ទីក្រុងដាវ៉ូស, ស្វីស ៖ សាស្ត្រាចារ្យបណ្ឌិតសភាចារ្យ សុក ស៊ីផាន់ណា ទេសរដ្ឋមន្ត្រីទទួលបន្ទុកបេសកកម្មពិសេស (វិស័យពាណិជ្ជកម្ម និងសេដ្ឋកិច្ចអន្តរជាតិ) និងជាប្រធានគណៈ​កម្មាធិការ​ផ្តល់យោបល់លើគោលនយោបាយពាណិជ្ជកម្ម (គ.ផ.គ.ព.)នៅថ្ងៃទី២០ ខែមករា ឆ្នាំ២០២៦ បានជួបពិភាក្សាការងារជាមួយ ឯកឧត្តម Maninder Sidhu រដ្ឋមន្ត្រីពាណិជ្ជកម្មអន្តរជាតិនៃប្រទេសកាណាដា ក្នុងឱកាសចូលរួមវេទិកាសេដ្ឋកិច្ចពិភពលោកនៅទីក្រុងដាវ៉ូស សហព័ន្ធស្វីស។

ជំនួបនេះ បានផ្ដោតលើកិច្ចពិភាក្សាអំពីការជំរុញកិច្ចសហប្រតិបត្តិការក្នុងក្របខ័ណ្ឌនៃកិច្ចព្រមព្រៀងទូលំទូលាយ និងរីកចម្រើនសម្រាប់ភាពជាដៃគូអន្តរ-ប៉ាស៊ីហ្វិក (CP-TPP) និងវឌ្ឍនភាពនៃការត្រៀមលក្ខណៈសម្រាប់ធ្វើជាម្ចាស់ផ្ទះនៃកិច្ចប្រជុំកំពូលហ្រ្វង់កូហ្វូនីលើកទី២០ ឆ្នាំ២០២៦។ កិច្ចសហការនេះ មានគោលដៅបញ្ជាក់ពីកិច្ចខិតខំប្រឹងប្រែងរបស់កម្ពុជា ក្នុងការត្រួសត្រាយផ្លូវសម្រាប់ពាណិជ្ជកម្មសេរីជាមួយដៃគូពាណិជ្ជកម្មសំខាន់ៗ និងការពង្រឹងទំនាក់ទំនងការទូតពហុភាគីនៅលើឆាកអន្តរជាតិ។

សូមជម្រាបថា គិតចាប់ពីឆ្នាំ១៩៩២ រហូតដល់ឆ្នាំ២០២៤ កាណាដា បានផ្តល់ហិរញ្ញប្បទានឥតសំណងមកកម្ពុជាប្រមាណ ២០៧លានដុល្លារអាម៉េរិក ដោយផ្តោតលើវិស័យអប់រំ, សុខាភិបាល, កសិកម្ម, ថាមពល, សន្តិសុខស្បៀង, ការប្រយុទ្ធប្រឆាំងគ្រាប់មីន និងយុទ្ធភ័ណ្ឌមិនទាន់ផ្ទុះ, អភិបាលកិច្ច និងសមភាពយេនឌ័រ។ ដោយឡែក នៅក្នុងរយៈពេល៥ឆ្នាំចុងក្រោយនេះ ទំហំពាណិជ្ជកម្មទ្វេភាគីកម្ពុជា-កាណាដា បានកើនឡើងជាលំដាប់ ដោយក្នុងឆ្នាំ២០២៥ បានឈានដល់ជាង ១ប៊ីលានដុល្លារអាម៉េរិក កើនឡើងប្រមាណ ១៥%ធៀបនឹងឆ្នាំមុន ខណៈដែលរាជរដ្ឋាភិបាលកម្ពុជា កំពុងបន្តយកចិត្តទុកដាក់ និងជំរុញលើកទឹកចិត្តបន្ថែមទៀតដល់វិនិយោគិនកាណាដាដែលមកដាក់ទុកវិនិយោគនៅកម្ពុជា។

ដោយឡែក នៅឯកិច្ចប្រជុំប្រចាំឆ្នាំនៃវេទិកាសេដ្ឋកិច្ចពិភពលោកឆ្នាំ២០២៦នេះដែរ លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម បានចូលរួមជាវាគ្មិននៅក្នុងកិច្ចពិភាក្សាក្រោមប្រធានបទស្តីពី “New Pathways for ASEAN Growth and Productivity”​ ។

កិច្ចពិភាក្សានេះ បានជជែកអំពីការកំណត់ទិសដៅអាទិភាពក្នុងការពង្រឹងភាពប្រកួតប្រជែងរបស់អាស៊ាន និងមានភាពប្រទាក់ក្រឡាគ្នា ព្រមទាំងកិច្ចសហការរវាងរដ្ឋាភិបាល និងវិស័យឯកជន ក៏ដូចជា ភាគីពាក់ព័ន្ធនានាលើវិស័យថាមពលអន្តរកាល សេដ្ឋកិច្ចឌីជីថល ទីផ្សារហិរញ្ញវត្ថុ និងឧស្សាហូបនីយកម្ម សំដៅធ្វើឱ្យអាស៊ានក្លាយជាទិសដៅវិនិយោគរយៈពេលវែង លើកកម្ពស់ភាពធន់ និងផលិតភាពខ្ពស់ ព្រមទាំងអភិវឌ្ឍប្រកបដោយថាមវ័ន្ត និងចីរភាព។

សូមជម្រាបថា ៖ មេដឹកនាំនយោបាយកំពូលៗរាប់រយនាក់មកពីជុំវិញពិភពលោក រួមទាំងប្រមុខរដ្ឋ និងរដ្ឋាភិបាល ៦៥ប្រទេស កំពុងប្រមូលផ្តុំគ្នានៅទីក្រុង Davos ប្រទេសស្វីស សម្រាប់កិច្ចប្រជុំប្រចាំឆ្នាំរបស់វេទិកាសេដ្ឋកិច្ចពិភពលោកឆ្នាំ២០២៦ ក្រោមប្រធានបទ «ស្មារតីនៃកិច្ចសន្ទនា៖ A Spirit of Dialogue» ៕