សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រសួងរៀបចំដែនដី នគរូបនីយកម្ម និងសំណង់ បានបើកសិក្ខាសាលាពិគ្រោះយោបល់គោលនយោបាយជាតិស្ដីពីការលើកកម្ពស់ការប្រើប្រាស់សម្ភារៈសំណង់ក្នុងឧស្សាហកម្មគ្រឿងផ្គុំសំណង់ប្រកបដោយសុវត្ថិភាព និងលិខិតបទដ្ឋានគតិយុត្តក្នុងវិស័យសំណង់ នារសៀលថ្ងៃទី ១០ ខែមករា ឆ្នាំ ២០២៥ ក្រោមអធិបតីភាពឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់។
នៅក្នុងអង្គសិក្ខាសាលាពិគ្រោះយោបល់ខាងលើនេះ ឯកឧត្តមឧបនាយករដ្ឋមន្ត្រី សាយ សំអាល់ បានលើកឡើងថា ឯកឧត្តមបានស្នើឱ្យឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដាក់បញ្ចូលឧស្សាហកម្មសំណង់ ឧស្សាហកម្មសង្ហារឹម ឧស្សាហកម្មរុក្ខជាតិលម្អ ឧស្សាហកម្មគ្រឿងបង្គុំសំណង់ ឧស្សាហកម្មចិញ្ចឹមសត្វ ឧស្សាហកម្មកម្ចីប្រាក់ ពីព្រោះឧស្សាហកម្មទាំងនេះចាប់ផ្ដើមមានភាពចាស់ទុំ និងជាប្រភេទឧស្សាហកម្មចាំបាច់សម្រាប់មនុស្សទាំងអស់គ្នា។ ជាក់ស្ដែងដូចជាឧស្សាហកម្មសំណង់ ជាឧស្សាហកម្មដែលត្រូវការស្ថាបត្យករ វិស្វករ និងកម្មករ ហើយថវិកាដែលត្រូវចំណាយក្នុងការធ្វើសំណង់នេះនឹងហូរចាក់ចូលទៅគ្រប់កោសិកានៃសង្គមជាតិ។ ដោយឡែកឧស្សាហកម្មសង្ហារឹមនឹងអាចនាំចេញគ្រឿងសង្ហារឹមទៅលក់នៅក្រៅប្រទេស ដែលប្រៀបបានទៅនឹងការដាក់ទរបង្ហូរចំណូលពីក្រៅប្រទេសចូលមកក្នុងប្រទេសដូចគ្នាដែរ ដូច្នេះឧស្សាហកម្មទាំងពីរនេះត្រូវដើរទន្ទឹមគ្នា។
ឯកឧត្តមក៏បានឱ្យដឹងដែរថា លិខិតបទដ្ឋានគតិយុត្តកំពុងរៀបចំមានចំនួន ១៤, បទបញ្ញត្តិគ្រឿងបង្គុំស្តង់ដាបទដ្ឋានបច្ចេកទេសសំណង់កំពុងរៀបចំមាន ១៦ ,លិខិតបទដ្ឋានគតិយុត្តដែលរៀបចំ និងកំពុងដាក់ជូន អ.ផ.គ.ច មាន៤ និងកំពុងឆ្លងការពិនិត្យពីអន្តរក្រសួងមាន ៣, និងលិខិតបទដ្ឋានដែលគ្រោងរៀបចំមាន ៣៤, លិខិតបទដ្ឋានដែលបានអនុម័តរួច និងកំពុងប្រើប្រាស់សព្វថ្ងៃនេះមានចំនួន៦៧។
ឯកឧត្តមឧបនាយករដ្ឋមន្ត្រី សាយ សំអាល់ បានបំផុសគំនិតដល់អង្គសិក្ខាសាលាក៏ដូចប្រជាពលរដ្ឋ ឱ្យពិចារណាអំពីការប្រើប្រាស់ឱ្យអស់លទ្ធភាពនូវគ្រឿងបង្គុំសំណង់ដែលមានស្រាប់នៅក្នុងស្រុក និងត្រូវដឹងអំពីប្រភេទនៃគ្រឿងបង្គុំសំណង់ដែលត្រូវប្រើប្រាស់សម្រាប់ការសាងសង់ ហើយត្រូវរួមគ្នារិះរកគោលនយោបាយ និងវិធានការដើម្បីគ្រប់គ្រងថែរក្សាធនធានដែលជាគ្រឿងបង្គុំសំណង់ទាំងនោះឱ្យបានល្អនិងមាននិរន្តរភាព ជាប្រយោជន៍ប្រើប្រាស់ក្នុងវិស័យសំណង់សម្រាប់ជំនាន់នេះ និងជំនាន់ក្រោយៗទៀត។
ឯកឧត្តមរដ្ឋមន្ត្រី មានបំណងចង់ឃើញវិស័យសំណង់ គ្រឿងបង្គុំសំណង់ ឧស្សាហកម្មកម្ចីប្រាក់ រុក្ខជាតិលម្អ គឺជាកន្លែងដែលប្រជាជនមានការងារធ្វើ មានប្រាក់ចំណូល ហើយសង្ឃឹមថាតាមរយៈនេះប្រជាពលរដ្ឋគ្រប់រូបនៅក្នុងសង្គមជាតិនឹងមានលំនៅឋានរស់នៅសមរម្យ មានម្ហូបអាហារហូបចុកគ្រប់គ្រាន់ មានការងារធ្វើ និងប្រាក់ចំណូល ហើយកូនចៅប្រជាពលរដ្ឋបានទទួលការសិក្សាអប់រំគ្រប់ៗគ្នា នោះប្រទេសជាតិនឹងរក្សាបាននូវសុខសន្តិភាព និងការរីកចម្រើនតជំនាន់។
នៅក្នុងឱកាសនោះផងដែរ ឯកឧត្តម ឡៅ ទិព្វសីហា រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា សិក្ខាសាលានេះរៀបចំឡើងដើម្បីប្រមូលធាតុចូលសម្រាប់ការតាក់តែងសេចក្តីព្រាងគោលនយោបាយជាតិស្ដីពីការលើកកម្ពស់ការប្រើប្រាស់សម្ភារៈសំណង់ក្នុងឧស្សាហកម្មគ្រឿងផ្គុំសំណង់ប្រកបដោយសុវត្ថិភាព និងលិខិតបទដ្ឋានបទប្បញ្ញត្តិបច្ចេកទេសក្នុងវិស័យសំណង់។
សូមជម្រាបថា នេះជាវេទិកាមួយដ៏សំខាន់ដើម្បីប្រមូលមតិយោបល់ និងធាតុចូលថ្មីបន្ថែមទៀតសម្រាប់ការតាក់តែងលិខិតបទដ្ឋានគតិយុត្ត បទបញ្ញត្តិបច្ចេកទេសទាក់ទងនឹងវិស័យសំណង់ឱ្យកាន់តែមានភាពគ្រប់ជ្រុងជ្រោយ និងអនុវត្តបានប្រកបដោយប្រសិទ្ធភាព ដើម្បីធានាថា សម្ភារៈសំណង់ដែលប្រើប្រាស់មានគុណភាព សុវត្ថិភាព បង្កើនបរិយាកាសដែលអាចជឿទុកចិត្តបានសម្រាប់ម្ចាស់សំណង់ និងអ្នកប្រើប្រាស់សំណង់ ជួយលើកកម្ពស់ការប្រើប្រាស់សម្ភារៈសំណង់ដែលជាផលិតផលក្នុងស្រុក ដែលមានការត្រួតពិនិត្យត្រឹមត្រូវ ចូលរួមក្នុងការអភិវឌ្ឍសេដ្ឋកិច្ចសង្គម និងប្រែក្លាយឧស្សាហកម្មគ្រឿងបង្គុំសំណង់ទៅជាប្រភពចំណូលនៃវិស័យសេដ្ឋកិច្ចជាតិ៕
Account
Security
Favourite Content