សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ចាប់តាំងពីការកកើតរាជរដ្ឋាភិបាលថ្មី អាណត្តិទី៧ មក កម្ពុជាទទួលបានគម្រោងវិនិយោគសរុបចំនួន២៣៧គម្រោង ដោយមានទុនវិនិយោគប្រមាណជាង៦ពាន់លានដុល្លារអាមេរិក ក្នុងនោះ វិនិយោគិនចិនបានរួមចំណែកក្នុងការវិនិយោគនៅកម្ពុជាច្រើនជាងគេ ។
ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជាបានថ្លែងនៅថ្ងៃទី១៤ ខែសីហា ឆ្នាំ២០២៤ ឱ្យដឹងថា កត្តាសុខសន្តិភាព ស្ថិរភាព នយោបាយ និងកំណើនសេដ្ឋកិច្ចរបស់កម្ពុជា ធ្វើឱ្យវិនិយោគិនក្នុង និងក្រៅប្រទេសជឿជាក់លើការដឹកនាំរបស់រាជរដ្ឋាភិបាលកម្ពុជា និងបានបោះទុនវិនិយោគជាបន្តបន្ទាប់។ ជាក់ស្ដែងរយៈពេល១១ខែក្រោយការបង្កើតរាជរដ្ឋាភិបាលថ្មីដឹកនាំដោយសម្ដេចមហាបវរធិបតី ហ៊ុន ម៉ាណែត កម្ពុជាទទួលបានទុនវិនិយោគជាង៦ពាន់លានដុល្លារអាមេរិក បើធៀបនឹង១១ខែមុននេះ មានការកើនឡើងរហូតដល់២២០ភាគរយ ។
ឯកឧត្តមបានមានប្រសាសន៍បន្តថា រាជរដ្ឋាភិបាលក៏បានខិតខំទាក់ទាគ់វិនិយោគិនពីបរទេសឱ្យចូលមកបណ្ដាក់ទុនវិនិយោគនៅកម្ពុជាបន្ថែម ទន្ទឹមនឹងនោះដែរ រាជរដ្ឋាភិបាលក៏បានសាងសង់ហេដ្ឋារចនាសម្ព័ន្ធនានាដើម្បីទាក់ទាញវិនិយោគិនបរទេស ដូចជាសាងសង់ស្ពានឆ្លងទន្លេ ទាំងនៅភ្នំពេញនិងបណ្ដាខេត្ត សាងសង់ព្រែកជីកហ្វូណនតេជោ ដែលទើបបើកការដ្ឋានកាលពីពេលថ្មីៗនេះជាដើម ។
ឯកឧត្តមឧបនាយករដ្ឋមន្ត្រីបានបន្ថែមឱ្យដឹងថា នៅខែក្រោយនេះ ឯកឧត្តមនឹងដឹកនាំប្រតិភូកម្ពុជាដែលមានមន្ត្រីរាជរដ្ឋាភិបាល និងវិនិយោគិនកម្ពុជាទៅបំពេញទស្សនកិច្ចនៅប្រទេសចិន សហរដ្ឋអាមេរិក ប្រទេសក្នុងតំបន់មជ្ឈិមបូព៌ា និងបណ្ដាប្រទេសតំបន់អឺរ៉ុប ដើម្បីទាក់ទាញវិនិយោគិននៅបណ្ដាប្រទេសទាំងនោះចូលមកកម្ពុជាស្វែងរកដៃគូក្នុងស្រុកបណ្ដាក់ទុនវិនិយោគរួមគ្នា ។
គួររំលឹកដែរថា សម្ដេចមហាបវរធិបតី ហ៊ុន ម៉ាណែត នាយរកដ្ឋមន្ត្រីតែងតែជំរុញឱ្យមន្ត្រីជាន់ខ្ពស់ និងមន្ត្រីថ្នាក់ខេត្តទាក់ទាញវិនិយោគិនបរទេស និងក្នុងស្រុក ដើម្បីបណ្ដាក់ទុនវិនិយោគនៅតាមតំបន់នានាទូទាំងប្រទេស បង្កើតការងារជូនប្រជាពលរដ្ឋនៅតាមមូលដ្ឋាន និងបង្កើតប្រាក់ចំណូលដល់ពលរដ្ឋនៅតាមមូលដ្ឋាន ដោយមិនចាំបាច់មកធ្វើការនៅរាជធានីភ្នំពេញ ដែលត្រូវចំណាយទៅលើថ្លៃផ្ទះ ថ្លៃធ្វើដំណើរ និងចំណាយផ្សេងៗទៀត ។
យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាកាលពីពេលថ្មីៗបានបង្ហាញថា ក្នុងរយៈពេល៧ខែដើមឆ្នាំ ២០២៤នេះកម្ពុជាទទួលបានទុនវិនិយោគប្រមាណ៣,៦ពាន់លានដុល្លារអាមេរិក ពីគម្រោងចំនួន២៣៤គម្រោងទាំងក្រុមហ៊ុនវិនិយោគថ្មី និងក្រុមហ៊ុនពង្រីកផលិតកម្មវិនិយោគនៅក្នុងប្រទេសកម្ពុជា ។
បើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាបានបង្ហាញផងដែរថា គម្រោងភាគច្រើនដែលត្រូវបានក្រុមប្រឹក្សាអភិវឌ្ឍន៍កម្ពុជាអនុម័តកន្លងមកនេះគឺគម្រោងក្នុងវិស័យឧស្សាហកម្មរោងចក្រ និងមានទីតាំងនៅតាមបណ្ដាខេត្តនៅជាប់រាជធានីភ្នំពេញ និងតាមព្រំដែនកម្ពុជា ។
ការវិនិយោគលើរោងចក្រឧស្សាហកម្មក្នុងប្រទេសកម្ពុជា ក៏បានចូលរួមចំណែកដល់ការ ដល់តម្រូវការប្រើប្រាស់ដីធ្លីក្នុងពេលស្ថានភាពអចលនទ្រព្យក្នុងប្រទេសកម្ពុជាហាក់មិនទាន់មានសកម្មភាពប្រសើរដូចមុនស្ថានភាពកូវីដ១៩ ។
លោក ប៉ូ អ៊ាវគង់ អគ្គនាយកក្រុមហ៊ុនអចលនទ្រព្យ Advance បានមានប្រសាសន៍ថា ការវិនិយោគលើរោងចក្រឧស្សាហកម្មបច្ចុប្បន្ននេះ យើងឃើញថាបានងាកចេញពីភ្នំពេញទៅកាន់តំបន់ជាយៗរាជធានីភ្នំពេញ និតាមបណ្ដាខេត្តជាប់ភ្នំពេញ ដូចជាកំពង់ស្ពឺ កណ្ដាលតាកែវ ជាដើម ។ សម្រាប់នៅតំបន់ជាប់រាជធានីភ្នំពេញ ឃើញថាតំបន់ប៉ែកខាងត្បូង និងប៉ែកខាងលិចភ្នំពេញជាតំបន់មានសក្ដានុពលក្នុងការទាក់ទាញការវិនិយោគលើរោងចក្រ ឧស្សាហកម្ម ដែលធ្វើឱ្យដីធ្លីសម្រាប់ប្រើប្រាស់កាន់តែមានតម្រូវការខ្ពស់ ៕
Account
Security
Favourite Content