សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ តំបន់ដែលស្ថិតនៅតាមបណ្ដោយផ្លូវសំខាន់ៗចំនួន ២ ខ្សែក្នុងរាជធានីភ្នំពេញឃើញថាកំពុងមានការអភិវឌ្ឍលើឧស្សាហកម្មធនាគារ ដោយក្នុងនោះឃើញថា បណ្ដាធនាគារធំៗបានជ្រើសរើសយកទីតាំងផ្លូវទាំងនោះធ្វើជាទីតាំងការិយាល័យកណ្ដាលរបស់ខ្លួន ក៏ដូចជាសាខាការិយាល័យផងដែរ។
បើតាមប្រសាសន៍ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា បច្ចុប្បន្ននេះ នៅតាមបណ្តោយផ្លូវព្រះនរោត្តម និងព្រះមុនីវង្ស គឺជាតំបន់ឧស្សាហកម្មធនាគារដ៏មានសក្ដានុពល ហើយអ្នកធ្វើការនៅក្នុងធនាគារភាគច្រើនជាមនុស្សមានវ័យក្មេង មានចំណេះដឹងទូលាយ ដែលពួកគេនេះត្រូវការរស់នៅបែបទំនើប ។
ឯកឧត្តមបានបន្តថា ដោយសារតែផ្លូវទាំង ២ ខ្សែនេះ ជាតំបន់ដែលកំពុងមានការអភិវឌ្ឍលើឧស្សាហកម្មធនាគារ ដូច្នេះ ហើយអ្នកអភិវឌ្ឍន៍គួរយកចិត្តទុកដាក់លើការអភិវឌ្ឍអគារខ្ពស់ ដូចជាខុនដូ និងអាផាតមិន សម្រាប់ផ្គត់ផ្គង់ដល់អ្នកដែលមានតម្រូវការជាក់ស្ដែង ។
ឯកឧត្តម ឧបនាយករដ្ឋមន្ត្រីក៏បានកត់សម្គាល់ឃើញថា និន្នាការរបស់ពលរដ្ឋបានផ្លាស់ប្តូរពីការរស់នៅផ្ទះជាប់ដី មករស់នៅក្នុងអាគាសហកម្មសិទ្ធិរួមមានដូចជា ខុនដូ និងអាផាតមិន ដែលចាប់ផ្ដើមមានច្រើន ជាពិសេសយុវជនជំនាន់ក្រោយ ។ ដូច្នេះក្រសួងពាក់ព័ន្ធនានា គួររៀបចំហេដ្ឋារចនាសម្ព័ន្ធនៅក្នុងក្រុងភ្នំពេញឱ្យបានស្រស់ស្អាត លើកកម្ពស់ដល់ការរស់នៅរបស់ប្រជាពលរដ្ឋ ក៏ដូចជាដូចជាកន្លែងសម្រាប់កម្សាន្ត កន្លែងហាត់ប្រាណសាធារណៈជាដើម ។
បើតាមអ្នកអភិវឌ្ឍន៍ និងអ្នកជំនាញនៃវិស័យអចលនទ្រព្យជាច្រើនបានលើកឡើងថា តម្រូវការនៃខុនដូ និងអាផាតមិន នៅកណ្តាលរាជធានីភ្នំពេញនឹងមានកំណើន ដោយសារប្រជាពលរដ្ឋដែលបំពេញការងារនៅកណ្ដាលក្រុង នឹងត្រូវការផ្ទះស្នាក់នៅក្បែរកន្លែងការងារ ហើយពួកគេភាគច្រើនក៏មិនអាចមានលទ្ធភាពទិញផ្ទះជាប់ដីនៅកណ្ដាលក្រុងភ្នំពេញ ដែលមានតម្លៃរាប់លានដុល្លារបាននោះដែរ ដូច្នេះ ជម្រើសរបស់ពួកគេគឺមានតែទិញខុនដូ ឬស្នាក់នៅអាផាតមិនតែប៉ុណ្ណោះ ។
អ្នកឧកញ៉ា សៀ ឬទ្ធី អ្នកអភិវឌ្ឍន៍អចលនទ្រព្យដ៏ល្បីឈ្មោះមួយរូបនៅកម្ពុជាធ្លាប់បានបង្ហាញទស្សនវិស័យថា ទីផ្សារខុនដូនឹងមានកំណើនខ្លាំងនៅពេលដែលពលរដ្ឋចាប់ផ្ដើមផ្លាស់ប្តូរនិន្នាការពីការស្នាក់នៅផ្ទះជាប់ដី មកស្នាក់នៅក្នុងខុនដូ ។ ដោយឡែកសម្រាប់ទីតាំងដែលល្អសម្រាប់អភិវឌ្ឍន៍ខុនដូ គឺជាទីតាំងនៅកណ្ដាលក្រុង ជាតំបន់ពាណិជ្ជកម្ម ដោយអ្នកអភិវឌ្ឍន៍អាចទិញដីនោះ ហើយសាងសង់អគារខ្ពស់ៗដើម្បីរកផលចំណេញត្រលប់មកវិញ ។
គួរបញ្ជាក់ថា តាមការសិក្សាតម្លៃដីធ្លីពីសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) បានឱ្យដឹងថា តម្លៃដីនៅតាមបណ្ដោយផ្លូវទាំងពីរខាងលើនេះក៏ចាត់ទុកជាតំបន់ដែលមានតម្លៃដីខ្ពស់ជាងគេនៅរាជធានីភ្នំពេញផងដែរ ដែលអាចមានតម្លៃដល់ជាង ១ម៉ឺនដុល្លារអាមេរិកក្នុងមួយម៉ែត្រការ៉េ ៕
Account
Security
Favourite Content