សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ប្រាសាទអង្គរវត្តរបស់កម្ពុជាបានជាប់ចំណាត់ថ្នាក់លេខ២ ជាគោលដៅទាក់ទាញទេសចរណ៍ក្នុងចំណោមទីតាំងទេសចរណ៍ទាំង២៥ ដែលល្អបំផុតនៅអាស៊ី។ នេះបើយោងតាម TripAdvisor ជាគេហទំព័រផ្សព្វផ្សាយពីគោលដៅទេសចរណ៍ល្បីៗនៅទូទាំងពិភពលោក។
លោកជំទាវ ហ៊ុន ដានី រដ្ឋលេខាធិការ និងជាអ្នកនាំពាក្យក្រសួងទេសចរណ៍ បានប្រាប់ AMS Economy នារសៀលថ្ងៃទី៤ ខែឧសភា នេះថា ប្រាសាទអង្គរវត្តរបស់កម្ពុជា ជាប់ចំណាត់ថ្នាក់លេខ២ ជាទីតាំងដែលទាក់ទាញបំផុតនៅតំបន់អាស៊ីក្នុងឆ្នាំ២០២៦នេះ គឺពិតជាកាលានុវត្តភាពដ៏ល្អសម្រាប់កម្ពុជា ស្របពេលដែលបរិបទតំបន់ និងសកលលោកកំពុងស្ថិតក្នុងភាពប្រកួតប្រជែងខ្ពស់។
លោកជំទាវរដ្ឋលេខាធិការ បានគូសបញ្ជាក់ថា៖
«ការណ៍នេះបានបង្ហាញឱ្យឃើញពីការខិតខំប្រឹងប្រែងរបស់រាជរដ្ឋាភិបាលក្រោមការដឹកនាំប្រកបដោយគតិបណ្ឌិតរបស់សម្តេចធិបតីនាយករដ្ឋមន្ត្រី ក្នុងការអភិវឌ្ឍវិស័យទេសចរណ៍-វប្បធម៌ និងពង្រឹងភាពធន់សម្រាប់វិស័យទេសចរណ៍»។
ក្រសួងទេសចរណ៍ ក្រោមការដឹកនាំដោយផ្ទាល់របស់ឯកឧត្តមរដ្ឋមន្ត្រី ហួត ហាក់ បានរំពឹងដែរថា ការផ្តល់ចំណាត់ថ្នាក់នេះ នឹងផ្តល់ភាពអំណោយផលដល់កម្ពុជា ដូចជា៖ (១) ផលប៉ះពាល់ជាវិជ្ជមាននៃកិត្តិនាមរបស់កម្ពុជា ជាគោលដៅទេសចរណ៍សុវត្ថិភាព ផ្តល់ភាពកក់ក្តៅ (២)កំណើននៃការមកដល់របស់ភ្ញៀវទេសចរអន្តរជាតិ (៣) បង្កើតឱកាសការងារ និងប្រាក់ចំណូល និង (៤)ជំរុញចរន្តសេដ្ឋកិច្ចជាតិឱ្យរស់រវើក។
លោកបណ្ឌិត ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិក-កម្ពុជា (PATA) ប្រាប់ AMS Economy នាថ្ងៃទី៤ ខែឧសភា ដែរថា៖ មិនថាជាប់នៅក្នុងបញ្ជីរបស់ TripAdvisor ឬបណ្តាញផ្សព្វផ្សាយមួយណានោះទេ ពោលគឺឱ្យតែមាននៅក្នុងតារាងវិជ្ចមានដែលគេទទួលស្គាល់ជាសកល គឺសុទ្ធតែបង្ហាញ និងបញ្ជាក់ពីទីតាំងដ៏ផូរផង់ សុវត្ថិភាព ស្អាតស្អំ ក្នុងនាមជាតំបន់កម្សាន្តដែលគួរជាទីទុកចិត្ត និងជាគោលដៅទេសចរណ៍។
លោកបានបន្តថា៖
«កុំឱ្យតែយើងជាប់នៅក្នុងលេខមិនល្អ ដូចជា លេខ ៨០ ឬ ៩០ ឡើង អាហ្នឹងវាអត់ល្អទេ។ តែអង្គរវត្តយើងឈរក្នុងចំណាត់ថ្នាក់លេខ២ គឺមានន័យថា មានផលប្រយោជន៍សម្រាប់ប្រទេសជាតិ សម្រាប់កេរ្តិ៍ឈ្មោះរបស់យើង ពីព្រោះវេបសាយ TripAdvisor ល្បីឈ្មោះ។ ការទទួទលបានចំណាត់ថ្នាក់ល្អនេះគឺមានសារៈសំខាន់ណាស់ ព្រោះភ្ញៀវនៅក្នុងសម័យកាលនេះ មុនពេលដើរទៅណាមកណា គេតែងតែស្រាវជ្រាវ(Search) មើលថា តើគោលដៅហ្នឹងវាល្អទេ តើគេអាចទៅលេងបានអត់? »
យោងរបាយការណ៍ចុងក្រោយរបស់គ្រឹះស្ថានអង្គរសម្រាប់រយៈពេល ៤ខែដំបូង ឆ្នាំ២០២៦ (ខែមករា ដល់ខែមេសា) បានបង្ហាញថា ខ្លួនរកចំណូលបាន ១៥ ៤៩៧ ៣៣៨ ដុល្លារអាមេរិក ពីការលក់សំបុត្រចូលទស្សនារមណីយដ្ឋានអង្គរ ជូនភ្ញៀវទេសចរអន្តរជាតិចំនួន ៣២២ ០០៤ នាក់។
គួររំលឹកថា៖ កម្ពុជារកចំណូលបានជាង ៤៤លានដុល្លារ(៤៤ ៧១១ ៦៧៥ ដុល្លារ)នៅឆ្នាំ២០២៥ ពីការលក់សំបុត្រចូលទស្សនាតំបន់រមណីយដ្ឋានអង្គរទៅដល់ភ្ញៀវទេសចរអន្តរជាតិជាង ៩៥ ម៉ឺននាក់(៩៥ ៥១៣១នាក់)។ នេះបើតាមសេចក្ដីប្រកាសព័ត៌មានរបស់គ្រឹះស្ថានអង្គរកាលពីពេលកន្លងទៅថ្មីៗនេះ៕
Account
Security
Favourite Content