មុំជាច្រើនជាអ្នកផលិតតាមរយៈការចំរាញ់ជាតិស្ករពីពពួកលំអងផ្កាធម្មជាតិធ្វើឱ្យវាមានរសជាតិផ្អែមមុត និងផ្ទុកនូវសារធាតុល្អៗជាច្រើនសម្រាប់សុខភាព។ ហេតុនេះ បងប្អូនគួរមានទឹកឃ្មុំនៅតាមផ្ទះ ដែលអាចប្រើជាឱសថ និងបន្ថែមទៅក្នុងរបបអាហារប្រចាំថ្ងៃ ដើម្បីទទួលបានសារធាតុល្អៗទៅក្នុងសារពាង្គកាយ។

នៅក្នុងប្រទេស ប្រភេទទឹកឃ្មុំដែលគេដឹង និងស្គាល់ជាទូទៅរួមមានទឹកឃ្មុំព្រៃដែលគេប្រមូលពីអនុផលព្រៃឈើ និងទឹកឃ្មុំចិញ្ចឹមដែលគេចិញ្ចឹមឃ្មុំ និងផ្លាស់ប្ដូរទីកន្លែងទៅតាមរដូវ តែគុណភាពទឹកឃ្មុំទាំងពីប្រភេទនេះក៏មិនខុសគ្នាអ្វីប៉ុន្មានដែរ ពោលគឺមានផ្ទុកនូវសារធាតុចិញ្ចឹមសំខាន់ៗដូចគ្នា។ អ្វីដែលខុសប្លែកគឺកំហាប់ទឹកឃ្មុំ និងពណ៌របស់ទឹកឃ្មុំដែលអាចប្រែប្រួលទៅតាមរដូវ អាកាសធាតុ និងទីតាំងដែលគេយកឃ្មុំ ឬចិញ្ចឹមឃ្មុំផងដែរ។

ជាក់ស្ដែង លោក ហេង ប៊ុនណាល់ ម្ចាស់កសិដ្ឋានចិញ្ចឹមឃ្មុំ «បារាយណ៍ហាន់នី» ជានិស្សិតបញ្ចប់ការសិក្សាលើជំនាញវិទ្យាសាស្ត្រព្រៃឈើផ្ទាល់បានប្រាប់ AMS Economy ថា​ សម្រាប់ទឹកឃ្មុំ មិនចំពោះថាប្រភេទទឹកឃ្មុំព្រៃ ឬទឹកឃ្មុំចិញ្ចឹមនោះទេ គឺមានគុណភាពប្រហាក់ប្រហែលគ្នា អាស្រ័យលើទីតាំងដែលគេយក ឬចិញ្ចឹម ក៏ដូចជាបច្ចេកទេសក្នុងការយក ហើយប្រជាពលរដ្ឋទូទៅក៏គួរតែមានទឹកឃ្មុំនៅតាមផ្ទះយ៉ាងហោចមួយដប ដែលអាចប្រើបន្ថែមទៅក្នុងរបបអាហារក៏បាន សម្រាប់ជាឱសថព្យាបាលអាការៈមួយចំនួនក៏បាន ដូចជា ជួយសម្រួលអាការពុលចំណីអាហារ រាក់មួក ឬវិលមុខ គឺអាចជួយបានមួយគ្រាដែរក្នុងលក្ខណៈជាការសង្គ្រោះបឋម។

លោកបញ្ជាក់ទៀតថា៖

«សម្រាប់ជាជម្រើសក្នុងការប្រើប្រាស់ បងប្អូនយើងអាចរើសយកទឹកឃ្មុំព្រៃ ឬទឹកឃ្មុំចិញ្ចឹមមួយណាក៏បាន ឱ្យយើងស្គាល់ពីប្រភពច្បាស់លាស់ថាគេមានបច្ចេកទេសចិញ្ចឹម ក៏ដូចជាយកឃ្មុំបានត្រឹមត្រូវ មានគុណភាព និងសុវត្ថិភាព ជាពិសេសទឹកឃ្មុំក្នុងស្រុក ចៀសវាងប៉ះចំជនទុច្ចរិតមួយចំនួនដែលយកឃ្មុំខុសបច្ចេកទេស ដោយប្រើថ្នាំបាញ់មុស ឬវិធីផ្សេងទៀតដែលអាចប៉ះពាល់ដល់គុណភាពទឹកឃ្មុំ និងប៉ះពាល់សុខភាពអ្នកប្រើប្រាស់ផ្ទាល់តែម្ដង»។

បើតាមគេហទំព័រ ស្ពាន ទឹកឃ្មុំ គឺជាអង្គធាតុរាវដែលមានរសជាតិផ្អែមផលិតដោយពពួកហ្វូងសត្វឃ្មុំដែលរសជាតិផ្អែមទាំងនោះបានមកពីទឹកដមផ្កា។ ពណ៌លឿងថ្លារបស់ទឹកឃ្មុំក៏បានមកពីធម្មជាតិដែលធ្វើឱ្យតម្លៃរបស់វាខ្ពស់ ហើយរសជាតិនៃទឹកឃ្មុំខុសគ្នាអាស្រ័យលើប្រភេទផ្កាដែលឃ្មុំក្រេបទឹកដម។ ទឹកឃ្មុំទៀតសោត មានកម្រិតស្ករម៉ូណូសាក់ការីត ហ្វុចតូស និងគ្លុយកូសខ្ពស់ ហើយវាមានផ្ទុកជាតិស្ករប្រហែលពី ៧០-៨០ ភាគរយដែលអាចផ្ដល់នូវភាពផ្អែម មានលក្ខណៈសម្បត្តិជាថ្នាំសម្លាប់មេរោគ និងបាក់តេរីផងដែរ។

តួយ៉ាង ទឹកឃ្មុំអាចផ្ដល់នូវអត្ថប្រយោជន៍ដូចជា ព្យាបាលរបួស និងរលាក កាត់បន្ថយរយៈពេលនៃជំងឺរាគ ប្រឆាំងនឹងការឆ្លងមេរោគ បន្ថយអាការផ្ដាសាយ និងក្អក ជួយបន្ថែមជាតិស្ករទៅក្នុងរបរអាហារ៕