សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គម្រោងអភិវឌ្ឍន៍រោងចក្រអគ្គិសនីដុតធ្យូងថ្មមួយនៅខេត្តកោះកុង តម្លៃ ១០០០លានដុល្លារ និងបង្កើតការងារប្រមាណ ៣៦០នាក់ ត្រូវបានប្រមុខរាជរដ្ឋាភិបាលកម្ពុជាប្រកាសបញ្ឈប់ការអភិវឌ្ឍចាប់ពីពេលនេះតទៅ ហើយឱ្យបង្វែគម្រោងនេះទៅអភិវឌ្ឍន៍គម្រោងផ្សេងវិញ ។
នៅក្នុងពិធីបិទស្ទឹងសាងសង់ទំនប់វារីអគ្គិសនីស្ទឹងតាតៃលើ កាលពីចុងខែវិច្ឆិកា ២០២៣ កន្លងទៅនេះ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានប្រកាសបញ្ឈប់ការអភិវឌ្ឍគម្រោងរោងចក្រផលិតអគ្គិសនីមួយមានតម្លៃ ១០០០លានដុល្លារអាមេរិក និងបញ្ជាឱ្យក្រសួងរ៉ែ និងថាមពល ពិភាក្សាជាមួយក្រុមហ៊ុនវិនិយោគពិនិត្យលទ្ធភាពប្តូរគម្រោងវិនិយោគផលិតអគ្គិសនីដុតធ្យូងថ្មនេះ ទៅជាគម្រោងផលិតអគ្គិសនីដុតឧស្ម័ន ដែលបំភាយឧស្ម័នកាបូនតិចតួចវិញ ។
ជាមួយគ្នានេះ សម្ដេចក៏បានលើកទឹកចិត្តឱ្យប្រជាពលរដ្ឋកម្ពុជាប្រើប្រាស់រថយន្តអគ្គិសនី ពីព្រោះថាការប្រើប្រាស់រថយន្តអគ្គិសនីជួយបង្កើនប្រសិទ្ធភាពនៃការប្រើប្រាស់ថាមពល ដោយសារតែការប្រើម៉ូទ័រអគ្គិសនី គឺជាមានប្រសិទ្ធភាពជាងការប្រើម៉ូទ័រឥន្ធនៈ ។
ការបញ្ឈប់គម្រោងអភិវឌ្ឍន៍រោងចក្រផលិតអគ្គិសនីដើរដោយដុតធ្យូងថ្មនេះ គឺបន្ទាប់ពីកម្ពុជាទទួលបានថាមពលថ្មីៗពីវារីអគ្គិសនី និងថាមពលអគ្គិសនីពីពន្លឺព្រះអាទិត្យ ( សូឡា ) ដែលជាថាមពលស្អាតមិនបង្កផលប៉ះពាល់ដល់បរិស្ថាន និងធ្វើឱ្យការផលិតថាមពលកាន់តែទាបជាងការប្រើធ្យូងថ្ម និងប្រើប្រេង ។
សម្ដេចធិបតីក៏បានប្រកាសប្រាប់វិនិយោគិនបរទេសឱ្យដឹងដែរថា បើសិនជាវិនិយោគិនណាចង់មកវិនិយោគលើរោងចក្រអគ្គិសនីដុតធ្យូងថ្ម សូមកុំមកអី នាំតែខាតលុយជិះយន្តហោះទៅមកនោះទេ ។ ក្នុងន័យនេះ រាជរដ្ឋាភិបាលកម្ពុជានឹងមិនអនុញ្ញាតឱ្យមានគម្រោងវិនិយោគលើរោងចក្រអគ្គិសនីដុតធ្យូងថ្មនៅកម្ពុជាទៀតនោះទេ ។
បើតាមឯកឧត្តម យឹម វិសិដ្ឋ ប្រធានអាជ្ញាធរអគ្គិសនីកម្ពុជា បានថ្លែងនាពេលកន្លងមកនេះថា ពីមុនកម្ពុជាខ្វះថាមពលអគ្គិសនីច្រើនណាស់ ហើយភាគច្រើននៃថាមពលអគ្គិសនីដែលកម្ពុជាប្រើប្រាស់គឺនាំចូលពីប្រទេសជិតខាង ប៉ុន្តែមកដល់បច្ចុប្បន្ននេះ កម្ពុជាផលិតបានថាមពលអគ្គិសនីប្រើប្រាស់គ្រប់គ្រាន់ និងពេលខ្លះអាចនាំចេញទៅកាន់ប្រទេសជិតខាងបានវិញផងដែរ ។
ឯកឧត្តមបញ្ជាក់ថា ៖
«ការធ្វើពាណិជ្ជកម្មលើថាមពលអគ្គិសនី វាមិនខុសពីការធ្វើពាណិជ្ជកម្មលើទំនិញនោះទេ គឺមានការនាំចេញទៅវិញទៅមក យើងនាំចូលពីគេនៅពេលយើងខ្វះខាត ហើយយើងនាំចេញទៅគេវិញនៅពេលគេខ្វះខាតដូច្នេះ ។ នៅខែវស្សា ថាមពលអគ្គិសនីដែលបានមកពីវារីអគ្គិសនីច្រើនលើសតម្រូវការ យើងអាចសល់ខ្លះនាំចេញទៅប្រទេសជិតខាង ហើយនៅពេលយើងខ្វះខាត យើងក៏បាននាំចូលពីប្រទេសជិតខាងដើម្បីមកបំពេញតម្រូវការវិញ »។
គួរបញ្ជាក់ថា គម្រោងរោងចក្រអគ្គិសនីដុតធ្យូងថ្មនៅខេត្តកោះកុងនេះ មានទុនវិនិយោគប្រមាណ ១០០០លានដុល្លារអាមេរិក មានអានុភាព ៧០០មេហ្គាវ៉ាត់ ស្ថិតនៅភូមិ ចម្លងគោ និងភូមិថ្មស ឃុំថ្មស ស្រុកបុទុមសាគរ ខេត្តកោះកុង និងត្រូវបានក្រុមប្រឹក្សាអភិវឌ្ឍន៍កម្ពុជាអនុម័តនៅថ្ងៃទី៨ ខែធ្នូ ឆ្នាំ ២០២០ កន្លងទៅនេះ ៕
Account
Security
Favourite Content