សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ការប្រើប្រាស់កម្ចីចំគោលដៅ និងមានផែនការច្បាស់លាស់អាចជួយពង្រីកអាជីវកម្ម សហគ្រាសធុនតូច និងមធ្យម និងជីវភាពក្រុមគ្រួសារមានភាពប្រសើរឡើង។ ជាក់ស្តែង ការប្រើប្រាស់កម្ចីផ្លូវការបានជួយពង្រីកសិប្បកម្មវេចខ្ចប់អំបិល និងចែកចាយគ្រឿងទេសនៅទូទាំងប្រទេស។
លោក កុង ឡា សិប្បកម្មវេចខ្ចប់អំបិល និងចែកចាយគ្រឿងទេសនៅទូទាំងប្រទេស បានរៀបរាប់ថា លោកចាប់ផ្តើមអាជីវកម្មក្នុងឆ្នាំ២០១០ ជាអាជីវកម្មតូចតាច ដែលក្នុងមួយថ្ងៃវេចខ្ចប់អំបិលប្រហែល ១ តោន ហើយនាពេលលោកបានជួបឧបសគ្គជាច្រើន ដូចជា បញ្ហាបទពិសោធន៍ និងដើមទុន។
លោកបានថ្លែងបន្តថា ការចាប់ផ្តើមអាជីវកម្មដំបូងប្រើប្រាស់ដើមទុនផ្ទាល់ខ្លួនទាំងស្រុង ហើយក្នុងឆ្នាំ២០១១ លោកបានសម្រេចចិត្តប្រើប្រាស់កម្ចីពីគ្រឹះស្ថានមីក្រូហិរញ្ញវត្ថុ ដើម្បីប្រើប្រាស់ជាទុនក្នុងការទិញរម៉ក អំបិល និងគ្រឿងទេសចូលបន្ថែម។
លោក កុង ឡា បានឱ្យដឹងបន្តថា បន្ទាប់ពីទទួលបានភាពរីកចម្រើនក្នុងអាជីវកម្ម នៅក្នុងឆ្នាំ២០១៦ លោកបានសម្រេចប្រើប្រាស់កម្ចីជាលោកទី២ ដើម្បីពង្រីកសិប្បកម្មកែច្នៃអំបិលអ៊ីយ៉ូត ក្នុងសមត្ថភាពកែច្នៃ ២៥ តោន ក្នុងមួយថ្ងៃ និងបន្ថែមគ្រឿងទេសច្រើន ដែលអាចឱ្យលោកឈានទៅដល់ការចែកចាយទៅទូទាំងប្រទេស។
លោកបានឱ្យដឹងថា សមិទ្ធផល ដែលោកទទួលបានរហូតមកដល់សព្វថ្ងៃនេះ គឺលោកបានពង្រីកអាជីវកម្មបានធំជាងមុន ហើយមិនត្រឹមតែចែកចាយនៅក្នុងទីក្រុងភ្នំពេញនោះទេ តែថែមអាចបង្កើនការចែកចាយបាននៅទូទាំងប្រទេស។ បន្ថែមពី សមិទ្ធផលផ្សេងទៀតគឺបានធ្វើឱ្យជីវភាពគ្រួសាររបស់លោកមានភាពប្រសើរជាងមុន ហើយថែមអាចបង្កើតឱកាសការងារដល់បុគ្គលិកចន្លោះពី ៣០ ទៅ ៤០ នាក់ទៀតផង។
លោកបានឱ្យដឹងថា ការប្រើប្រាស់កម្ចីពីគ្រឹះស្ថានមីក្រូហិរញ្ញវត្ថុគឺឱ្យត្រូវចំគោលដៅ ហើយមុនខ្ចីមក គឺត្រូវមានផែនការច្បាស់លាស់។ ប្រសិនបើប្រើប្រាស់គ្មានគោលដៅច្បាស់លាស់ទេ នោះវាអាចបង្កើនបន្ទុកបំណុលទៅវិញ។
វិស័យមីក្រូហិរញ្ញវត្ថុនៅតែបន្តចូលរួមចំណែកយ៉ាងសំខាន់ក្នុងការជំរុញកំណើនសេដ្ឋកិច្ច តាមរយៈការផ្តល់ផលិតផល និងសេវាហិរញ្ញវត្ថុផ្លូវការដល់ប្រជាពលរដ្ឋ ជាពិសេសប្រជាពលរដ្ឋនៅតាមតំបន់ជនបទ។
លោក ឌី ស៊ីថា ក្រុមប្រឹក្សាភិបាល សមាគមមីក្រូហិរញ្ញវត្ថុកម្ពុជា បានថ្លែងថា ធនាគារជាតិនៃកម្ពុជាតែងតែយកចិត្តទុកដាក់ក្នុងការគាំទ្រ ថែរក្សាសុខុមាលភាព និងនិរន្តរភាពនៃវិស័យធនាគារ និងហិរញ្ញវត្ថុនៅកម្ពុជា ខណៈដែលវិស័យនេះបាន និងកំពុងដើរតួនាទីយ៉ាងសំខាន់នៅក្នុងគោលដៅរួមចំណែកលើកស្ទួយ និងជម្រុញកំណើនសេដ្ឋកិច្ចប្រកបដោយចីរភាពនៅក្នុងព្រះរាជាណាចក្រកម្ពុជាយើង។
លោកបានថ្លែងបន្តថា វិស័យនេះបានផ្តល់នូវឱកាសការងារ សម្រាប់ប្រជាជននៅទីក្រុង និងជនបទ និងលើកកម្ពស់ជីវភាពរស់នៅរបស់ពួកគេឱ្យកាន់តែប្រសើរឡើង។
លោក ឌី ស៊ីថា បានថ្លែងដូច្នេះថា សំខាន់ជាងនេះទៅទៀត វិស័យមីក្រូហិរញ្ញវត្ថុនៅកម្ពុជាក៏បានជួយបង្កើនប្រាក់ចំណូលដល់ប្រជាជន អភិវឌ្ឍសហគ្រាសធុនតូចនិងមធ្យម តាមរយៈការផ្តល់នូវប្រាក់កម្ចីសម្រាប់ជាដើមទុនក្នុងការពង្រីកមុខរបរ អាជីវកម្ម និងការធ្វើកសិកម្ម ជាដើម៕
Account
Security
Favourite Content