ភ្នំពេញ ៖ ការកំណត់វិន័យហិរញ្ញវត្ថុ និងការរៀបចំផែនការហិរញ្ញវត្ថុបានច្បាស់លាស់ និងត្រឹមត្រូវ អាចជួយឱ្យអាជីវកម្មរបស់លោកអ្នកមានភាពរីកចម្រើន និងជីវភាពកាន់តែប្រសើរឡើង។ ជាក់ស្តែង លោក ពៅ ពូន ម្ចាស់អាជីវកម្មលក់បាយម្ហូបនៅស្រុកកណ្តាលស្ទឹង ខេត្តកណ្តាល បានប្រើប្រាស់កម្ចីពីគ្រឹះស្ថានមីក្រូហិរញ្ញវត្ថុមួយ ហើយបានកំណត់វិន័យហិរញ្ញវត្ថុផ្ទាល់ខ្លួន ភ្ជាប់ជាមួយនឹងផែនការអាជីវកម្មច្បាស់លាស់ ដោយមិនប្រើប្រាស់លុយពីកម្ចីផ្តេសផ្តាស និងបានជួយជីវភាពគ្រួសាររបស់លោកភាពប្រសើរឡើង។

លោក ពៅ ពូន បានរៀបរាប់ថា កាលពីមុន លោកមានរបរជាកសិករធ្វើការស្រែចម្ការ​ ហើយមានជីវភាពមានគ្រួសារមធ្យម។ នៅពេលលោកធ្វើស្រែចម្ការ មានពេលខ្លះ លោកទទួលបានផលទាប ហើយថែមទាំងទទួលបានតម្លៃទាបនៅពេលយកទៅកាន់ទីផ្សារទៀតផង។ ដោយឃើញស្ថានភាពដូច្នេះ លោកបានសម្រេចចិត្តបើកហាងបាយ គុយទាវមួយកន្លែងដោយប្រើប្រាស់ប្រាក់សន្សំរបស់លោកខ្លះ និងប្រើប្រាស់កម្ចីពីគ្រឹះស្ថានហិរញ្ញវត្ថុខ្លះរួមផ្សំគ្នា ដើម្បីអាចបើកហាងនេះ។​ លើកទី១​ លោកដាក់ស្នើសុំកម្ចី ដើម្បីទិញដី និងសម្ភាៈសម្រាប់បើកដំណើរការហាងបាយ និងគុយទានេះ។

បន្ទាប់ប្រើប្រាស់កម្ចីហើយ លើកបានបើកដំណើរការហាង និងទទួលបានភាពរីកចម្រើនជាបន្តបន្ទាប់ដោយមានការគាំទ្រច្រើនពីអតិថិជន ជាពិសេសអ្នកដែលរស់នៅក្នុងតំបន់តែម្ដង ហើយពីមួយថ្ងៃទីទៅមួយថ្ងៃ លុយរបស់លោកកាន់តែកើនឡើង និងបានពង្រីកអាជីវកម្មបន្ថែមដោយការសាងសង់ខ្យុះ។

ទាក់ទងនឹងប្រើប្រាស់កម្ចីពីគ្រឹះស្ថានហិរញ្ញវត្ថុនេះ លោកបានថ្លែងដូច្នេះថា ៖

«ខ្ញុំយកលុយហ្នឹង ខ្ញុំអត់យកទៅចាយវាយផ្តេសផ្តាសនោះទេ។​ គោលការណ៍របស់ខ្ញុំគឺយកមកពង្រីកមុខរបរ។ គាត់​ (គ្រឹះស្ថានហិរញ្ញវត្ថុ សំដៅធនាគារ និងគ្រឹះស្ថានមីក្រូហិរញ្ញវត្ថុ) ឱ្យលុយមកហើយ ហើយបើយើងយកមកប្រើប្រាស់មិនចំគោលដៅ និងចេះតែចាយផ្តេសផ្តាស ចឹងលុយហ្នឹងគឺអស់ហើយ»។

បន្ទាប់ពីគោរពតាមវិន័យហិរញ្ញវត្ថុ​ និងផែនការអាជីវកម្ម លោក ពៅ ពូន បានគូសបញ្ជាក់ថា ជីវភាពរបស់លោកមានភាពរីកចម្រើនពីមួយទ្វេទៅជាបី ហើយអាចមានលទ្ធភាពគ្រប់គ្រាន់ក្នុងការផ្គត់ផ្គង់ការសិក្សារបស់កូន និងអាចសន្សំបានទ្រព្យសម្បត្តិនៅក្នុងគ្រួសារច្រើនគួរសម។

​លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា​ ធ្លាប់បានលើកឡើងថា ការខ្ចីលុយ ឬជំពាក់លុយធនាគារ ឬមីក្រូហិរញ្ញវត្ថុ គឺមិនមែនជារឿងអាក្រក់នោះទេ។ អ្វីដែលសំខាន់នោះគឺថា តើអ្នកខ្ចីលុយពីប្រព័ន្ធធនាគារទាំងនោះ បានប្រើប្រាស់ចំគោលដៅ ឬតាមតម្រូវជាក់ស្តែងក្នុងជីវភាពរស់នៅ ឬអត់? 

លោកជំទាវ មានប្រសាសន៍បន្តថា ៖

«ការណ៍ដែលខ្ចីលុយគេមិនមែនសុទ្ធតែអាក្រក់ទេ។ សំខាន់ពេលទៅខ្ចីលុយគេ ហើយត្រូវដឹងថា​ ​យកលុយទៅប្រើប្រាស់អ្វីពិតប្រាកដ។ បើខ្ចីលុយគេទៅរកស៊ីជួញដូរ ដើម្បីបានចំណូលបន្ថែម ហើយសងគេវិញ នោះជាការណ៍ល្អ តែបើខ្ចីលុយគេយកទៅប្រើខុសគោដៅ ដូចជា ដូរស៊េរីម៉ូតូ ដូរទូរសព្ទថ្មី ឬប្រើប្រាស់លើសម្ភារៈនិយម គឺខុស​ហើយ»។ ​

ជាមួយគ្នានេះ ទេសាភិបាលធនាគារជាតិ ក៏បានលើកទឹកចិត្តឱ្យប្រជាពលរដ្ឋបង្កើត​ទម្លាប់​សន្សំប្រាក់  និងត្រូវសន្សំជាមួយគ្រឹះស្ថានផ្លូវការ