សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គម្រោងផ្លូវជាតិលេខ៣៣ ប្រវែង ៥២,៥៧គីឡូម៉ែត្រ ពីទីរួមខេត្តកំពត ដល់ច្រកព្រំដែនអន្តរជាតិកម្ពុជា – វៀតណាម ព្រែកចាក នឹងត្រូវដាក់សម្ពោធឱ្យប្រើប្រាស់ជាផ្លូវការនៅពេលឆាប់ៗនេះហើយដោយមានការអញ្ជើញជាអធិបតីពីសំណាក់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ខណៈបច្ចុប្បន្ន ការសាងសង់បានចប់សព្វគ្រប់ជាស្ថាពរហើយ ។
ឯកឧត្តម ប៉ាល់ ចន្ទតារា រដ្ឋលេខាធិការ ក្រសួងសាធារណការ និងដឹកជញ្ជូន និងជានាយកគម្រោងបានអញ្ជើញដឹកនាំក្រុមការងារចុះពិនិត្យការងារពង្រីក និងលើកកម្រិតគុណភាពគម្រោងផ្លូវជាតិលេខ៣៣ ចាប់ពីខេត្តកំពត ដល់ច្រកព្រំដែនអន្តរជាតិព្រែកចាក (ព្រំដែនកម្ពុជា-វៀតណាម) និងទីតាំងប្រារព្ធពិធីសម្រាប់ត្រៀមដាក់សម្ពោធផ្លូវការនាពេលឆាប់ៗខាងមុខ ដោយមានការចូលរួមពី ឯកឧត្តមអនុរដ្ឋលេខាធិការ សមាជិកក្រុមការងារពាក់ព័ន្ធ ក្រុមការងារបច្ចេកទេសរបស់ក្រុមហ៊ុនសាជីវកម្មស្ពាន និងថ្នល់ចិន (CRBC) និងតំណាងក្រុមហ៊ុនទីប្រឹក្សាបច្ចេកទេសក្វាងចូវ វ៉ានអាន ផងដែរ ។
ការចុះពិនិត្យនេះក្នុងគោលបំណងពិនិត្យមើលស្ថានភាពផ្លូវថ្នល់នៅក្រោយពេលសាងសង់បន្ទាប់ពីធ្វើការប្រគល់-ទទួលរួចរាល់ រក្សាបាននូវគុណភាពល្អ និងអាចប្រើប្រាស់បានយូរអង្វែង ជាពិសេសស្វែងរកទីតាំងល្អសម្រាប់ប្រារព្ធពិធី ដែលត្រៀមដាក់សម្ពោធជាផ្លូវការនាពេលឆាប់ៗខាងមុខ ក្រោមអធិបតីភាពដ៏ខ្ពង់ខ្ពស់របស់សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជណាចក្រកម្ពុជា។
ឯកឧត្តម បានថ្លែងអំណរគុណដល់គ្រប់ផ្នែកពាក់ព័ន្ធ ជាពិសេសក្រុមហ៊ុនសាជីវកម្មស្ពាន និងថ្នល់ចិន (CRBC) ដែលបានខិតខំបំពេញកិច្ចការងារថែទាំផ្លូវមួយខ្សែនេះដោយយកចិត្តទុកដាក់ធ្វើឱ្យមានភាពងាយស្រួលដល់ការធ្វើដំណើររបស់បងប្អូនប្រជាពលរដ្ឋ រួមទាំងការដឹកជញ្ជូនទំនិញឆ្លងកាត់ផងដែរ។
គម្រោងនេះ ត្រូវបានប្រកាសបើកការដ្ឋានជាផ្លូវការកាលពីថ្ងៃទី៣០ ខែធ្នូ ឆ្នាំ២០២២ ដោយមានប្រវែងប្រមាណ ៥២,៥៧ គីឡូម៉ែត្រ តភ្ជាប់ពីខេត្តកំពត (បំបែកពីផ្លូវជាតិលេខ៣ ត្រង់ចំណុចគ.ម១៤៨+១០០) ទៅកាន់ច្រក ព្រំដែនអន្តរជាតិព្រែកចាក (ព្រំដែនកម្ពុជា-វៀតណាម) ឆ្លងកាត់ភូមិសាស្រ្ត ស្រុកទឹកឈូ និងស្រុកកំពង់ត្រាច នៃខេត្តកំពត ហើយឆ្លងកាត់ភូមិសាស្រ្តក្រុងកែប និងស្រុកដំណាក់ចង្អើរ នៃខេត្តកែប ។
គម្រោងមួយនេះក៏ជាផ្នែកមួយនៃការអភិវឌ្ឍហេដ្ឋារចនាសម្ព័ន្ធក្នុងគម្រោងអភិវឌ្ឍន៍តំបន់ឆ្នេរដែលជាផែនការរបស់រាជរដ្ឋាភិបាលផងដែរ ព្រោះថាគម្រោងផ្លូវមួយខ្សែនេះនឹងអាចសម្រួលដល់ពលរដ្ឋទាំងក្នុងតំបន់ និងពលរដ្ឋដែលធ្វើដំណើរឆ្លងកាត់ ជាពិសេសភ្ញៀវទេសចរក្នុងការធ្វើដំណើរកម្សាន្តទៅតាមរមណីយដ្ឋាននានាក្នុងខេត្តកំពត និងខេត្តកែប ។
គួរបញ្ជាក់ថា ខេត្តកំពត និងកែប គឺជាខេត្តដ៏មានសក្ដានុពលមួយទាំងនៅពេលបច្ចុប្បន្ន និងអនាគត ដោយបច្ចុប្បន្ននេះ ក្នុងខេត្តកំពត និងកែប ត្រូវរាជរដ្ឋាភិបាលកំពុងវិនិយោគលើហេដ្ឋារចនាសម្ព័ន្ធឆ្នេរកម្សាន្តសម្រាប់ទាក់ទាញទេសចរជាតិ និងអន្តរជាតិ ហើយនៅពេលអនាគត គម្រោងព្រែកជីកហ្វូណនតេជោតភ្ជាប់ពីភ្នំពេញទៅកាន់កំពង់ផែសមុទ្រខេត្តកែប ហើយភ្ជាប់ទៅកំពង់ផែខេត្តកំពត និងខេត្តព្រះសីហនុ ហើយបន្តទៅកាន់កំពង់ផែជាច្រើនទៀតលើពិភពលោក ។ ដូច្នេះ ខេត្តនៅតំបន់សមុទ្រកម្ពុជា នៅពេលអនាគតនឹងកាន់តែមានការអភិវឌ្ឍ និងមានសក្ដានុពលកាន់តែខ្លាំងក្នុងការទាក់ទាញការវិនិយោគពីក្នុង និងក្រៅប្រទេស៕
Account
Security
Favourite Content