សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ទោះបីទំហំពាណិជ្ជកម្មរវាងកម្ពុជា និងប៉ូឡូញនៅមានកម្រិតតូច និងមិនទាន់មានគម្រោងរៀបចំកិច្ចព្រមព្រៀងពាណិជ្ជកម្មទ្វេភាគីដាច់ដោយឡែកក៏ដោយ ក៏ប្រទេសទាំងពីរនៅតែមើលឃើញសក្ដានុពលក្នុងការពង្រីកកិច្ចសហប្រតិបត្តិការសេដ្ឋកិច្ច ជាពិសេសលើវិស័យវិនិយោគ និងទេសចរណ៍ តាមរយៈការជំរុញការតភ្ជាប់ជើងហោះហើរត្រង់មកកាន់ខេត្តព្រះសីហនុ។
លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម បានបញ្ជាក់ថា បច្ចុប្បន្ន កម្ពុជាមិនទាន់មានគម្រោងរៀបចំកិច្ចព្រមព្រៀងទ្វេភាគីដាច់ដោយឡែកជាមួយប្រទេសប៉ូឡូញនៅឡើយទេ ដោយគំនិតផ្ដួចផ្ដើម និងកិច្ចសហប្រតិបត្តិការផ្នែកពាណិជ្ជកម្មត្រូវបានអនុវត្តរួមគ្នាក្រោមក្របខ័ណ្ឌសហភាពអឺរ៉ុប។
លោកបានពន្យល់ថា ទំនិញនាំចូលទៅកាន់ទីផ្សារសហភាពអឺរ៉ុបទទួលបានការអនុគ្រោះពន្ធរួមគ្នានៅគ្រប់ប្រទេសជាសមាជិក រួមទាំងប្រទេសប៉ូឡូញផងដែរ។ ដូច្នេះ ការជំរុញការផ្សព្វផ្សាយពាណិជ្ជកម្ម និងការកសាងទំនាក់ទំនងជាមួយអ្នកវិនិយោគ ត្រូវបានធ្វើឡើងក្នុងកម្រិតតំបន់អឺរ៉ុប ជាជាងការរៀបចំបេសកកម្មដាច់ដោយឡែកទៅកាន់ប្រទេសនីមួយៗ។
អ្នកនាំពាក្យរូបនេះបានបន្ថែមថា កម្ពុជាមានសកម្មភាពធ្វើពាណិជ្ជកម្មជាមួយប្រទេសប៉ូឡូញមួយចំនួន ប៉ុន្តែទំហំសរុបនៅមានកម្រិតតូចនៅឡើយ ដោយមិនបានបញ្ជាក់តួលេខជាក់លាក់នោះទេ។ ទោះជាយ៉ាងណា កម្ពុជាតែងតែស្វាគមន៍ការភ្ជាប់ទំនាក់ទំនងជាមួយប្រទេសនានា ដើម្បីបង្កើតឱកាសពាណិជ្ជកម្ម និងពង្រីកទីផ្សារសម្រាប់ផលិតផលកម្ពុជា។
ទោះជាពាណិជ្ជកម្មនៅមានទំហំតូចក៏ដោយ កិច្ចខិតខំប្រឹងប្រែងរបស់រដ្ឋបាលខេត្តព្រះសីហនុក្នុងការទាក់ទាញអ្នកវិនិយោគ និងពង្រីកទីផ្សារទេសចរណ៍ពីប្រទេសប៉ូឡូញ កំពុងបង្ហាញពីឱកាសថ្មីសម្រាប់កិច្ចសហប្រតិបត្តិការរវាងភាគីទាំងពីរ។
ជាក់ស្ដែង កាលពីដើមខែវិច្ឆិកា ឆ្នាំ២០២៦ ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ បានដឹកនាំគណៈប្រតិភូខេត្តទៅបំពេញទស្សនកិច្ចនៅប្រទេសប៉ូឡូញ ដើម្បីពង្រឹងកិច្ចសហប្រតិបត្តិការលើវិស័យវិនិយោគ និងពាណិជ្ជកម្ម។
ថ្លែងប្រាប់ AMS នាពេលថ្មីៗនេះ លោក ឡុង ឌីម៉ង់ អភិបាលរងនៃគណៈអភិបាលខេត្តព្រះសីហនុ បានឱ្យដឹងថា ដំណើរទស្សនកិច្ចនេះផ្ដោតលើប្រទេសចំនួន៣ ក្នុងនោះមានប្រទេសប៉ូឡូញផងដែរ។ គោលបំណងសំខាន់មួយនៃដំណើរទស្សនកិច្ចនេះ គឺការស្វែងរកឱកាសពង្រីកការតភ្ជាប់ទេសចរណ៍ ខណៈនៅខែធ្នូ ឆ្នាំ២០២៦ នឹងមានជើងហោះហើរពិសេសប្រភេទ Charter Flight ត្រង់ពីទីក្រុងប្រាក ប្រទេសឆែក មកកាន់ខេត្តព្រះសីហនុ រហូតដល់ខែមេសា ឆ្នាំ២០២៧។
លោកបានចាត់ទុកការតភ្ជាប់ជើងហោះហើរពីប្រទេសឆែកនេះថា ជាសមិទ្ធផលមួយដែលអាចយកធ្វើជាគំរូសម្រាប់ការទាក់ទាញភ្ញៀវទេសចរពីប្រទេសប៉ូឡូញផងដែរ។ ជាមួយគ្នានេះ លោកបានបញ្ជាក់ថា អ្នកវិនិយោគជនជាតិប៉ូឡូញកាន់តែច្រើនឡើងកំពុងចាប់អារម្មណ៍បោះទុនលើវិស័យបដិសណ្ឋារកិច្ចនៅតំបន់កោះរ៉ុង និងកោះរ៉ុងសន្លឹម ក្នុងខេត្តព្រះសីហនុ។
លោក ឡុង ឌីម៉ង់ បានលើកឡើងថា គោលបំណងនៃការចូលរួមបេសកកម្មទៅកាន់ប្រទេសប៉ូឡូញ គឺដើម្បីបង្កើតទំនាក់ទំនងផ្ទាល់ជាមួយដៃគូប៉ូឡូញ ក្នុងការរៀបចំកញ្ចប់ទេសចរណ៍តាមគំរូដែលបានអនុវត្តជាមួយប្រទេសឆែក ព្រមទាំងផ្សព្វផ្សាយពីសក្ដានុពលទេសចរណ៍ និងវិនិយោគរបស់ខេត្តព្រះសីហនុ។
លោកបានបញ្ជាក់ថា រដ្ឋបាលខេត្តបានត្រៀមខ្លួនជាស្រេចក្នុងការសម្របសម្រួលដល់ប្រតិបត្តិការរបស់ក្រុមហ៊ុនទេសចរណ៍ និងអ្នកវិនិយោគ ដើម្បីជំរុញការរីកចម្រើននៃវិស័យទេសចរណ៍។
ក្នុងដំណើរទស្សនកិច្ចនៅទីក្រុង Warsaw គណៈប្រតិភូខេត្តព្រះសីហនុបានជួបពិភាក្សាជាមួយអ្នកវិនិយោគ និងទីភ្នាក់ងារជាតិផ្នែកពាណិជ្ជកម្ម និងវិនិយោគរបស់ប្រទេសប៉ូឡូញ ដើម្បីបង្ហាញពីសក្ដានុពលវិនិយោគ និងជំរុញកិច្ចសហការរវាងវិស័យឯកជន និងវិស័យទេសចរណ៍។
ក្រៅពីនេះ គណៈប្រតិភូក៏បានជួបជាមួយក្រុមហ៊ុន Itaka ដែលជាក្រុមហ៊ុនទេសចរណ៍ខ្នាតធំមួយរបស់ប្រទេសប៉ូឡូញ។ ក្រុមហ៊ុននេះបានបង្ហាញចំណាប់អារម្មណ៍ក្នុងការរៀបចំឯកសារ និងកញ្ចប់ទេសចរណ៍មកកាន់កម្ពុជា ស្រដៀងនឹងគំរូដែលបានអនុវត្តជាមួយប្រទេសឆែក សម្រាប់ឆ្នាំ២០២៧។
លោក ឡុង ឌីម៉ង់ បានឱ្យដឹងថា ការសម្រេចចិត្តចុងក្រោយរបស់ក្រុមហ៊ុន Itaka ពាក់ព័ន្ធនឹងការរៀបចំកញ្ចប់ទេសចរណ៍ និងការតភ្ជាប់ជើងហោះហើរត្រង់មកកាន់ខេត្តព្រះសីហនុ ត្រូវបានរំពឹងថានឹងមានភាពច្បាស់លាស់នៅក្នុងខែកុម្ភៈ ឆ្នាំ២០២៧។
លោកបន្តថា ក្រុមការងារបានខិតខំទាក់ទាញ និងស្នើឱ្យក្រុមហ៊ុននេះរៀបចំកញ្ចប់ទស្សនកិច្ចមកកាន់កម្ពុជា ដោយលោកមើលឃើញថា មានលទ្ធភាពខ្ពស់ដែលក្រុមហ៊ុននឹងសម្រេចចិត្តនាំភ្ញៀវទេសចរមកកាន់ប្រទេសកម្ពុជា។ ប្រសិនបើគម្រោងនេះសម្រេចបាន វានឹងក្លាយជាជំហានសំខាន់មួយក្នុងការបើកទីផ្សារទេសចរណ៍ថ្មី តាមរយៈការតភ្ជាប់ជើងហោះហើរត្រង់ពីប្រទេសប៉ូឡូញមកកាន់ខេត្តព្រះសីហនុ។
ពាក់ព័ន្ធនឹងវត្តមានអ្នកវិនិយោគប៉ូឡូញនៅក្នុងខេត្តព្រះសីហនុ លោកបានបញ្ជាក់ថា ភាគច្រើនផ្ដោតលើតំបន់កោះរ៉ុង និងកោះរ៉ុងសន្លឹម។ ក្នុងនោះ អ្នកវិនិយោគស្នូលប្រមាណ ៤ ទៅ ៥ នាក់ ឬក្រុមហ៊ុន កំពុងបណ្ដាក់ទុនលើវិស័យបដិសណ្ឋារកិច្ច សណ្ឋាគារ រីសត និងអចលនទ្រព្យ។
ដោយឡែក លោកបណ្ឌិត ជ័យ តិច អ្នកវិភាគសង្គម និងសេដ្ឋកិច្ច បានមើលឃើញថា ទោះបីទំនាក់ទំនងពាណិជ្ជកម្មរវាងកម្ពុជា និងប៉ូឡូញនៅមានកម្រិតក៏ដោយ ក៏ប្រទេសទាំងពីរមានសក្ដានុពលជាច្រើនសម្រាប់ពង្រីកកិច្ចសហប្រតិបត្តិការសេដ្ឋកិច្ចនាពេលអនាគត។
លោកយល់ថា កម្ពុជាអាចដើរតួនាទីជាច្រកចូលមួយសម្រាប់ប្រទេសប៉ូឡូញក្នុងការពង្រីកទំនាក់ទំនងជាមួយតំបន់អាស៊ាន ខណៈប៉ូឡូញក៏អាចជាចំណុចតភ្ជាប់សម្រាប់កម្ពុជាក្នុងការពង្រីកទីផ្សារទៅកាន់តំបន់អឺរ៉ុបខាងកើតផងដែរ។
លោកបណ្ឌិត ជ័យ តិច បានលើកឡើងថា ដើម្បីពង្រីកការដោះដូរពាណិជ្ជកម្ម ប្រទេសទាំងពីរគួរពិនិត្យលើសក្ដានុពលនៃផលិតផល និងឧស្សាហកម្មដែលអាចបំពេញតម្រូវការទីផ្សាររបស់គ្នាទៅវិញទៅមក ដូចជា សម្លៀកបំពាក់ ស្បែកជើង ផលិតផលកសិកម្ម និងផលិតផលកែច្នៃផ្សេងៗ។
បន្ថែមពីនេះ លោកបានស្នើឱ្យប្រទេសទាំងពីរពិចារណាបង្កើតបណ្ដាញអាជីវកម្មរួមគ្នា ឬឈានទៅបង្កើតការិយាល័យតំណាងពាណិជ្ជកម្ម ដើម្បីជួយសម្របសម្រួលទំនាក់ទំនង និងការផ្គូផ្គងដៃគូអាជីវកម្ម។ ភាគីទាំងពីរក៏គួរពិចារណាលើឱកាសវិនិយោគក្នុងបច្ចេកវិទ្យាកសិកម្ម ការវេចខ្ចប់ ឡូជីស្ទិក និងថាមពលកកើតឡើងវិញផងដែរ។
ជាពិសេស លោកបានលើកឡើងពីសក្ដានុពលរបស់ប្រទេសប៉ូឡូញក្នុងការផលិតគ្រឿងយន្តកសិកម្ម ដូចជា ត្រាក់ទ័រ និងគោយន្ត ដែលអាចជាឱកាសសម្រាប់កម្ពុជាក្នុងការស្វែងរកប្រភពផ្គត់ផ្គង់ថ្មី ជំនួសការពឹងផ្អែកលើការផ្គត់ផ្គង់ពីប្រទេសថៃ។ ដូច្នេះ ការជំរុញការវិនិយោគ និងកិច្ចសហប្រតិបត្តិការលើវិស័យគ្រឿងយន្តកសិកម្ម អាចជាផ្នែកមួយនៃការពង្រីកទំនាក់ទំនងសេដ្ឋកិច្ចរវាងប្រទេសទាំងពីរនាពេលខាងមុខ៕
Account
Security
Favourite Content