សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ មន្ត្រីជាន់ខ្ពស់រាជរដ្ឋាភិបាលកម្ពុជា បានបង្ហាញពីជំនឿ និងបានរក្សានូវការព្យាករណ៍លើកំណើនសេដ្ឋកិច្ចកម្ពុជានៅក្នុងឆ្នាំ២០២៤ ក្នុងរង្វង់៦ភាគរយ ហើយបន្តកើនឡើងរហូតដល់ប្រមាណ ៦,៣ភាគរយនៅក្នុងឆ្នាំ២០២៥ ដោយសារតែភាពល្អប្រសើរនៃកិច្ចទំនាក់ទំនងរបស់កម្ពុជា ជាមួយបណ្តាប្រទេសជាដៃគូពាណិជ្ជកម្មសំខាន់ ជាពិសេស ភាពទាក់ទាញលើការវិនិយោគបន្ថែមពីក្រៅប្រទេសក្រោមម្លប់សន្តិភាព ស្ថិរភាពនយោបាយ និងសន្តិសុខសង្គមរបស់កម្ពុជា។
ឯកឧត្តម អគ្គបណ្ឌិត្យសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានថ្លែងក្នុងទិវាប្រព័ន្ធអេកូឡូស៊ីសហគ្រិនភាពកាលពីថ្ងៃដើមសប្ដាហ៍នេះថា គោលនយោបាយប្រកបដោយភាពប្រុងប្រយ័ត្ន និងការខិតខំប្រឹងប្រែងអស់ពីសមត្ថភាពរបស់រាជរដ្ឋាភិបាល បានធ្វើឱ្យសេដ្ឋកិច្ចរបស់ប្រទេសកម្ពុជាមានកំណើន។ ការលើកកម្ពស់ផលិតភាពនៃសេដ្ឋកិច្ច ដែលជាមូលដ្ឋានគ្រឹះ និងជាមធ្យោបាយដ៏សំខាន់ក្នុងការសម្រេចបាននូវចក្ខុវិស័យកម្ពុជាឆ្នាំ២០៥០ សំដៅប្រែក្លាយកម្ពុជាទៅជាប្រទេសដែលមានប្រាក់ចំណូលខ្ពស់។
ឯកឧត្តមអគ្គបណ្ឌិត្យសភាចារ្យ អូន ព័ន្ធមុនីរ័ត្ន បានបញ្ជាក់ថា៖
«ជាមួយនឹងការខិតខំប្រឹងប្រែងយ៉ាងសកម្មទាំងអស់នេះ សេដ្ឋកិច្ចកម្ពុជាត្រូវបានព្យាករណ៍ថា នឹងកើនឡើងក្នុងរង្វង់ ៦ ភាគរយនៅឆ្នាំ ២០២៤ និងបន្តកើនឡើងក្នុងរង្វង់៦.៣ ភាគរយនៅឆ្នាំ២០២៥»។
ឯកឧត្តមអគ្គបណ្ឌិត្យសភាចារ្យ បានមានប្រសាសន៍ថា កម្ពុជាធានាបាននូវអធិបតេយ្យភាពជាតិ សន្តិសុខ សណ្តាប់ធ្នាប់សង្គម និងស្ថិរភាពនយោបាយ ព្រមទាំងរក្សាបាននូវម៉ាក្រូសេដ្ឋកិច្ច និងស្ថិរភាពហិរញ្ញវត្ថុសាធារណៈ ។ ជាមួយនឹងគោលដៅនេះ រដ្ឋាភិបាលបានដាក់ចេញនូវយុទ្ធសាស្ត្របញ្ចកោណដំណាក់កាលទី១សម្រាប់កំណើន ការងារ សមធម៌ ប្រសិទ្ធភាព និងចីរភាព ដោយកំណត់អាទិភាពសំខាន់ៗចំនួន ៥ គឺ មនុស្ស ផ្លូវ ទឹក ភ្លើង និងបច្ចេកវិទ្យា ជាពិសេសបច្ចេកវិទ្យាឌីជីថល ដើម្បីឆ្លើយតបទៅនឹងការបដិវត្តន៍ឧស្សាហកម្ម 4.0 និងបដិវត្តន៍ឌីជីថលនៃសេដ្ឋកិច្ច និងសង្គមកម្ពុជា។
លោកជំទាវ ចម និម្មល បានថ្លែងកាលពីថ្មីៗនេះថា ឧស្សាហកម្មវាយនភណ្ឌ សម្លៀកបំពាក់ និងស្បែកជើង គឺជាវិស័យអាទិភាពរបស់កម្ពុជា ហើយបានរួមចំណែកយ៉ាងសំខាន់ផងដែរក្នុងការអភិវឌ្ឍន៍សេដ្ឋកិច្ច និងសង្គម ដោយភាគច្រើន [ប្រមាណ៨០% នៃនិយោជិតក្នុងវិស័យទាំងនោះគឺជាស្ត្រី។ ដូចនេះហើយស្ត្រីមានតួនាទីសំខាន់ខ្លាំងណាស់ក្នុងការចូលរួមក្នុងកម្មវិធី អភិវឌ្ឍសេដ្ឋកិច្ចជាតិរបស់រាជរដ្ឋាភិបាល។
គួរបញ្ជាក់ដែរថា បច្ចុប្បន្ន កម្ពុជា ជាសមាជិកនៃតំបន់ពាណិជ្ជកម្មសេរីចិន-អាស៊ាន (China-ASEAN Free Trade Area) និងមានកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP)។ ព្រះរាជាណាចក្រកម្ពុជាក៏មានកិច្ចព្រមព្រៀងពាណិជ្ជកម្មសេរីទ្វេភាគីជាមួយប្រទេសចិន កូរ៉េខាងត្បូង និងអេមីរ៉ាតអារ៉ាប់រួមផងដែរ ដែលទាំងនេះជាច្រកដ៏ទូលាយរបស់កម្ពុជាក្នុងការទាក់ទាញ់ទុនវិនិយោគពីបរទេសបន្ថែម ក៏ដូចជាជំរុញការនាំចេញពីកម្ពុជាទៅកាន់ទីផ្សារប្រទេសដែលជាដៃគូពាណិជ្ជកម្មបានយ៉ាងប្រសើរ៕
Account
Security
Favourite Content