ភ្នំពេញ៖ ជំនាញសម្រុះសម្រួលក្នុងសហគមន៍ត្រូវបានគេទទួលស្គាល់ថា មានសារៈសំខាន់ និងសារៈប្រយោជន៍សម្រាប់ការទំនាក់ទំនងនៅក្នុងសង្គម ការរស់នៅប្រចាំថ្ងៃ មិនថានៅក្នុងគ្រួសារ កន្លែងធ្វើការ និងក្នុងសហគមន៍ជាដើម ព្រមទាំងជាវិធីសាស្ត្រដោះស្រាយជម្លោះដោយសន្តិវិធីមួយ។

ដោយមើលឃើញពីផលប្រយោជន៍ និងសក្តានុពលនៃជំនាញនេះ អិលអូអិលស៊ី បានរៀបចំវគ្គបណ្តុះបណ្តាលមួយស្តីពី «ការលើកកម្ពស់ចំណេះដឹងលើជំនាញសម្រុះសម្រួលក្នុងសហគមន៍» ដែលជាកម្មវិធីបណ្តុះបណ្តាលផ្នែកជំនាញសម្រុះសម្រួល ការចរចា និងការដោះស្រាយវិវាទ។ កម្មវិធីនេះមានរយៈពេល២ថ្ងៃ គឺថ្ងៃ២៩ និងទី៣០ ខែឧសភា ឆ្នាំ២០២៥ មានគោលបំណងអភិវឌ្ឍន៍ជំនាញ និងសមត្ថភាពដល់អ្នកចូលរួមក្នុងការសម្រុះសម្រួលវិវាទ ឬដោះស្រាយជម្លោះដោយតម្លាភាព និងប្រកបដោយប្រសិទ្ធភាពខ្ពស់ និងដើម្បីលើកកម្ពស់វប្បធម៌ការសន្ទនា ពង្រឹងទំនាក់ទំនងសហគមន៍ បង្កើនបរិយាកាសប្រកបដោយសន្តិភាព និងសុខុមាលភាពក្នុងសហគមន៍។

អ្នកចូលរួម មិនត្រឹមតែបានរៀនសូត្រពីទ្រឹស្តី និងគន្លឹះសម្រុះសម្រួលវិវាទល្អៗប៉ុណ្ណោះទេ ថែមទាំងបានរៀនសូត្រតាមរយៈការអនុវត្ត និងឧទាហរណ៍ជាក់ស្តែង ដឹកនាំដោយអ្នកជំនាញឯកទេសមកពីមជ្ឈ​មណ្ឌលសម្រុះសម្រួលវិវាទកម្ពុជា ដែលមានបទពិសោធន៍ជាច្រើនឆ្នាំក្នុងវិស័យនេះ។ វគ្គបណ្តុះបណ្តាលនេះ មានការចូលរួមពីមន្ត្រីរាជការជាច្រើន រួមទាំងប្រធានការិយាល័យនីតិកម្ម និងសម្រុះសម្រួលវិវាទមូលដ្ឋាន មេឃុំ/ចៅសង្កាត់ មេភូមិ ជំទប់ឃុំ និងបុគ្គលិក អិលអូអិលស៊ី។

លោក សុខ វឿន ប្រធាននាយកប្រតិបត្តិរបស់ អិលអូអិលស៊ី បានថ្លែងថា៖

«អិលអូអិលស៊ី គឺជាគ្រឹះស្ថានហិរញ្ញវត្ថុឈានមុខមួយដែលមានការចូលរួមយ៉ាងសកម្មក្នុងសកម្មភាពសង្គម។ វគ្គបណ្តុះបណ្តាលនេះជាជំហានសំខាន់ក្នុងការផ្តល់ឱ្យអ្នកចូលរួមនូវចំណេះដឹង និងជំនាញសម្រុះសម្រួល ដើម្បីបង្កើនបរិយាកាសសន្តិភាព និងសុខុមាលភាពក្នុងសហគមន៍»។

លោកបានបន្ថែមថា៖ វគ្គបណ្តុះបណ្តាលនេះនឹងជួយឱ្យអ្នកចូលរួមអភិវឌ្ឍន៍ជំនាញក្នុងការទប់ស្កាត់ គ្រប់គ្រង និងដោះស្រាយវិវាទក្នុងសហគមន៍ដោយសន្តិវិធី ដោយមានការយល់ស្របពីគ្រប់ភាគីពាក់ព័ន្ធ។ លោកសង្ឃឹមថា វាជាឱកាសមួយសម្រាប់បង្កើនភាពរួបរួម និងអភិវឌ្ឍសន្តិភាពប្រកបដោយចីរភាពនៅក្នុងសហគមន៍។

គួរជម្រាបថា៖ អត្ថប្រយោជន៍ក្នុងការចូលរួមវគ្គបណ្តុះបណ្តាល សិក្ខាកាមអាចឈ្វេងយល់ពីដំណោះស្រាយវិវាទនានាដែលកើតមានឡើងនៅក្នុងសហគមន៍ ពិភាក្សាពីលទ្ធភាពជម្រើសផ្លូវកណ្តាលមួយចំនួនចេញពីបទពិសោធន៍អ្នកធ្វើការក្នុងវិស័យដោះស្រាយវិវាទក្រៅប្រព័ន្ធតុលាការ ប្រើប្រាស់វិធីសាស្ត្រប្រកបដោយប្រសិទ្ធភាពដើម្បីធ្វើការប្រាស្រ័យទាក់ទងក្នុងការដោះស្រាយវិវាទ ទទួលបានការយល់ដឹង និងចេះធ្វើការវិភាគអំពីទំនាស់ មានសមត្ថភាពក្នុងការដោះស្រាយ និងអនុវត្តជំនាញសម្រុះសម្រួលវិវាទ៕