សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កាលពីថ្ងៃដើមសប្ដាហ៍នេះ ក្រុមហ៊ុន រ៉ូយ៉ាល់ គ្រុប ត្រាស់ធី ឯ.ក បានដាក់ឲ្យដំណើរថ្នាលជួញដូរ Royal Group Exchange «RGX» ជាវេទិកាជួញដូរមូលបត្រឌីជីថលដំបូងគេដោយប្រើប្រាស់បច្ចេកវិទ្យាប្លុកឆេន និងដែលត្រូវបានផ្តល់ការអនុញ្ញាតពីនិយ័តករមូលបត្រកម្ពុជា (SERC)។
បើតាមអ្នកឧកញ៉ា គិត ម៉េង អគ្គនាយកក្រុមហ៊ុន រ៉ូយ៉ាល់ គ្រុប បានឱ្យដឹងថា ការបើកដំណើរការវេទិកាជួញដូរ RGX នៅក្នុងបទប្បញ្ញត្តិ FinTech លើវិស័យមូលបត្រ គឺជាសក្ខីភាពមួយចំពោះភាពជឿនលឿននៃបច្ចេកវិទ្យាហិរញ្ញវត្ថុ (FinTech) ក្នុងវិស័យមូលបត្រកម្ពុជា ។
ក្នុងនោះផងដែរ អ្នកឧកញ៉ា គិត ម៉េង អគ្គនាយកក្រុមហ៊ុន រ៉ូយ៉ាល់ គ្រុប បានមានប្រសាសន៍ថា៖
«សម្រាប់ក្រុមហ៊ុនរ៉ូយ៉ាល់គ្រុប ថ្នាល RGX មិនត្រឹមតែជាវេទិកាពាណិជ្ជកម្មប៉ុណ្ណោះទេ វាគឺជាសក្ខីភាពមួយចំពោះការប្តេជ្ញាចិត្តរបស់យើងចំពោះការបង្កើតថ្មី វឌ្ឍនភាព និងអនាគតសម្រាប់យុវជនកម្ពុជា»។
អ្នកឧកញ៉ាបានបន្តគូសបញ្ជាក់ទៀតថា៖
« នេះជាព្រឹត្តិការណ៍ដ៏សំខាន់មួយសម្រាប់ទិដ្ឋភាពហិរញ្ញវត្ថុរបស់ប្រទេសនេះ ខណៈដែលយើងណែនាំថ្នាលដែលបើកទ្វារសម្រាប់ប្រទេសនេះ ដើម្បីឈានចូលយុគសម័យថ្មីនៃសេរីភាព និងឱកាសហិរញ្ញវត្ថុ»។
ជាមួយនឹងការទទួលស្គាល់ជាផ្លូវការ និងក្រោមគម្រោង Securities Digital Sandbox ដោយមានការយល់ព្រមពី SERC ដូច្នេះ RGX បានផ្តល់នូវបរិយាកាស សុវត្ថិភាពសម្រាប់បុគ្គល និងអាជីវកម្ម មកពីជុំវិញពិភពលោក ក្នុងការទិញ លក់ និងជួញដូរ ទ្រព្យសម្បត្តិផ្សេងៗ។ នេះបើតាមការបញ្ជាក់បន្ថែមរបស់អ្នកឧកញ៉ា។
ជាមួយគ្នានេះ ឯកឧត្តម ស៊ូ សុជាតិ ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃនិយ័តករមូលបត្រ កម្ពុជា បានបញ្ជាក់ផងដែរថា នេះគឺជាជំហានដ៏ធំថ្មីមួយទៀតដែលកម្ពុជាបានឈានទៅមុខ ហើយក៏ជាសក្ខីភាពនៃការខិតខំប្រឹងប្រែងរបស់និយ័តករមូលបត្រកម្ពុជាក្នុងការជំរុញនវានុវត្តន៍ ធានានូវសុចរិតភាពទីផ្សារ និងការការពារវិនិយោគិន ព្រមទាំងការចូលរួមយ៉ាងសកម្មពីគ្រប់ភាគីចូលរួមទាំងអស់។
គួរបញ្ជាក់ថា បច្ចេកវិទ្យាប្លុកឆេនត្រូវបានមជ្ឈដ្ឋានទូទាំងពិភពលោកចាត់ទុកថាជាបច្ចេកវិទ្យាថ្មីមួយ ដែលអាចជួយបង្កើននូវប្រសិទ្ធិភាព សុវត្ថិភាព និងតម្លាភាពនៃប្រតិបត្តិការហិរញ្ញវត្ថុ ព្រមទាំងបង្កើតនូវកាលានុវត្តភាពជាផលិតផល និងសេវាកម្មហិរញ្ញវត្ថុថ្មីៗ ជាពិសេសនៅក្នុងវិស័យមូលបត្រ។
លក្ខណៈពិសេសនៃបច្ចេកវិទ្យាប្លុកឆេន គឺបង្កើតឱ្យមានជាបណ្តាញប្រព័ន្ធទិន្នន័យ ក្នុងទម្រង់ វិមជ្ឈការ ដែលអាចរក្សារាល់ប្រតិបត្តិការជួញដូរទាំងអស់ដែលកើតមានឡើង ព្រមទាំងអាច ផ្ទៀងដោយគ្រប់ភាគីពាក់ព័ន្ធ និងមិនអាចកែប្រែបានឡើយ មួយវិញទៀតរាល់ការធ្វើប្រតិ បត្តិការ ត្រូវអនុលោម តាមវិធានរួមមួយ ក្នុងទម្រង់ជាកិច្ចសន្យាឆ្លាតវៃ (Smart Contract)៕
Account
Security
Favourite Content