សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ដូងពីខេត្តកំពតកំពុងត្រូវបាននាំមកលក់នៅតាមតូប និងរទេះចល័តក្នុងរាជធានីភ្នំពេញ ដោយអ្នកលក់រាយមួយចំនួនអាចលក់បានពី ១០ផ្លែ រហូតដល់ ៨០ផ្លែក្នុងមួយថ្ងៃ និងរកចំណូលបានពី ៦ម៉ឺនរៀល រហូតដល់ជិត ៣០ម៉ឺនរៀលក្នុងមួយថ្ងៃ។ សម្រាប់អ្នកប្រកបរបរខ្នាតតូចទាំងនេះ ការលក់ដូងបានក្លាយជាប្រភពចំណូលមួយជួយផ្គត់ផ្គង់ជីវភាពគ្រួសារ។
អ្នកលក់ដូងនៅតំបន់ផ្សេងៗក្នុងភ្នំពេញបានប្រាប់បណ្តាញសារព័ត៌មាន AMS ថា ដូងដែលពួកគេយកមកលក់ភាគច្រើនមានប្រភពពីខេត្តកំពត។ អ្នកលក់ខ្លះលក់ជាផ្លែ ខណៈអ្នកខ្លះកាប់យកទឹក និងសាច់ដូងដាក់កែវលក់ ដោយតម្លៃអាចខុសគ្នាទៅតាមរបៀបលក់ និងទីតាំង។
អ្នកស្រី តុល ស្រីរ័ត្ន អ្នកលក់ផ្លែដូងតាមតូបមុខផ្ទះម្ដុំផ្លូវភូមិព្រែកតាសេក សង្កាត់ព្រែកលៀប ខណ្ឌជ្រោយចង្វា បានប្រាប់ថា អ្នកស្រីលក់ផ្លែដូងប្រមាណ ១០ ទៅ ២០ផ្លែក្នុងមួយថ្ងៃ រួមជាមួយកាហ្វេ និងភេសជ្ជៈផ្សេងទៀត។
អ្នកស្រីថា នៅពេលអាកាសធាតុក្តៅ មានអ្នកទិញទឹកដូង និងផ្លែដូងច្រើន ហើយការលក់អាចឡើងដល់ប្រមាណ ៣០ផ្លែក្នុងមួយថ្ងៃ តែរដូវភ្លៀងការលក់មិនសូវដាច់។
អ្នកស្រីបន្តថា ដូងដែលយកមកលក់មានប្រភពពីខេត្តកំពត ដោយក្នុងមួយលើកអ្នកស្រីទិញជាង ១០០ផ្លែ ឬប្រមាណ ១០ឡូ ក្នុងរយៈពេល ២ ទៅ ៣ថ្ងៃ។ ផ្លែដូងមួយលក់ក្នុងតម្លៃ ៣ ៥០០រៀល ហើយអាចរកចំណូលបានប្រមាណ ៦ម៉ឺនរៀលក្នុងមួយថ្ងៃ។
ចំណែកលោក ជា ដូង អ្នកលក់ដូងតាមរ៉ឺម៉កចល័ត បានប្រាប់ AMS ថា លោកជាអ្នកស្រុកព្រៃកប្បាស ខេត្តតាកែវ ហើយដូងដែលយកមកលក់មានប្រភពពីខេត្តកំពត។ លោកចាប់ផ្តើមលក់តាំងពីម៉ោង ៦ព្រឹក រហូតដល់ម៉ោង ១០យប់។
លោកកត់សម្គាល់ថា ដូងដែលមានរសជាតិផ្អែម គឺដូងក្រហមរបស់អ្នកខេត្តកំពត ប៉ុន្តែពេលទិញដូងមកលក់ អ្នកដឹកជញ្ជូនមិនអនុញ្ញាតឱ្យអ្នកលក់ជ្រើសរើសតាមចិត្តនោះទេ។
អ្នកលក់ដូងវ័យ ២៩ឆ្នាំរូបនេះបន្តថា ទោះបីការលក់ត្រូវធ្វើដំណើរតាមដងផ្លូវ និងហាលថ្ងៃក៏ដោយ លោកអាចលក់ដូងបានប្រមាណ ៣០ ទៅ ៥០ផ្លែក្នុងមួយថ្ងៃ។ លោកកាប់យកទឹកដាក់កែវលក់ជាមួយសាច់ដូង ក្នុងតម្លៃ ៤ ០០០រៀលក្នុងមួយកែវ។
យ៉ាងណាក៏ដោយ លោកថា ការលក់ដូងបច្ចុប្បន្នមិនសូវដាច់ដូចមុនទេ ដោយអ្នកហូបមួយចំនួនងាកទៅរកភេសជ្ជៈកាហ្វេឆុងម៉ាស៊ីន ប៉ុន្តែលោកនៅតែអាចរកចំណូលបានខ្លះពីមុខរបរនេះ។
លោកបានបញ្ជាក់ថា៖ «មុខរបរនេះបច្ចុប្បន្នលំបាកបន្តិច ហើយបើគិតទៅដល់ការចល័តលក់ ចំពេលដែលសាំងកំពុងហក់ឡើងថ្លៃខ្ពស់ យើងពិបាកនឹងរកចំណេញណាស់»។
សម្រាប់លោក ស៊ាត ប៉េស អាជីវករលក់ដូងតាមរ៉ឺម៉កនៅមុខអគារពន្ធដារថ្មី ក្នុងខណ្ឌជ្រោយចង្វា រាជធានីភ្នំពេញ មុខរបរនេះអាចផ្តល់ចំណូលជាមធ្យមប្រមាណ ២៨ម៉ឺនរៀលក្នុងមួយថ្ងៃ។
លោក ប៉េស បានប្រកបមុខរបរលក់ដូងប្រមាណ ៦ឆ្នាំមកហើយ ប៉ុន្តែការលក់មិនសូវកាក់កបទេ រហូតដល់មានអគារពន្ធដារថ្មីនៅតំបន់នោះ។ បច្ចុប្បន្ន លោកអាចលក់ដូងបានប្រមាណ ៧០ ទៅ ៨០ផ្លែក្នុងមួយថ្ងៃ ក្នុងតម្លៃ ៣ ៥០០រៀលក្នុងមួយផ្លែ ឬ ៤ ០០០រៀល ប្រសិនបើដាក់ក្នុងកែវ។
លោក ប៉េស បញ្ជាក់ថា ទោះបីមុខរបរនេះមិនមែនជាអាជីវកម្មធំដុំក៏ដោយ ក៏ចំណូលដែលទទួលបានអាចជួយផ្គត់ផ្គង់ជីវភាព និងការសិក្សារបស់កូនក្នុងបន្ទុកគ្រួសារចំនួន ២នាក់បាន។
លោកថា មុខរបរលក់ដូងមិនមានតែតាមរដូវកាលនោះទេ ហើយលោកលក់ជារៀងរាល់ថ្ងៃ ទាំងខែវស្សា និងខែប្រាំង។ ទោះជាយ៉ាងណា ការលក់នៅថ្ងៃសៅរ៍ និងអាទិត្យមិនសូវដាច់ដូចថ្ងៃចន្ទដល់សុក្រទេ ដោយសារជាថ្ងៃឈប់សម្រាកការងារ។
លោក ប៉េស ដែលមានស្រុកកំណើតនៅខេត្តព្រៃវែង មានភរិយា និងកូនក្នុងបន្ទុក ២នាក់ បានឱ្យដឹងថា ចំណូលពីការលក់ដូងតាមរ៉ឺម៉កបានជួយសម្រួលដល់ជីវភាពគ្រួសារ និងការសិក្សារបស់កូនៗ។ ចំពោះការកើនឡើងនៃថ្លៃសាំង លោករំពឹងថា រាជរដ្ឋាភិបាលនឹងគិតគូរពីសុខទុក្ខរបស់ប្រជាពលរដ្ឋ។
លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) បានមានប្រសាសន៍ថា ការកើនឡើងនៃតម្លៃសាំង និងហ្គាស ពិតជាមានផលប៉ះពាល់ខ្លាំងដល់អ្នកប្រកបអាជីវកម្ម និងអ្នកលក់ដូរខ្នាតតូចក្នុងវិស័យសេដ្ឋកិច្ចក្រៅប្រព័ន្ធ ហើយអាចធ្វើឱ្យទំនិញឡើងថ្លៃជាបន្តបន្ទាប់។
លោកបានអំពាវនាវឱ្យរាជរដ្ឋាភិបាលគិតគូរឡើងវិញចំពោះផលប៉ះពាល់ពីការកើនឡើងនៃថ្លៃសាំង និងហ្គាស ដោយអាចពិចារណាលើការឧបត្ថម្ភធន ដើម្បីជួយឱ្យតម្លៃសាំង និងហ្គាសចុះថ្លៃ ឬផ្ទេរសាច់ប្រាក់ទៅកាន់អាជីវកម្មខ្នាតតូចដែលរងផលប៉ះពាល់។
លោក វន់ ពៅ បញ្ជាក់ថា វិធានការទាំងនេះអាចជួយសម្រួលដល់ជីវភាពរបស់អ្នកប្រកបអាជីវកម្មខ្នាតតូច កាត់បន្ថយភាពក្រីក្រ និងជំរុញកំណើនសេដ្ឋកិច្ច។
សម្រាប់អ្នកលក់ដូង មុខរបរដែលចាប់ផ្តើមបានដោយមិនត្រូវការដើមទុនធំ និងមិនចាំបាច់មានហាងធំដុំ បានផ្តល់ជាប្រភពចំណូលប្រចាំថ្ងៃសម្រាប់គ្រួសារ ខណៈដូងពីខេត្តកំពតបន្តធ្វើដំណើរពីប្រភពផលិតកម្មមកកាន់ទីផ្សារលក់រាយនៅរាជធានីភ្នំពេញ៕
Account
Security
Favourite Content