សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ យោងតាមលទ្ធផលនៃកិច្ចប្រជុំពេញអង្គរបស់រាជរដ្ឋាភិបាលកម្ពុជាកាលពីចុងសប្ដាហ៍មុននេះបានបង្ហាញថា ក្នុងសេចក្ដីព្រាងកម្មវិធីវិនិយោគសាធារណៈ៣ឆ្នាំរំកិល ពីឆ្នាំ ២០២៥ ដល់ឆ្នាំ ២០២៧ កម្ពុជាមានគម្រោងវិនិយោគសាធារណៈសរុបចំនួន៦១៧គម្រោង ។
បើតាមសេចក្ដីប្រកាសព័ត៌មានរបស់ទីស្ដីការគណៈរដ្ឋមន្ត្រីបានឱ្យដឹងថា កម្មវិធីវិនិយោគសាធារណៈ ៣ឆ្នាំរំកិលរបស់រាជរដ្ឋាភិបាលកម្ពុជាទាំង៦១៧គម្រោង ដោយក្នុងនោះមានគម្រោងចំនួន១៧៣ កំពុងដំណើរការ និងត្រូវការទុនចំនួន ៤ ៦៧៨លានដុល្លារអាមេរិក ហើយគម្រោងចំនួន៤៤៤ ផ្សេងទៀត ស្ថិតនៅជាគម្រោងសម្រាប់អនុវត្តផែនការយុទ្ធសាស្ត្រជាតិ ដែលគម្រោងទាំង ៤៤៤គម្រោងនេះ ត្រូវការទុនប្រមាណជាង៧ពាន់លានដុល្លារអាមេរិក ។
កម្មវិធីវិនិយោគសាធារណៈ គឺជាឧបករណ៍ផ្នែកគោលនយោបាយមួយសម្រាប់អនុវត្តផែនការយុទ្ធសាស្ត្រអភិវឌ្ឍន៍ជាតិ ២០២៤-២០២៨ តាមរយៈការស្នើឡើងនូវគម្រោងវិនិយោគសាធារណៈ ដែលអាចឆ្លើតតបទៅនឹងផែនការអាទិភាពដូចមានចែងក្នុងយុទ្ធសាស្ត្របញ្ចកោណ ដំណាក់កាលទី១ និងផែនការយុទ្ធសាស្ត្រអភិវឌ្ឍន៍ជាតិ ២០២៤-២០២៨ ។ កម្មវិធីវិនិយោគនេះ បានរៀបចំឡើងដោយមានការសម្របសម្រួល និងដឹកនាំដោយក្រសួងផែនការ និងមានការចូលរួមផ្ដល់ធាតុចូលគ្រប់ក្រសួង ស្ថាប័ន ។
ក្រៅពីកម្មវិធីវិនិយោគសាធារណៈរបស់រាជរដ្ឋាភិបាលជាង៦១៧គម្រោង និងមានទឹកប្រាក់ប៉ាន់ស្មានប្រមាណ ១១,៦ពាន់លានដុល្លារ ក៏មានគម្រោងប្រមាណ១៧៤គម្រោងទៀតដែលរាជរដ្ឋាភិបាលបានកំណត់ក្នុងផែនការមេអភិវឌ្ឍន៍ ដោយត្រូវទឹកប្រាក់វិនិយោគប្រមាណ៣៦ពាន់លានដុល្លារអាមេរិកផងដែរ ជាពិសេសលើគម្រោងហេដ្ឋារចនាសម្ព័ន្ធ ផ្លូវ ស្ពាន ផ្លូវល្បឿនលឿន គម្រោងផ្លូវដែកជាដើម ។
គម្រោងទាំង១៧៤គម្រោងឃើញថា ភាគច្រើនជាគម្រោងផ្លូវថ្នល់ រួមមានផ្លូវជាតិ និងផ្លូវល្បឿនលឿន ដោយចំណាយលុយរាប់ពាន់លានដុល្លារអាមេរិក ហើយរាជរដ្ឋាភិបាលក៏បាននិងកំពុងកៀរគរវិនិយោគិន និងទុនវិនិយោគទុនពីគ្រប់ទិសទីដើម្បីវិនិយោគគម្រោងទាំងនោះ ។ ជាលទ្ធផលមានគម្រោងមួយចំនួនត្រូវបាន និងកំពុងអភិវឌ្ឍន៍ និងគ្រោងអភិវឌ្ឍន៍នៅពេលឆាប់ៗខាងមុខនេះផងដែរ ។
ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជាធ្លាប់បានមានប្រសាសន៍ថា រាជរដ្ឋាភិបាលអាណត្តិថ្មីនេះ នៅតែបន្តកៀរគរទុន និងវិនិយោគិនមកពីគ្រប់ទិសទី ដើម្បីអនុវត្តន៍គម្រោងផែនការមេរបស់រដ្ឋាភិបាល និងដើម្បីជំរុញកំណើនសេដ្ឋកិច្ច ជំរុញការធ្វើពាណិជ្ជកម្មរវាងប្រទេសកម្ពុជា និងប្រទេសក្នុងតំបន់ ក៏ដូចជាក្រៅតំបន់ផងដែរ ៕
Account
Security
Favourite Content