សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រាជរដ្ឋាភិបាលនៃព្រះរាជាណាចក្រកម្ពុជា បានចំណាយថវិកាជាច្រើនក្នុងការកសាងហេដ្ឋារចនាសម្ព័ន្ធ ជាពិសេសផ្លូវថ្នល់ ដើម្បីជំរុញកំណើនសេដ្ឋកិច្ចជាតិ សម្រួលដល់ការធ្វើដំណើររបស់ពលរដ្ឋ ទាក់ទាញទេសចរ និងវិនិយោគិនបរទេសចូលមកដាក់ទុនវិនិយោគ ។ ជាលទ្ធផល ក្នុងរយៈពេលប៉ុន្មានឆ្នាំចុងក្រោយនេះ សមិទ្ធផលផ្លូវជាច្រើនខ្សែត្រូវបានសាងសង់រួចរាល់ និងបានចូលរួមចំណែកដ៏សំខាន់ក្នុងការលើកស្ទួយសេដ្ឋកិច្ចជាតិ ។
ងាកមកមើលផ្លូវជាតិលេខ២១ ដែលតភ្ជាប់ពីរង្វង់មូលក្រុងតាខ្មៅនៃខេត្តកណ្ដាល ដល់ព្រំដែនកម្ពុជាវៀតណាម ច្រកជ្រៃធំ បាន និងកំពុងក្លាយជាសរសៃឈាមសេដ្ឋកិច្ចដ៏សំខាន់រវាងកម្ពុជា-វៀតណាម ជាពិសេសលើការដឹកជញ្ជូនទំនិញផ្សេងៗឆ្លងកាត់ព្រំដែនទៅវិញទៅមករវាងប្រទេសទាំងពីរ ខណៈ ទំហំពាណិជ្ជកម្មនៃប្រទេសទាំងពីរក៏ឃើញថាមានការកើនឡើងជាលំដាប់ ។
យោងតាមក្រសួងសាធារណការ និងដឹកជញ្ជូន បានបញ្ជាក់ថា ផ្លូវជាតិលេខ២១ គឺជាខ្សែផ្លូវយុទ្ធសាស្រ្តតភ្ជាប់រាជធានីភ្នំពេញ ជាមួយបណ្តាញផ្លូវគមនាគមន៍មួយចំនួនដូចជា ផ្លូវជាតិលេខ២ (ត្រង់រង្វង់មូលក្រុងតាខ្មៅ) ផ្លូវក្រវាត់ក្រុងទី២ ផ្លូវក្រវាត់ក្រុងទី៣ ផ្លូវជាតិលេខ២១A និងផ្លូវជាតិលេខ២១B ដោយឆ្លងកាត់ក្រុងតាខ្មៅ ស្រុកស្អាង និងស្រុកកោះធំ ឆ្ពោះទៅច្រកព្រំដែនកម្ពុជា-វៀតណាម (ជ្រៃធំ-ឡុងប៊ិញ) ។
ផ្លូវជាតិលេខ២១ ជាប្រភេទផ្លូវក្រាលបេតុងផ្លូវកៅស៊ូប្រភេទAC មានប្រវែង ៦៣,៦គីឡូម៉ែត្រ ពីរង្វង់មូលក្រុងតាខ្មៅ ឆ្ពោះទៅស្ពានជ្រៃធំ (ព្រំប្រទល់កម្ពុជា-វៀតណាម) ត្រូវបានសម្ពោធបើកឱ្យប្រើប្រាស់ជាផ្លូវការ នាថ្ងៃទី២៣មីនា ឆ្នាំ២០២២ ។ ខ្សែផ្លូវនេះបាន និងកំពុងដើរតួនាទីយ៉ាងសំខាន់ ក្នុងការជួយ សម្រួលការដឹកជញ្ជូនគ្រប់ប្រភេទ ជាពិសេស ទំនិញ និងកសិផលសម្រាប់ការដោះដូរពាណិជ្ជកម្ម រវាងកម្ពុជា-វៀត ណាម ព្រមទាំង បានជំរុញ និងប្រែក្លាយតំបន់នៅតាមព្រំដែនឱ្យក្លាយជាតំបន់អភិវឌ្ឍន៍ និងរីកចម្រើន ។
តាមរយៈផ្លូវជាតិលេខ២១នេះដែរ ក៏ជាការចូលរួមចំណែកមួយក្នុងការជំរុញការធ្វើពាណិជ្ជកម្មរវាងកម្ពុជា និងវៀតណាមឱ្យបានសម្រេចក្នុងទំហំទឹកប្រាក់ ២០ពាន់លានដុល្លារអាមេរិក ហើយផ្លូវមួយខ្សែនេះនឹងក្លាយជាផ្លូវដឹកជញ្ជូនទំនិញរវាងកម្ពុជានិងវៀតណាមយ៉ាងសកម្ម ។ ក្រៅពីនេះ ការកសាងផ្លូវនានានៅទូទាំងប្រទេសនិយាយជារួម និងនិយាយដោយឡែកផ្លូវជាតិលេខ២១នេះ ក៏បានទាក់ទាញដល់ការវិនិយោគទាំងក្នុងនិងក្រៅប្រទេសបណ្ដាក់ទុនតាមបណ្ដោយផ្លូវទាំងនោះផងដែរ ជាក់ស្ដែងផ្លូវជាតិលេខ២១ក៏ឃើញថាមានក្រុមហ៊ុន រោងចក្រសហគ្រាស និងឃ្លាំងស្តុកទំនិញជាច្រើន បានបោះទីតាំងតាមបណ្ដោយផ្លូវជាតិមួយនេះ ព្រោះវាងាយស្រួលក្នុងការដឹកទំនិញចេញ និងចូល ក៏ដូចជាដឹកទៅចែកចាយតាមទីផ្សារក្នុងប្រទេស ។
គួររម្លឹកថា ពាក់ព័ន្ធនឹងវិស័យហេដ្ឋារចនាសម្ព័ន្ធនេះដែរ កម្ពុជាត្រូវការថវិកាប្រមាណ ៣៦,៦ពាន់លានដុល្លារអាមេរិក ដើម្បីអភិវឌ្ឍន៍ប្រព័ន្ធដឹកជញ្ជូន ឬគម្រោងហេដ្ឋារចនាសម្ព័ន្ធចំនួន ១៧៤គម្រោង ក្នុងរយៈពេលប្រមាណ១០ឆ្នាំខាងមុខ ។
យោងតាមច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៥ រាជរដ្ឋាភិបាលក៏គ្រោងនឹងចំណាយប្រមាណ ៥៤០លានដុល្លារអាមេរិកក្នុងឆ្នាំ២០២៥ សម្រាប់អភិវឌ្ឍន៍ហេដ្ឋារចនាសម្ព័ន្ធនៅទូទាំងប្រទេស ដោយគ្រោងនឹងសាងសង់ផ្លូវថ្មីប្រវែង ៩០០គីឡូម៉ែត្រ បន្ថែមទៀត ៕
Account
Security
Favourite Content