សំណល់ផ្ទះបាយ គឺសំដៅទៅលើកាកសំណល់ដែលសល់ពីការចម្អិន ឬបរិភោគប្រចាំថ្ងៃ ហើយខុស​ពីសំណល់រឹង ដែលគេកម្រយកសំណល់ផ្ទះបាយទៅកែច្នៃណាស់។ កាកសំណល់ផ្ទះបាយនេះ ក៏ជា​សំណល់ដែលមានក្លិនមិនល្អ និងធ្វើឱ្យប៉ះពាល់ដល់សោភ័ណ្ឌភាពបរិស្ថានផងដែរ។ ដោយឃើញពីបញ្ហានេះ និងចង់រួមចំណែកក្នុងការសម្អាតបរិស្ថានផង យុវសិស្សមួយក្រុមមកពីខេត្តកំពង់ចាមបានរួមគ្នាបង្កើតជាគម្រោងឡជីវឧស្ម័នខ្នាតតូច។

យុវសិស្ស គីម សោភា ដែលជាតំណាងក្រុម The 3R-youths បានរៀបរាប់ឱ្យដឹងថា ក្រុមរបស់ខ្លួនយក​គំនិតផ្ដួចផ្ដើមនេះទៅចូលរួមនៅក្នុងការប្រកួតពានរង្វាន់សហគ្រិនខ្មែរកម្រិតវិទ្យាល័យប្រចាំឆ្នាំ២០២៣។ ជាលទ្ធផល ក្រុមយុវសិស្សរូបនេះទទួលបានជ័យលាភីលេខ ២។

យុវតីដែលកំពុងសិក្សាថ្នាក់ទី១២ នៅវិទ្យាល័យហ៊ុនសែនកំពង់ចាមរូបនេះបានបន្តឱ្យដឹងទៀតថា ក្រុមរបស់ខ្លួនចាប់អារម្មណ៍ពីបញ្ហាបរិស្ថាន ​ហើយក្នុងនោះពួកគេក៏មើលឃើញថា កាកសំណល់​ផ្ទះបាយ មិនថានៅតាមទីក្រុង ឬទីជនបទនោះទេ ជារឿយៗតែងតែត្រូវបានខ្ជះខ្ជាយ បោះបង់ចោលដោយមិនមានការកែច្នៃឱ្យចេញជាប្រយោជន៍នោះទេ។

យុវតីរូបនេះបានលើកឡើងដូច្នេះថា ៖

«ឃើញដូច្នេះ ពួកយើងក៏ចាប់ផ្ដើមគិតថា តើកាកសំណល់ផ្ទះបាយទាំងអស់នេះ  ក្រៅពីយើងអាចយកវាទៅធ្វើជាជីសម្រាប់ដាក់ដំណាំ តើអាចយកទៅធ្វើជាអ្វីផ្សេងទៀតបាន? យើងក៏បានស្រាវជ្រាវ ហើយក៏ឃើញថា កាកសំណល់ផ្ទះបាយនេះអាចយកទៅធ្វើជាហ្គាសសម្រាប់ប្រើប្រាស់​ក្នុងជីវភាពរស់នៅប្រចាំថ្ងៃបាន។»

បើតាមការបញ្ជាក់ឱ្យដឹងពីយុវតីខាងលើ ឡជីវឧស្ម័នដែលក្រុមរបស់ខ្លួនបានគ្រោងនឹងផលិតនេះ មានទំហំតូចល្មម អាចប្រើប្រាស់បានជាលក្ខណៈគ្រួសារ តាមភោជនីយដ្ឋាន និងតាមផ្សារបាន។ មិនត្រឹមតែប៉ុណ្ណោះ អ្នករស់នៅទីក្រុងភ្នំពេញក៏អាចប្រើប្រាស់ឡនេះបានដែរ។

ឡជីវឧស្ម័ននេះ នឹងដើរតួនាទីយ៉ាងសំខាន់ក្នុងការប្រើប្រាស់ធនធានឱ្យអស់ពីលទ្ធភាព តាម​រយៈការយកកាកសំណល់ពីផ្ទះបាយ ដូចជា សំបកពងមាន់ សំបកផ្លែឈើ បន្លែខូចៗ និងសូម្បី​តែលាមកសត្វទៅដុតនៅក្នុងឡ ហើយវានឹងបំលែងទៅជាហ្គាសដែលអាចប្រើប្រាស់សម្រាប់​ចម្អិនម្ហូបអាហារបាន។

កាកសំណល់ផ្ទះបាយ ឬលាមកសត្វដែលសល់ពីការដុតក្នុងឡហើយនោះ ក៏អាចធ្វើជាជីកំប៉ុសដាក់ដំណាំដ៏ល្អមួយផងដែរ។

សម្រាប់តម្លៃវិញ យុវតីដដែលក៏បានបញ្ជាក់ផងដែរថា៖

«យើងគ្រោងប្រមូលផ្ដុំគ្នាជាមួយអ្នកសាងសង់ ដើម្បីសង់ឡជីវឧស្ម័ននេះសម្រាប់លក់តែម្ដង ដោយឡមួយមានតម្លៃ ៧០ដុល្លារ។ ពួកយើងបានគិតគូររួចហើយថា តម្លៃនេះ យើងអាចធ្វើបាន ហើយប្រជាជនក៏គាត់មានលទ្ធភាពទិញដែរ។»

យ៉ាងណាក៏ដោយ បច្ចុប្បន្នឡជីវឧស្ម័នខ្នាតតូចនេះកំពុងស្ថិតក្នុងគម្រោងនៅឡើយ​ ដូច្នេះ​ក្រោយ​បញ្ចប់ការសិក្សាពីថ្នាក់វិទ្យាល័យនេះទៅ កញ្ញា និងសមាជិកក្រុមចំនួន៣នាក់ផ្សេងទៀត មានបំណង​ចង់ជំរុញគម្រោងនេះឱ្យលេចចេញជារូបរាងឡើង ដោយរំពឹងចូលរួមកាត់បន្ថយនូវកាក​សំណល់ផ្ទះ​បាយ​ដែលមានក្លិនមិនល្អ ព្រមទាំងអាចកាត់បន្ថយករណីស្ទះលូមួយចំនួនផងដែរ៕