សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភូមិព្រះដាក់ ត្រូវបានគេស្គាល់ថាជាតំបន់ទេសចរណ៍ដ៏មានប្រជាប្រិយភាពមួយក្នុងចំណោមបណ្តាភូមិដទៃទៀតដែលស្ថិតនៅក្នុងស្រុកបន្ទាយស្រី ខេត្តសៀមរាប ដ្បិតថានៅតំបន់មួយនេះត្រូវបានអាជ្ញាធរ ជាពិសេសប្រជាសហគមន៍បានយកចិត្តទុដាក់ទៅលើការកសាងហេដ្ឋារចនាសម្ព័ន្ធ សោភ័ណភាព បរិស្ថាន និងអនាម័យ ក្នុងនាមជាបុរីជនបទ។ បន្ថែមពីនេះ កេរ្តិ៍ឈ្មោះរបស់ភូមិព្រះដាក់ក៏មានភាពល្បីល្បាញផ្នែកចម្អិនម្ហូបអាហារដែលមានរសជាតិឈ្ងុយឆ្ងាញ់ខុសប្លែកពីតំបន់ដទៃ រួមមានដូចជា មាន់អាំង នំបញ្ចុក នំអាកោត្នោត ជាពិសេស នំបាក់បិនប្រចាំភូមិ ដែលក្នុងនោះសម្រាប់ថ្ងៃឈប់សម្រាក ឬបុណ្យទានផ្សេងៗ មានអ្នកខ្លះអាចលក់បានរហូតជិតដល់ ៣លានរៀល ក្នុង១ថ្ងៃ ។
កញ្ញា ពត ចិន្ដា ជាអាជីវករលក់នំបាក់បិនមួយកន្លែង ជ្រកក្រោមស្លាកយីហោ នំបាក់បិនដុត យាយរ៉ាន់ ស្ថិតនៅក្នុងភូមិព្រះដាក់នេះបានប្រាប់ឱ្យដឹងថា ជាទូទៅ នៅថ្ងៃធម្មតា នំបាក់បិនដុតរបស់កញ្ញា អាចលក់បានប្រមាណត្រឹមតែ៥០ស្មុគតែប៉ុណ្ណោះ ដោយក្នុង ១ស្មុគ មាននំចំនួន ១២ដុំ ។ ប៉ុន្តែ សម្រាប់ថ្ងៃឈប់សម្រាកចុងសប្ដាហ៍ ជាពិសេស នៅថ្ងៃបុណ្យទានផ្សេងៗដែលមានទេសចរមកកម្សាន្តច្រើន គឺអាចលក់បានចាប់ពី ២០០ ទៅដល់ ៣០០ស្មុគក៏មានដែរ ខណៈដែលនំ ១ស្មុគ មានតម្លៃ ១១ ០០០រៀល។
កញ្ញាបានបញ្ជាក់យ៉ាងដូច្នេះថា ៖
«សម្រាប់នំបាក់បិនរបស់យើងជាធម្មតាយើងលក់ក្នុងតម្លៃ ១១០០០រៀលក្នុងមួយស្មុគ ដោយក្នុងនោះ ១០០០រៀល គឺគិតថ្លៃស្មុគដែលយើងជួយទិញពីសហគមន៍។ ក្រៅពីនេះ យើងក៏មានលក់ជានំផ្សេងទៀតដូចជា នំលំអងចេក នំត្រៀប នំកូរស្នូលសណ្ដែក ជាដើម ដែលអតិថិជនភាគច្រើនជាអ្នកទេសចរជាតិមកពីតាមបណ្ដាលខេត្តនានា ជាពិសេសរាជធានីភ្នំពេញ ហើយក៏មានទេសចរបរទេសផងដែរ»។
កញ្ញា ពត ចិន្តា បានប្រាប់ឱ្យដឹងផងដែរថា ជាប្រចាំថ្ងៃ នំបាក់បិន ត្រូវបានដុតឆ្អិន និងរៀបចំដាក់លក់នៅម៉ោង ៨ព្រឹក ប៉ុន្តែមានថ្ងៃខ្លះអាចលឿនជាងនេះ អាស្រ័យតាមការកុម្ម៉ង់ចង់បានរបស់អតិថិជន ព្រោះជាទូទៅ ត្រូវចំណាយពេលប្រមាណ ៤០នាទី ក្នុងការរៀបចំដាក់ដុតទើបនំបាក់បិនឆ្អិនល្អ និងមានក្លិនឈ្ងុយ រសជាតិឆ្ងាញ់។ ដោយឡែក សម្រាប់វត្ថុធាតុដើម និងគ្រឿងផ្សំវិញ អ្វីដែលត្រូវការចាំបាច់បំផុត គឺ ដំឡូងមី និងដំឡូង គ ដែលទទួលទិញពីបងប្អូនប្រជាសហគមន៍ដាំនៅតាមជើងភ្នំក្នុងខេត្តសៀមរាបផ្ទាល់ ហើយបច្ចេកទេសចម្អិនវិញ ដំបូងគេត្រូវយកដំឡូងចិតសម្បក លាងទឹកឱ្យស្អាត ទើបយកមកឈូសដោយដៃ លាយជាមួយស៊ុត ដូងកោស គ្រឿងផ្សំរសជាតិ ដែលជារូបមន្តប្រចាំគ្រួសារ រួមរៀបចំដុតដោយប្រើធ្យូងដែលងំល្អ ទើបធ្វើឱ្យនំមានក្លិនឈ្ងុយពិសេសប្លែកគេ។
ឆ្លៀតក្នុងឱកាសនេះ កញ្ញា ពត ចិន្ដា បានថ្លែងអំណរគុណដល់បណ្តាអតិថិជនទាំងអស់ដែលជាទេសចរជាតិ និងអន្តរជាតិ ដែលតែងគាំទ្ររសជាតិនំបាក់បិនដុត យាយវ៉ាន់ ភូមិព្រះដាក់ ជាពិសេស សូមអំពាវនាវដល់ទេសចរទាំងអស់ បន្តកៀរគរគ្នាមកលេងកម្សាន្តនៅខេត្តសៀមរាប ជាពិសេសនៅភូមិព្រះដាក់ ស្រុកបន្ទាយស្រី ដ្បិតថា នៅទីនេះ មានភាពស្រស់ស្អាត គួរជាទីទាក់ទាញ ទាំងរសជាតិចំណីអាហារប្រចាំតំបន់ ទាំងការរៀបចំសណ្ដាប់ធ្នាប់ អនាម័យ និងបរិស្ថានបានយ៉ាងល្អប្រសើរបំផុត៕
Account
Security
Favourite Content