បរទេស ៖ យោងតាមប្រភពី Russia Briefing រាយការណ៍ថា ធនាគារ Alfa-Bank ដែលជាអ្នកផ្តល់ប្រាក់កម្ចីឯកជនធំបំផុតរបស់រុស្ស៊ីគ្រោងនឹងបើកសាខានៅក្នុងប្រទេសចិន។

កាលពីថ្ងៃដើមសប្ដាហ៍កន្លងទៅនេះ ក្រុមប្រឹក្សាភិបាលរបស់ធនាគារ Alfa-Bank បានប្រកាសពីផែនការបើកសាខាចំនួនពីរនៅក្នុងទីក្រុងប៉េកាំង និងទីក្រុងសៀងហៃ ហើយនឹងបញ្ជូនឯកសារចុះឈ្មោះទៅកាន់ធនាគារកណ្តាលចិន People’s Bank of China ក្នុងពេលឆាប់ៗនេះ។

មិនត្រឹមតែប៉ុណ្ណោះ ធនាគារ Alfa-Bank គ្រោងនឹងក្លាយទៅជាធនាគារឯកជនដំបូងគេរបស់រុស្ស៊ីដែលបើកសាខាពេញលេញនៅក្នុងទីក្រុងសំខាន់ៗចំនួនពីរក្នុងប្រទេសចិនក្នុងពេលតែមួយ។ ការពង្រឹកសាខានេះត្រូវបានចាត់ទុកថាជាយុទ្ធសាស្ត្រសំខាន់មួយក្នុងការពង្រីកខ្លួននៅមហាអំណាចអាស៊ី។ ចាប់តាំងពីដើមឆ្នាំ២០២៣ មក ធនាគារ Alfa-Bank បានក្លាយមុខជាអ្នកផ្តល់ប្រាក់កម្ចីកំពូលជាប្រាក់យ័នចិននៅលើទីផ្សាររុស្ស៊ី ដែលស្មើនឹង ១ ភាគ ៣ នៃប្រាក់កម្ចីជាប្រាក់យ័នសរុបទាំងអស់នៅក្នុងប្រទេសរុស្ស៊ី។

លោក Vladimir Voeykov ប្រធានផ្នែកធុរកិច្ចខ្នាតមធ្យម និងធំរបស់ Alfa-Bank បាននិយាយថា ៖

«នៅឆ្នាំនេះ ពួកយើងបានបើកដំណើរការសេវាកម្មសម្រាប់អ្នកនាំចូល និងអ្នកនាំចេញដែលធ្វើការជាមួយនឹងប្រទេសចិន រួមទាំងសម្រួលដល់ការបញ្ចេញទំនិញពីគយ។ យើងក៏បានរៀបចំវេទិកាដ៏ធំមួយសម្រាប់អ្នកចែកចាយរថយន្តដែលផ្តោតសំខាន់ទៅខាងចិន និង​ផ្តល់ជម្រើសផលចំណេញសម្រាប់ការទិញប្រាក់យន់ ហើយយើងបានធ្វើអ្វីគ្រប់យ៉ាងដើម្បីធ្វើឱ្យវាអតិថិជនរបស់យើងសប្បាយចិត្តក្នុងការធ្វើការជាមួយដៃគូមកពីប្រទេសចិន។ ការ​បើក​សាខារបស់យើង ​គឺ​ជា​ការ​បោះ​ជំហាន​ទៅ​មុខ​ដ៏ត្រឹមត្រូវមួយនៅ​ក្នុង​យុទ្ធសាស្ត្រ​របស់​យើង ហើយយើង​មាន​ទំនុក​ចិត្ត​ថា វានឹង​ជួយ​អតិថិជន​រុស្ស៊ី​ក្នុងការធ្វើ​អាជីវកម្ម​ជាមួយ​ប្រទេស​ចិន​កាន់​តែ​មាន​ប្រសិទ្ធភាព»។

គួរឲ្យបញ្ជាក់ដែរថា ធនាគារ Alfa-Bank មានទីស្នាក់ការកណ្តាលនៅទីក្រុងមូស្គូ និងមានប្រតិបត្តិការនៅក្នុងប្រទេសចំនួនប្រាំពីរ ដោយផ្តល់សេវាកម្មហិរញ្ញវត្ថុដល់អតិថិជនសាជីវកម្មសកម្មចំនួន ២២ លាននាក់ និងអតិថិជនលក់រាយសកម្មជាង ១ លាននាក់គិតត្រឹមដំណាច់ឆ្នាំ ២០២១។ ទន្ទឹមនឹងនេះ ការផ្លាស់ប្តូរនេះឆ្លុះបញ្ចាំងពីទំនាក់ទំនងសេដ្ឋកិច្ចរវាងរុស្ស៊ី និងចិនដែលកំពុងកើនឡើង។

យោងតាមប្រភពដដែលបង្ហាញថា ដំណើរការនេះនឹងត្រូវបានពន្លឿន ខណៈដែលកំពុងមានភាពតានតឹងកាន់តែខ្លាំងឡើងរវាងទីក្រុងម៉ូស្គូ និងលោកខាងលិចជុំវិញជម្លោះនៅអ៊ុយក្រែន រួមទាំងការដាក់ទណ្ឌកម្មសេដ្ឋកិច្ចប្រឆាំងនឹងរុស្ស៊ីជាដើម។ ការរឹតបន្តឹងនេះបានជំរុញឱ្យរុស្ស៊ីងាកចេញពីទីផ្សារលោកខាងលិច និងងាកទៅរកខាងកើតវិញ៕