ភ្នំពេញ ៖ អ្នកជំនាញសេដ្ឋកិច្ច និងហិរញ្ញវត្ថុ បានអះអាងថា បំណុលសាធារណៈក្នុងប្រទេសកម្ពុជា ស្ថិតនៅទាបជាងប្រទេសជិតខាងក្នុងតំបន់អាស៊ាន និងស្ថិតនៅក្រោមបន្ទាត់ក្រហមនៅឡើយ ដែលអាចស្នើកម្ចីបំណុលពីបរទេសបន្ថែមទៀតសម្រាប់យកមកអភិវឌ្ឍន៍ប្រទេស។

ការថ្លែងខាងលើបន្ទាប់ពីក្រសួងសេដ្ឋកិច្ច និងហិរញ្ញវត្ថុ បានបញ្ចេញរបាយការណ៍បំណុលសាធារណៈថ្មីមួយដោយបង្ហាញថា នៅដំណាច់ត្រីមាសទី២ ឆ្នាំ២០២៥នេះ កម្ពុជាមានបំណុលសាធារណៈសរុប ១២,៦៧ ពាន់លានដុល្លារអាម៉េរិក ដែលក្នុងនោះ ៩៩ភាគរយ គឺជាបំណុលសាធារណៈក្រៅប្រទេស។ បំណុលនេះបានកើនឡើងបើធៀបនឹងឆ្នាំ២០២៤ ដែលមានទំហំសន្និធិបំណុលសាធារណៈសរុបត្រឹមតែ ១២,០៣ពាន់លានដុល្លារអាម៉េរិកប៉ុណ្ណោះ។

លោកបណ្ឌិត គី សេរីវឌ្ឍន៍ ប្រធានវិទ្យាស្ថានសិក្សាចិន និងជាអ្នកជំនាញសេដ្ឋកិច្ចបានលើកឡើងថា បើធៀបទៅនឹងប្រទេសក្នុងតំបន់អាស៊ានទាំងមូល បំណុលសាធារណៈរបស់កម្ពុជា នៅមានកម្រិតទាបជាងប្រទេសជិតខាង ពោលគឺស្ថិតនៅលេខរៀងទី២បន្ទាប់ពីប្រទេសប្រ៊ុយណេ ដែលយើងនៅតែមានចន្លោះច្រើនទៀតក្នុងការស្នើកម្ចីពីបរទេសយកមកធ្វើការអភិវឌ្ឍន៍ក្នុងគោលដៅជំរុញកំណើនសេដ្ឋកិច្ចជាតិ។

លោកបណ្ឌិតបញ្ជាក់ថា ៖

«បំណុលសាធារណៈនៅកម្ពុជា បើធៀបជាមួយ GDP ឬហៅថា ចំណូលដុលសរុបនៅមានកម្រិតទាប ដែលជាតួលេខស្ថិតនៅក្នុងបន្ទាត់បៃតងនៅឡើយ។ ដូច្នេះ កម្ពុជាមានត្រឹមតែ៣០ភាគរយជាង គឺនៅក្នុងបន្ទាត់បៃតងនៅឡើយទេ ដែលអនុញ្ញាតឱ្យកម្ពុជានៅមាន Space សម្រាប់ខ្ចីបុលពីបរទេស ដើម្បីជំរុញកំណើសេដ្ឋកិច្ច» ។

លោកបណ្ឌិត ជ័យ តិច អ្នកស្រាវជ្រាវសង្គមសេដ្ឋកិច្ចបានលើកឡើងថា បំណុលសាធារណៈរបស់កម្ពុជាស្ថិតនៅកម្រិតមួយដែលអាចគ្រប់គ្រងបាន ហើយស្ថិតនៅក្នុងម្រិតមួយដែលមានហានិភ័យទាប បើធៀបទៅនឹង GDP នៃប្រជាប្រជាជនកម្ពុជា ដែលមានប្រមាណជា ២៥%ប៉ុណ្ណោះ ។ 

លោកបានបញ្ជាក់ថា ៖

«បំណុលសាធារណៈរបស់កម្ពុជាឈរលំដាប់ទាបជាងគេលេខរៀងទី២ បន្ទាប់ពីប្រ៊ុយណេ ហើយប្រទេសដែលមានបំណុលខ្ពស់ជាងគេនៅអាស៊ាន មានប្រទេសថៃ សឹង្ហបូរី និងប្រទេសឡាវ ដែលកើនឡើងខ្ពស់ដល់ចំណុចក្រហម។ បំណុលសាធារណៈរបស់កម្ពុជាបើធៀបនឹងសមាជិកប្រទេសក្នុងអាស៊ាន គឺទាបបំផុត ពោលគឺយើងចាញ់តែប្រ៊ុយណេមួយប៉ុណ្ណោះ ខណៈដែលប្រ៊ុយមានប្រមាណជា ៣%នៃ GDP»។

គួរបញ្ជាក់ជាថ្មីថា បំណុលសាធារណៈរបស់កម្ពុជា បើធៀបជាមួយនឹងបណ្តាប្រទេសសមាជិកអាស៊ានឃើញថា កម្ពុជាឈរលេខលេខទី២ ដែលមានបំណុល ២៥% នៃGDP ខណៈប្រ៊ុយណេមាន ៣%នៃ GDP ដែលជាតួលេខទាបបំផុត។ ចំណែកប្រទេសដែលមានបំណុលសាធារណៈច្រើនជាងកម្ពុជារួមមានដូចជា វៀណាម ៣០% នៃGDP ឥណ្ឌូនេស៊ី ៤០% នៃGDP ហ្វ៊ីលីពីន ៥៥%  ភូមា៦០% ថៃ ៦៥ ម៉ាឡេស៊ី ៧០% ឡាវ ១០០%(ឡើងដល់បន្ទាត់ក្រហម)ដែលពិបាកគ្រប់គ្រង និងសឹង្ហបូរី ១៧៥% នៃGDP ជាតួលេខខ្ពស់ជាងគេបំផុតនៅអាស៊ី៕