សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី BBC បានរាយការណ៍ថា រដ្ឋាភិបាលចិនបានសន្យាផ្តល់ប្រាក់ឧបត្ថម្ភលើការថែទាំកុមារ បង្កើនប្រាក់ឈ្នួល ព្រមទាំងការឈប់សម្រាកដែលមានប្រាក់ឈ្នួលល្អប្រសើរជាងមុន ដើម្បីប្រជាពលរដ្ឋមានលទ្ធភាព និងចំណាយលើការប្រើប្រាស់ផលិតផលក្នុងស្រុក ក្នុងគោលបំណងស្តារសេដ្ឋកិច្ចដែលកំពុងធ្លាក់ចុះ។
បន្ទាប់ពីប្រជុំសភាប្រចាំឆ្នាំកាលពីសប្តាហ៍មុន ទីក្រុងប៉េកាំង គ្រោងនឹងបង្កើនការវិនិយោគនៅក្នុងកម្មវិធីសុខុមាលភាពសង្គមដែលជាផ្នែកនៃផែនការសេដ្ឋកិច្ចដ៏ធំរបស់ខ្លួនសម្រាប់ឆ្នាំ២០២៥ ដើម្បីដោះស្រាយវិបត្តិសេដ្ឋកិច្ច និងតម្រូវការក្នុងស្រុកដែលកំពុងចុះខ្សោយ។ ទីក្រុងប៉េកាំង នឹងបង្កើនកិច្ចខិតខំប្រឹងប្រែងដើម្បីជំរុញទីផ្សារអ្នកប្រើប្រាស់ក្នុងស្រុកឲ្យកាន់តែរឹងមាំ ប្រាក់ឈ្នួលខ្ពស់ បណ្តាញសង្គមកាន់តែសុវត្ថិភាពជាងមុន និងគោលនយោបាយដែលធ្វើឱ្យពលរដ្ឋមានអារម្មណ៍ថា មានសុវត្ថិភាពគ្រប់គ្រាន់ក្នុងការចំណាយជាជាងសន្សំ។
វិធានការនេះគឺបន្ថែមពីលើកម្មវិធីបញ្ចុះតម្លៃ ៤១ ពាន់លានដុល្លារសម្រាប់ផលិតផលប្រើប្រាស់ក្នុងផ្ទះសម្រាប់ពលរដ្ឋចិន។ ជាមួយគ្នានេះ ដើម្បីស្តារសេដ្ឋកិច្ចដែលកំពុងនៅទ្រឹង ទីក្រុងប៉េកាំង បន្តបញ្ចេញថវិកាលើកទឹកចិត្តឱ្យពលរដ្ឋបង្កើនការចំណាយ ដោយសារការប្រើប្រាស់ក្នុងស្រុករបស់ចិនមានការធ្លាក់ចុះជាខ្លាំង ខណៈវិស័យអចលនទ្រព្យធ្លាក់ចូលវិបត្តិធ្ងន់ធ្ងរ។ ដូច្នោះហើយ ការធ្លាក់ចុះនៃតម្លៃទំនិញ ឬ ការបញ្ចុះតម្លៃ គឺជាដំណឹងល្អសម្រាប់អ្នកប្រើប្រាស់ក្នុងស្រុក។ កាលពីថ្ងៃច័ន្ទ ទិន្នន័យផ្លូវការបង្ហាញថា ការលក់រាយបានកើនឡើង ៤ ភាគរយក្នុងរយៈពេលពីរខែដំបូងនៃឆ្នាំ ២០២៥ ដែលជាសញ្ញាវិជ្ជមានសម្រាប់ការប្រើប្រាស់។
ការធ្លាក់ចុះជាបន្តបន្ទាប់នូវការប្រើប្រាស់ក្នុងស្រុកជាសញ្ញានៃបញ្ហាសេដ្ឋកិច្ចកាន់តែជ្រៅ ដោយសារការកាត់បន្ថយការចំណាយរបស់អ្នកប្រើប្រាស់ មានន័យថា ពួកគេរកចំណូលបានតិច និងមានសម្ពាធពីការធ្លាក់ចុះសេដ្ឋកិច្ច។ បញ្ហានេះគឺជាអ្វីដែលចិនចង់ជៀសឲ្យបានផុត ដោយសារតែខ្លួនកំពុងប្រយុទ្ធនឹងកំណើនយឺតរួចទៅហើយ បន្ទាប់ពីមានវិបត្តិក្នុងទីផ្សារអចលនទ្រព្យ បំណុលរដ្ឋាភិបាលខ្ពស់ និងអត្រាអត់ការងារធ្វើខ្ពស់។ យ៉ាងណាមិញ ចិនបានកំណត់គោលដៅសម្រាប់កំណើនសេដ្ឋកិច្ច ៥ ភាគរយនៅឆ្នាំនេះ ហើយការជំរុញការប្រើប្រាស់គឺជាអាទិភាពកំពូលសម្រាប់ប្រធានាធិបតី Xi Jinping ដោយមានក្តីសង្ឃឹមថា ផលប៉ះពាល់នៃពន្ធរបស់សហរដ្ឋអាម៉េរិកលើការនាំចេញរបស់ចិននឹងត្រូវបានកាត់បន្ថយដោយការកើនឡើងនៃការប្រើប្រាស់ក្នុងស្រុក៕
Account
Security
Favourite Content