សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ អ្នកជំនាញមើលឃើញថា ការកើនឡើងនៃការវិនិយោគលើរោងចក្រផលិតអាហារ និងភេសជ្ជៈនៅកម្ពុជា ជាសញ្ញាណវិជ្ជមានសម្រាប់សេដ្ឋកិច្ច ខណៈការបង្កើនសមត្ថភាពផលិតក្នុងស្រុកអាចជួយបង្កើនការផ្គត់ផ្គង់ កាត់បន្ថយការពឹងផ្អែកលើទំនិញនាំចូល និងទប់ស្កាត់សម្ពាធអតិផរណាក្នុងរយៈពេលវែង។
ការវិនិយោគលើរោងចក្រផលិតអាហារ និងភេសជ្ជៈបានកើនឡើងក្នុងរយៈពេលប៉ុន្មានខែកន្លងមក ជាពិសេសក្រោយការបិទព្រំដែនគោករវាងកម្ពុជា និងថៃ ដែលបានធ្វើឱ្យការនាំចូលទំនិញមួយចំនួនប្រឈមនឹងថ្លៃដើមកាន់តែខ្ពស់។
យោងតាមរបាយការណ៍របស់វិទ្យាស្ថានជាតិស្ថិតិ នៃក្រសួងផែនការ សន្ទស្សន៍ថ្លៃទំនិញប្រើប្រាស់ក្នុងរយៈពេល៦ខែ ឆ្នាំ២០២៦ បានកើនឡើងប្រមាណ ៦,៨ភាគរយ បើធៀបនឹងរយៈពេលដូចគ្នាក្នុងឆ្នាំ២០២៥ ខណៈសន្ទស្សន៍ថ្លៃអាហារ និងភេសជ្ជៈគ្មានជាតិស្រវឹង កើនឡើង ៤,៦ភាគរយ។
ការកើនឡើងថ្លៃទំនិញមួយចំនួន ត្រូវបានអ្នកជំនាញសេដ្ឋកិច្ចពន្យល់ថា ពាក់ព័ន្ធនឹងការបិទព្រំដែនគោករវាងកម្ពុជា និងថៃ ព្រមទាំងការរឹតបន្តឹងការនាំចូលទំនិញសំខាន់ៗតាមព្រំដែនគោក។ អ្នកនាំចូលមួយចំនួនបានបង្វែរទិសដៅទៅកាន់ប្រទេសដូចជា សិង្ហបុរី ម៉ាឡេស៊ី និងឥណ្ឌូនេស៊ី ខណៈអ្នកផ្សេងទៀតបន្តនាំចូលទំនិញពីថៃតាមផ្លូវអាកាស និងផ្លូវទឹក ដែលធ្វើឱ្យថ្លៃដើមនៃការនាំចូលកើនឡើង។
លោកបណ្ឌិត ញឹល រដ្ឋា អ្នកវិភាគសេដ្ឋកិច្ច និងនយោបាយ បានមានប្រសាសន៍ថា ការវិនិយោគលើរោងចក្រផលិតអាហារ និងភេសជ្ជៈក្នុងប្រទេស គឺជាសញ្ញាណល្អសម្រាប់សេដ្ឋកិច្ច ប៉ុន្តែក្នុងរយៈពេលខ្លី វាអាចបង្កើនតម្រូវការវត្ថុធាតុដើម និងធ្វើឱ្យតម្លៃវត្ថុធាតុដើមមួយចំនួនកើនឡើង។
លោកបន្តថា នៅពេលការវិនិយោគលើរោងចក្រផលិតអាហារ និងភេសជ្ជៈកើនឡើង តម្រូវការវត្ថុធាតុដើមសម្រាប់បំពេញខ្សែច្រវាក់ផលិតកម្មក៏កើនឡើងដែរ។ ប៉ុន្តែ ក្នុងរយៈពេលវែង នៅពេលរោងចក្រទាំងនោះចាប់ផ្តើមផលិតបានពេញលេញ វានឹងអាចជួយទប់ស្កាត់អតិផរណាវិញ។
លោកបណ្ឌិតបានបន្ថែមថា នៅពេលទំនិញកាន់តែច្រើនអាចផលិតបានក្នុងស្រុក ផលិតផលក្នុងស្រុកនឹងអាចប្រកួតប្រជែងផ្នែកតម្លៃជាមួយផលិតផលនាំចូល ដែលអាចជួយឱ្យតម្លៃទំនិញជារួមធ្លាក់មកកម្រិតសមរម្យ និងជួយបន្ថយសម្ពាធអតិផរណាបានមួយកម្រិត។
ពាក់ព័ន្ធនឹងការឡើងថ្លៃទំនិញ លោកឧកញ៉ា តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា បានមានប្រសាសន៍ថា ទំនិញដែលផលិតក្នុងស្រុកមិនមានការឡើងថ្លៃទេ ទោះបីតម្រូវការកើនឡើងយ៉ាងណាក៏ដោយ។
លោកឧកញ៉ាបានបញ្ជាក់ថា តាមការចុះជួបជាមួយសហគ្រិនផលិតទំនិញក្នុងស្រុក ម្ចាស់សហគ្រាសបានបញ្ជាក់ថា ពួកគេមិនមានផែនការដំឡើងតម្លៃទំនិញដែលផលិតក្នុងស្រុកឡើយ ប៉ុន្តែនឹងផ្តោតលើការពង្រឹងគុណភាព ដើម្បីប្រកួតប្រជែងជាមួយផលិតផលនាំចូល។
លោកឧកញ៉ាបានឱ្យដឹងថា ក្នុងឆ្នាំ២០២៦ កំណើនរោងចក្រ និងសហគ្រាសផលិតអាហារ និងភេសជ្ជៈនៅកម្ពុជាមានកម្រិតខ្ពស់ ហើយការវិនិយោគទាំងនេះបានចូលរួមចំណែកដល់សេដ្ឋកិច្ច តាមរយៈការបង្កើតការងារ បង្កើនប្រាក់ចំណូលរបស់ប្រជាពលរដ្ឋ និងបង្កើនសមត្ថភាពផ្គត់ផ្គង់ទំនិញក្នុងស្រុកក្នុងតម្លៃសមរម្យ និងអាចប្រកួតប្រជែងជាមួយផលិតផលបរទេស។
លោកឧកញ៉ាក៏បានអំពាវនាវឱ្យប្រជាពលរដ្ឋបន្តគាំទ្រ និងប្រើប្រាស់ផលិតផលក្នុងស្រុក ខណៈវិនិយោគិន និងសហគ្រិនក្នុងស្រុកកំពុងបង្កើនការផលិតទំនិញប្រើប្រាស់ក្នុងប្រទេស។ លោកក៏ស្នើដល់អាជ្ញាធរ និងសមត្ថកិច្ចពាក់ព័ន្ធតាមបណ្តោយព្រំដែន បង្កើនការទប់ស្កាត់ការហូរចូលទំនិញបរទេសខុសច្បាប់។
ជាមួយគ្នានេះ អ្នកឧកញ៉ា លាង ម៉េង សហស្ថាបនិក និងជាប្រធានក្រុមហ៊ុន ជីប ម៉ុង គ្រុប បានមានប្រសាសន៍ថា ការវិនិយោគលើរោងចក្រដែលប្រើប្រាស់បច្ចេកវិទ្យាទំនើប នឹងជួយកាត់បន្ថយថ្លៃដើមផលិតកម្ម ដែលអាចធ្វើឱ្យផលិតផលចេញលក់លើទីផ្សារមានតម្លៃទាប និងអាចប្រកួតប្រជែងជាមួយផលិតផលនាំចូលបាន។
អ្នកឧកញ៉ាបានផ្តាំផ្ញើដល់វិនិយោគិន និងសហគ្រិនដទៃទៀតថា មុនពេលវិនិយោគផលិតផលណាមួយ ត្រូវសិក្សាលម្អិតពីតម្រូវការទីផ្សារ និងផ្តោតលើការផលិតទំនិញដែលមានគុណភាព និងថ្លៃដើមទាប ដើម្បីសម្រួលដល់អ្នកប្រើប្រាស់ក្នុងស្រុក។
ជាក់ស្តែង ក្រុមហ៊ុន ជីប ម៉ុង បានរៀបចំពិធីក្រុងពាលីបញ្ចុះបឋមសិលា និងបើកការដ្ឋានសាងសង់រោងចក្រផលិតអាហារ និងភេសជ្ជៈ ជីប ម៉ុង (Chip Mong Food & Beverages) លើផ្ទៃដី ១៥ហិកតា នៅខណ្ឌដង្កោ រាជធានីភ្នំពេញ កាលពីព្រឹកថ្ងៃទី១ ខែសីហា ឆ្នាំ២០២៦។
រោងចក្រនេះ គ្រោងបោះទុនវិនិយោគប្រមាណ ២៥០លានដុល្លារអាម៉េរិក ដោយផលិតផលរួមមាន ទឹកដោះគោ មី និងតែ និងមានកិច្ចសហការជាមួយក្រុមហ៊ុនបច្ចេកវិទ្យាលំដាប់ពិភពលោកមកពីប្រទេសអាល្លឺម៉ង់ និងបារាំង។
ការវិនិយោគនេះ ត្រូវបានកំណត់ជាការវិនិយោគរយៈពេលវែង ដើម្បីពង្រឹងសមត្ថភាពផលិតក្នុងស្រុក បង្កើនតម្លៃបន្ថែមលើវត្ថុធាតុដើមកម្ពុជា និងចូលរួមជំរុញវិស័យផលិតកម្ម ដែលជាមូលដ្ឋានសម្រាប់ការកសាងសេដ្ឋកិច្ចជាតិប្រកបដោយភាពរឹងមាំ និងចីរភាព។
រោងចក្រថ្មីនេះក៏ជាផ្នែកមួយនៃការវិវឌ្ឍន៍របស់ម៉ាកដែលប្រជាជនកម្ពុជាស្គាល់អស់រយៈពេលជាង ១៦ឆ្នាំមកហើយ ដោយ “ខ្មែរ ប៊ែវើរីជីស” នឹងបន្តដំណើរការក្រោមឈ្មោះថ្មី “Chip Mong Food & Beverages”។
ការកើនឡើងនៃការវិនិយោគក្នុងវិស័យផលិតកម្មអាហារ និងភេសជ្ជៈ ត្រូវបានរំពឹងថា នឹងជួយបង្កើនការផ្គត់ផ្គង់ផលិតផលក្នុងស្រុក កាត់បន្ថយការពឹងផ្អែកលើការនាំចូល និងបង្កើនការប្រកួតប្រជែងផ្នែកតម្លៃ ដែលអាចរួមចំណែកកាត់បន្ថយសម្ពាធអតិផរណាក្នុងរយៈពេលវែង៕
Account
Security
Favourite Content