សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បច្ចុប្បន្ន ប្រភេទប៉េងប៉ោះឈើរី ដែលជាពូជដំណាំនាំចូលពីត្រូវបាន និងកំពុងមានប្រជាប្រិយភាពនៅលើទីផ្សារ ទាំងផ្សារទំនើប និងផ្សារប្រពៃណី ខណៈដែលតម្លៃក៏ទទួលបានថ្លៃគួរសម។ ដោយសារទំនោរ និងមានតម្រូវការពីទីផ្សារច្រើន បានជំរុញឱ្យកសិករមួយចំនួនងាកមកដាំដុះប្រភេទប៉េងប៉ោះឈើរី ត្បិតថាបច្ចេកទេសដាំដុះក៏មិនសូវខុសគ្នាពីការដំណាំប៉េងប៉ោះខ្មែរនោះដែរ។
ជាលក្ខណៈទូទៅរបស់ពូជប៉េងប៉ោះឈើរី គឺមានផ្លែតូចៗជាងផ្លែប៉េងប៉ោះខ្មែរ ប៉ុន្តែប្រើរយៈពេលដាំដុះតិចជាងការដាំប៉េងប៉ោះខ្មែរ ជាពិសេស វាមានតម្លៃល្អនៅលើទីផ្សារ ដោយគេអាចលក់បានក្នុងតម្លៃ ៧០០០-៨០០០រៀលក្នុងមួយគីឡូក្រាម ឬគេយកលក់បន្តដល់ ១ម៉ឺនរៀលក៏មាន ដែលអាចលក់បានទាំងនៅតាមផ្សារធម្មតា ឬផ្សារប្រពៃណី និងនៅតាមផ្សារទំនើបផងដែរ។ ដោយឡែក ចំពោះបច្ចេកទេសនៃការដាំដុះក៏មិនខុសពីពូជប៉េងប៉ោះផ្សេងទៀតនោះដែរ ដោយជំហានដំបូងក្នុងការដាំដុះគឺការជ្រើរើសពូជ ដែលគេអាចរកទិញពូជបាននៅតាមទីផ្សារ ឬកន្លែងលក់គ្រាប់ពូជដំណាំ ហើយពេលវេលាដាំដុះ ដែលសមស្របគឺនៅចន្លោះខែវិច្ឆិកា ដល់ខែកុម្ភៈ។
ពាក់ព័ន្ធនឹងការបណ្ដុះកូន មុនពេលសាបគ្រាប់ប៉េងប៉ោះ កសិករត្រូវភ្ជួរដីហាលចោលកំឡុងពេល ១-២សប្ដាហ៍ ដើម្បីឱ្យស្មៅងាប់ និងដីផុសល្អ បន្ទាប់មកយកជីលាមកសត្វ ឬជីកំប៉ុស្ត ទៅលាយជាមួយដីឱ្យសព្វល្អ រួចសាបគ្រាប់ពីលើ។ លុះដល់ប៉េងប៉ោះដុះបានរយៈពេល ១៥-២០ថ្ងៃ គេអាចយកកូនប៉េងប៉ោះទៅដាំនៅរងបានហើយ។
ចំណែកការដាំទៀតសោត ដើម្បីឱ្យប៉េងប៉ោះលូតលាស់បានល្អ កសិករត្រូវភ្ជូរបំបែកដី ២-៣ដងឱ្យរាបស្មើ រួចលើករងសម្រាប់ដាំគម្លាត ៣០សង់ទីម៉ែត្រពីគ្នា និងកម្ពស់ដីរង ៣០សង់ទីម៉ែត្រ រួចបន្ថែមជីលាមកសត្វនៅតាមរណ្ដៅដែលត្រូវដាំ។ បន្ទាប់ពីដាំហើយ គេត្រូវការថែទាំដូចដាំដំណាំទូទៅដែរ ដូចជា ស្រោចទឹកឱ្យបានគ្រប់គ្រាន់ ឧស្សាហ៍ជ្រោយដី ដកស្មៅ និងបន្ថែមជីកំប៉ុស្ត ក៏ដូចជាថ្នាំការពារសត្វល្អិតផ្សេងទៀត ដើម្បីចៀសវាងការបំផ្លាញពីសត្វចង្រៃ។ ក្រោយការដាំដុះបានប្រមាណ ៣០-៤០ថ្ងៃ ដំណាំប៉េងប៉ោះឈើរី អាចនឹងហ៊ុចផលជាបណ្តើរៗ រហូតដល់ដើមមានសភាពចាស់ ជ្រុះស្លឹកអស់ទើបលែងមានផល។
គួរបញ្ជាក់ផងដែរថា ប៉េងប៉ោះ គឺជាបន្លែមួយប្រភេទដែលមនុស្សភាគច្រើន និយមយកធ្វើជាម្ហូបអាហារជារៀងរាល់ថ្ងៃ ហើយអ្នកខ្លះជ្រើសយកប៉េងប៉ោះពណ៌ក្រហម ឬហៅថាទុំ រីឯអ្នកខ្លះទៀតជ្រើសយកប៉េងប៉ោះពណ៌បៃតង ឬហៅថា ប៉េងប៉ោះខ្ចី មកមទទួលទាន។
ខាងក្រោមនេះ គឺជាអត្ថប្រយោជន៍របស់ប៉េងប៉ោះម្រាប់សុខភាពរាងកាយ ៖
ជួយទប់ស្កាត់រ៉ាឌីកាល់សេរី ៖ ប៉េងប៉ោះមានផ្ទុក វីតាមីន A ដែលអាចប្រឆាំងនឹងរ៉ាឌីកាល់សេរីបាន ហើយរ៉ាឌីកាល់សេរីអាចត្រូវបានផលិតចេញពីកាំរស្មីយូវីនៃព្រះអាទិត្យ ក៏ដូចជាឧបករណ៍អេឡិចត្រូនិកដែលមានជាតិវិទ្យុសកម្ម។
ការពារជំងឺមហារីក ៖ វីតាមីន A និង វីតាមីន C ដែលមានប្រភពមកពីប៉េងប៉ោះអាចជួយពង្រឹងអង្គបដិបក្ខក្នុងរាងកាយ ដើម្បីប្រឆាំងនឹងកោសិកាមហារីក។ ម្យ៉ាងវិញទៀត ប៉េងប៉ោះក៏មានផ្ទុកនូវវីតាមីន K និង វីតាមីន B6 ដែលអាចការពារការចាប់ផ្តើមនៃកោសិកាមហារីក ហើយធ្វើឱ្យប្រសើរឡើង នូវប្រព័ន្ធភាពស៊ាំរបស់រាងកាយ ដើម្បីការពារការបញ្ចូលបាក់តេរីអាក្រក់នៅក្នុងខ្លួន។
ជួយគ្រប់គ្រងកូឡេស្តេរ៉ុល ៖ ប៉េងប៉ោះត្រូវបានគេដឹងថា វាមិនមានផ្ទុកនូវកូលេស្តេរ៉ុលនោះទេ ប៉ុន្តែមានផ្ទុកនូវអាស៊ីតខ្លាញ់ និង វីតាមីន B3 ដែលអាចជួយកាត់បន្ថយកូលេស្តេរ៉ុលអាក្រក់ រួមជាមួយនឹងការចងភ្ចាប់កូលេស្តេរ៉ុលក្នុងពោះវៀនផងដែរ៕
Account
Security
Favourite Content