ភ្នំពេញ៖ ជាមួយនឹងការរីកចម្រើនឥតឈប់ឈរនៃបច្ចេកវិទ្យាសកល ឧស្សាហកម្មរថយន្តក៏កំពុងមានការផ្លាស់ជាបន្តបន្ទាប់ ជាពិសេសរថយន្តដែលប្រើបច្ចេកវិទ្យាឆ្លាតវៃ និងប្រើប្រាស់ថាមពលអគ្គិសនីកំពុងទទួលបានការចាប់អារម្មណ៍ពីសំណាក់អ្នកប្រើប្រាស់ជាទូទៅជុំវិញពិភពលោក ខណៈដែលរាជរដ្ឋាភិបាលកម្ពុជាក៏កំពុងគាំទ្រ និងជំរុញឱ្យមានប្រើប្រាស់ចូលរួមកាត់បន្ថយការបម្រែបម្រួលអាកាសធាតុនៅលើផែនដី។

នាពេលបច្ចុប្បន្ននេះ បន្ទាប់ពីវត្តមានក្រុមហ៊ុនយានយន្តអគ្គិសនីចិន BYD ,រថយន្តអគ្គិសនី ZEEKR និងរថយន្តអគ្គិសនី TESLA របស់អាម៉េរិក រួមទាំងអគ្គិសនីជាច្រើនទៀតកំពុងចរាចរនៅលើទីផ្សារកម្ពុជា ពេលនេះ រថយន្តដែលផលិតឡើងនៅប្រទេសចិន AITO ដែលដើរដោយថាមពលអគ្គិសនីដ៏ទំនើបចុងក្រោង និងលក់ដាច់បំផុតនៅប្រទេសចិន បានចូលមកដល់ទីផ្សារកម្ពុជាយើងដែរហើយ។

វត្តមានថ្មីរបស់​រថយន្តអគ្គិសនីចិនម៉ាក AITO នេះ បានបង្ហាញឱ្យឃើញពីវឌ្ឍនភាពនៃតម្រូវការរថយន្តអគ្គិសនីកាន់តែច្រើន និងសម្បូរបែបនៅលើទីផ្សារកម្ពុជា ក៏ដូចជាជុំរុញឱ្យឧស្សាហកម្មរថយន្តអគ្គិសនីនៅកម្ពុជាកាន់តែមានភាពប្រកួតប្រជែង និងប្រសើរឡើងមួយកម្រិតទៀត។ ​វត្តមានរថយន្តនេះ មិនត្រឹមតែអាចកាត់បន្ថយការប្រើប្រាស់លើឥន្ធនៈហ្វូស៊ីល និងកាត់បន្ថយការបំភាយឧស្ម័នកាបូនប៉ុណ្ណោះទេ ប៉ុន្តែអ្វីដែលសំខាន់ជាងនេះទៅទៀតនោះគឺវានឹងរួមចំណែកក្នុងការពង្រីកមធ្យោបាយធ្វើដំណើរបៃតងនៅកម្ពុជា ក៏ដូចជាពិភពលោកផងដែរ ខណៈដែលចំនួននៃការប្រើប្រាស់យានយន្តអគ្គិសនីនៅកម្ពុជា បានកើនឡើងពីមួយឆ្នាំទៅមួយឆ្នាំ។

ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានឱ្យដឹងនាពេលកន្លងទៅថ្មីៗនេះថា ការប្រើប្រាស់យានយន្តអគ្គិសនី រួមចំណែកយ៉ាងសំខាន់ក្នុងការកាត់បន្ថយផលប៉ះពាលដែលបង្កឡើងដោយការបំភាយឧស្ម័នកាបូនឌីអុកស៊ីតចេញពីប្រភេទយានយន្តដែលប្រើប្រាស់ប្រេងឥន្ទនៈ។ ទិន្នន័យការប្រើប្រាស់យានយន្តអគ្គិសនីនៅកម្ពុជា គិតត្រឹមខែសីហា ឆ្នាំ២០២៤ យានយន្តអគ្គិសនីចុះបញ្ជីសរុបមានចំនួនជាង ៣ ៦៧៦ គ្រឿង ខណៈដែលទីកន្លែងបញ្ចូលថាមពលអគ្គិសនីនៅទូទាំងប្រទេសមានចំនួន ២១ កន្លែង ដែលមានទូបញ្ចូលអគ្គិសនីបានលឿនបំផុតចំនួន២៧ទូ។

ទាក់ទងនឹងរថយន្ត AITO ដែលទើបមានវត្តមាននៅកម្ពុជា ជាប្រភេទរថយន្តដើរដោយថាមពលអគ្គិសនីដ៏ទំនើបដែលផលិត និងរចនាម៉ូតរួមគ្នាដោយក្រុមហ៊ុន SERES Group និង Huawei ហើយបានក្លាយជាម៉ាករថយន្តដែលប្រណីត និងលក់ដាច់បំផុតនៅក្នុងប្រទេសចិនអស់រយៈពេល២៤ខែជាប់ៗគ្នា។ រថយន្តនេះត្រូវបានចាប់ផ្តើមដាក់ឱ្យដំណើរការជាផ្លូវការទៅកាន់ទីផ្សារអន្តរជាតិនៅខែធ្នូ ឆ្នាំ២០២៤។ បន្ទាប់ពីការបង្ហាញខ្លួនលើកដំបូងនៅឯពិព័រណ៍រថយន្តនៅទីក្រុងប៉ារីស ប្រទេសបារាំង កាលពីខែតុលា ឆ្នាំ២០២៤រួចមក កម្ពុជាក្លាយជាប្រទេសដំបូងគេក្នុងពិភពលោកដែលរថយន្តដើរដោយថាមពលអគ្គិសនី AITO បានចូលមកដល់។

ក្រុមហ៊ុនតំណាងចែកចាយផ្តាច់មុខក្នុងប្រទេសកម្ពុជា គឺ SDB Group ដែលជាក្រុមហ៊ុនចែកចាយរថយន្តដើរដោយថាមពលអគ្គិសនីដ៏ល្បីមួយនៅក្នុងប្រទេសចិន បានប្តេជ្ញានាំយករថយន្តដើរដោយថាមពលអគ្គិសនី បច្ចេកវិទ្យាទំនើប ប្រណីត និងសន្សំសំចៃបំផុតមកកាន់ទីផ្សារកម្ពុជា ជាមួយការធានាសេវាកម្មក្រោយការលក់ដ៏ទូលំទូលាយ។ ក្រុមហ៊ុនក៏នឹងបង្កើតបណ្តាញសេវាបញ្ចូលថាមពលក្នុងប្រទេសកម្ពុជាឱ្យបានច្រើនទីតាំងផងដែរ។

រថយន្តដើរដោយថាមពលអគ្គិសនី AITO គឺជាផលិតផលបច្ចេកវិទ្យាទំនើប និងប្រណីតបំផុត ដែលបានជាប់ចំណាត់ថ្នាក់លេខមួយ ទាំងចំនួននៃការលក់ និងគុណភាពនៅក្នុងប្រទេសចិនអស់រយៈពេលជាច្រើនឆ្នាំមកហើយ។ ជាមួយគ្នានេះ ដោយគិតពីគុណភាព ប្រណីភាព បច្ចេកវិទ្យាទំនើប និងភាពវៃឆ្លាត ហើយការដែលប្រជាជនកម្ពុជាក៏ចាប់អារម្មណ៍ខ្លាំងលើរថយន្តអគ្គិសនីផងនោះ SDB រំពឹងថារថយន្តនេះនឹងទទួលបានការគាំទ្រខ្លាំងពីអ្នកប្រើប្រាស់រថយន្តអគ្គិសនីនៅកម្ពុជា។

រថយន្តដើរដោយថាមពលអគ្គិសនី AITO មិនត្រឹមតែបំពាក់ដោយបច្ចេកវិទ្យាទំនើបប៉ុណ្ណោះទេ ថែមទាំងមានរូបរាងធំទូលាយ និងមានមុខងារស្នូលចំនួន៤គឺ៖ សុវត្ថិភាព និងភាព វៃឆ្លាត ជារថយន្តកូនកាត់ កៅអី អាចបត់បែនបាន និងមុខងារឆ្លាតវៃកម្រិតខ្ពស់។ មុខងារទាំងនេះគាំទ្រជម្រើសថាមពលច្រើនប្រភេទរួមមាន ថាម​ព​ល​អគ្គិសនីទំនើប ថាមពលថ្ម និងជារថយន្តកូនកាត់ទំនើប។

លក្ខណៈពិសេស និងមុខងារផ្សេងទៀតរបស់រថយន្តរួមមាន៖ Intelligent Touring Chassis, Electric Steering, ប្រព័ន្ធហ្វ្រាំងសង្គ្រោះបន្ទាន់, ប្រព័ន្ធបញ្ចៀសគ្រោះអាសន្ន, ប្រព័ន្ធជំនួយការបើកបរ, បំពាក់ Sensor ចំនួន ១២ ជុំវិញរថយន្ត, កាមេរ៉ាឆ្លាតវៃចំនួន១១ ដែលអាចមើលឃើញជុំវិញរថយន្ត, កាមេរ៉ាឆ្លាតវៃសម្រាប់ជំនួយអ្នកបើកបរ, កៅអីម៉ាស្សា កៅអី កម្តៅនិងត្រជាក់ចំនួន៤, បើក/បិទទ្វារដោយស្វ័យប្រវត្តិ (AUTO), កៅអីបត់ចុះ ឡើងស្វ័យ ប្រវត្តិ (កៅអីខាងស្តាំ ជួរខាងមុខ និងជួរកណ្តាលគឺពិសេសបំផុត),អេក្រង់ស្គ្រីនបញ្ជាធំទំហំ១០អិញ, មាន KTV, ប្រព័ន្ធសាកថ្មទូរស័ព្ទឥតខ្សែចំនួន២កន្លែង។

សូមជម្រាប់ថា ពិធីសម្ពោធភ្នាក់ងារចែកចាយផ្តាច់មុខរថយន្តអគ្គិសនី ម៉ាក AITO នៅកម្ពុជាត្រូវបានប្រារព្ធឡើងនៅទីតាំងលក់រថយន្ត SDB ផ្លូវសហព័ន្ធរុស្សី ជិតក្រសួងពាណិជ្ជ​ក​ម្ម កាលពីថ្ងៃទី១២ ខែមករា ឆ្នាំ២០២៥ ៕