ភ្នំពេញ៖ មន្ត្រីជាន់ខ្ពស់កម្ពុជា បានស្នើឱ្យដៃគូអភិវឌ្ឍចិនបង្កើនការវិនិយោគលើវិស័យកសិកម្ម និងបង្កើនការនាំចូលផលិតផលពីកម្ពុជាឱ្យបានកាន់តែច្រើន ជាពិសេសផ្នែកកសិផល ដូចជា ស្វាយចន្ទី ដំឡូងមី ផលិតកម្មចំណីសត្វ និងផលិតផលសាច់ត្រីជាដើម ។ សំណើនេះ ត្រូវបានលើកឡើងដោយ ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី ក្នុងជំនួបជាមួយអភិបាលនៃតំបន់ស្វយ័តក្វាងស៊ី លោក Wei Tao នៅទីក្រុងណាននីង​ ប្រទេសចិន កាលពីថ្មីៗនេះ។

ឯកឧត្តម វង្សី វិស្សុត បានលើកឡើងថា មិត្តភាពរវាងកម្ពុជា-ចិន បានចាក់ឫសយ៉ាងជ្រៅទៅក្នុងប្រវត្តិសាស្ត្រ និងវប្បធម៌នៃប្រទេសនៃទាំងពីរ ហើយការអភិវឌ្ឍឈានឡើងរបស់កម្ពុជាលើគ្រប់វិស័យរយៈពេលប្រមាណ៣០ឆ្នាំមកនេះ គឺមិនអាចកាត់ផ្តាច់បានពីការរួមចំណែករបស់ប្រទេសចិនបានឡើយ ។

ថ្នាក់ដឹកនាំកម្ពុជា-ចិន ក៏បានពិភាក្សា ជំរុញការអនុវត្តក្របខ័ណ្ឌនៃកិច្ចសហប្រតិបត្តិការ និងគម្រោងដែលមានស្រាប់ ដូចជា ការបង្កើតសួនឧស្សាហកម្មកម្ពុជា-ចិន ក្នុងក្របខ័ណ្ឌនៃរបៀងអភិវឌ្ឍន៍ឧស្សាហកម្ម ច្រករបៀប​​​ឧស្សាហកម្ម និងបច្ចេកវិទ្យា ច្រករបៀងមច្ឆា និងអង្ករ ការអភិវឌ្ឍវិស័យថាមពល បច្ចេកវិទ្យា​ឌីជីថល  AI  ការអភិវឌ្ឍជំនាញ សុខាភិបាល និងការជំរុញទំនាក់ទំនងរវាងប្រជាជន និងប្រជាជន ព្រមទាំងការជំរុញទេសចរពីតំបន់ស្វយ័តក្វាងស៊ីឱ្យមកទស្សនាកម្ពុជាឱ្យបានច្រើន ស្របពេលកម្ពុជាទើបបានបើកដំណើរការអាកាសយានដ្ឋានអន្តរជាតិថ្មីចំនួន២ គឺអាកាសយានដ្ឋាន អន្តរជាតិសៀមរាប-អង្គរ នៅខេត្តសៀមរាប និងអាកាសយានដ្ឋានអន្តរជាតិតេជោ នៅភ្នំពេញ ដែលមានស្តង់ដារកម្រិតខ្ពស់។

ទន្ទឹមនឹងនេះ ឯកឧត្តម វង្សី វិស្សុត ក៏បានបង្ហាញភាពរីករាយចំពោះកំណើននៃទំហំពាណិជ្ជកម្មរបស់ទាំងពីរ ដែលបានបន្តឡើងដល់ប្រមាណ ១៥ ១៨៩ លានដុល្លារ កាលពីឆ្នាំ២០២៤ ក្នុងនោះ គ្រាន់តែទំហំពាណិជ្ជកម្មរវាងតំបន់ស្វយ័តក្វាងស៊ី និងកម្ពុជា មានទំហំរហូតដល់ជាង ១ពាន់លានដុល្លារ។

យោងតាមរបាយការណ៍របស់អគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា នៅរយៈពេល ៨ខែឆ្នាំ២០២៥នេះ កម្ពុជាបាននាំចេញផលិផលកសិកម្មចំនួន ១០ ៣៧៦ ០៣៣តោន ទៅកាន់ទិសដៅចំនួន ៨៤ប្រទេស កើនឡើងចំនួន ៣៥.៦៤ភាគរយ បើធៀបនឹងរយៈពេលដូចគ្នាក្នុងឆ្នាំ២០២៤ ក្នុងនោះទទួលបានចំណូលចំនួន ៣ ៦២១លានដុល្លារអាមេរិក។

តាមការប៉ាន់ស្មានតម្លៃគិតជាទឹកប្រាក់ ដែលទទួលបានពីការនាំចេញកសិផលទាំងនេះ មានផលិតផលដំណាំជាង ៣ ៦២១លានដុល្លារអាមេរិក ក្នុងនោះតម្លៃការនាំចេញផលិតផលដំណាំក្រៅពីស្រូវ-អង្ករមានជាង ២ ២៥៤លានដុល្លារអាមេរិក តម្លៃពីការនាំចេញស្រូវមានជាង ៩៧៤ លានដុល្លារអាមេរិក និងតម្លៃពីការនាំចេញអង្ករមានជាង ៣៩២ លានដុល្លារអាមេរិក។

សូមជម្រាបថា​ នៅក្នុងដំណើរទៅកាន់ប្រទេសចិននោះ ថ្នាក់ដឹកនាំតំបន់ស្វយ័តក្វាងស៊ី និងឯកឧត្តម វង្សី វិស្សុត បានទៅទស្សនកិច្ចមជ្ឈមណ្ឌល CHINA-ASEAN Artificial Intelligence Collaborative Innovation និងទទួលជួបវិស័យឯកជនចិន ពិភាក្សាអំពីឱកាសនៃការវិនិយោគថ្មីៗ និងភាពជាដៃគូក្នុងវិស័យអាទិភាព ដើម្បីធ្វើពិពិធកម្មមូលដ្ឋាននៃកំណើនសេដ្ឋកិច្ចកម្ពុជា ក៏ដូចជាបង្កើនការនាំចេញផលិតផល ទៅកាន់ទីផ្សារចិនឱ្យបានកាន់តែច្រើន៕