សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ វិស័យអចលនទ្រព្យក្នុងប្រទេសកម្ពុជាក្នុងរយៈពេលប៉ុន្មានឆ្នាំចុងក្រោយនេះ ជាពិសេសក្នុងឆ្នាំ២០២៣តែម្ដង ត្រូវបានមើលឃើញថា កំពុងជួបវិបត្តិហើយវិបត្តិក៏កាន់តែរាលដាលខ្លាំងឡើង ដោយក្រុមហ៊ុនអភិវឌ្ឍន៍អចលនទ្រព្យទាំងគម្រោងដីឡូត៍ និងគម្រោងអភិវឌ្ឍលំនៅឋាន កំពុងតែជួបបញ្ហាជាបន្តបន្ទាប់។ តើលោកអ្នកធ្លាប់បានដឹងទេថា មានកត្តាអ្វីខ្លះដែលជំរុញឱ្យវិស័យមួយនេះជួបភាពប្រឈមនឹងវិបត្តិ ?
លោក សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) បានមានប្រសាសន៍ថា កត្តាប្រឈមមួយចំនួននៅក្នុងវិស័យអចលនទ្រព្យដែលនាំឱ្យវិស័យនេះជួបប្រទះក្នុងពេលបច្ចុប្បន្ន ដោយសារតែកត្តាមួយចំនួនមមានដូចជា ភាពឆ្អែតនៃទីផ្សារ និងការផ្គត់ផ្គង់លើសពីតម្រូវការ។
លោកបានបញ្ជាក់ថា ៖
“កន្លងមកយើងឃើញថា ការរីកដុះដាលនៃសំណង់ ទាំងនៅក្នុងក្រុង និងក្រៅក្រុង ទាំងប្រភេទលំនៅឋាន ដូចជា ខុនដូ បុរី អគារពាណិជ្ជកម្ម បានរីកដុះដាលយ៉ាងខ្លាំង ហើយនៅពេលរីកដុះដាលលឿនពេក មិនស្របទៅនឹងតម្រូវការជាក់ស្ដែង នឹងធ្វើឱ្យជួបបញ្ហាប្រឈមដូចនឹងពេលបច្ចុប្បន្ននេះជាដើម។”
លោកបន្តថា ៖
“តាមពិតទៅ ប្រជាជននៅក្នុងរាជធានីភ្នំពេញ ជាពិសេសអ្នករស់នៅក្នុងបុរីនានាមួយចំនួនមានផ្ទះម្នាក់ ២ទៅ ៣ ដែលមើលទៅហាក់ដូចជាមានតម្រូវការខ្ពស់ ប៉ុន្តែនៅពេលដែលជួបវិបត្តិសេដ្ឋកិច្ច អ្នកដែលមានផ្ទះ ២ ទៅ ៣ ដោយទិញរំលស់ ក៏ចាប់ផ្ដើមរកចំណូលមិនអាចផ្គត់ផ្គង់នឹងការចំណាយបានធ្វើឱ្យពួកគាត់ជួបប្រទះនឹងបញ្ហាតែម្ដង។”
លោកថា ក្រៅពីភាពឆ្អែតនៃទីផ្សារ និងការផ្គត់ផ្គង់លើសតម្រូវការ កង្វះបទប្បញ្ញត្តិ ក៏ជាដើមចមដែលធ្វើឱ្យវិស័យអចលនទ្រព្យជួបប្រទះនឹងបញ្ហាប្រឈមដែរ។
លោក សន សៀប បានបញ្ជាក់យ៉ាងដូច្នេះថា ៖
“កន្លងមកយើងឃើញថាមានអាជ្ញាធរពាក់ព័ន្ធមួយចំនួន ដូចជា និយ័តករ ក្រសួងសេដ្ឋកិច្ច និងហិរញ្ញវត្ថុបានខិតខំបំពេញចន្លោះប្រហោងនៅក្នុងវិស័យនេះ ប៉ុន្តែដោយសារតែការអភិវឌ្ឍលឿនពេក ធ្វើឱ្យអាជ្ញាធរយើងមិនអាចពិនិត្យមើលគ្រប់ជ្រុងជ្រោយ។ បញ្ហាមួយទៀតនោះគឺភ្នាក់ងារដែលមិនមានក្រមសីលធម៌វិជ្ជាជីវៈ ដោយពួកគាត់ធ្វើយ៉ាងណាឱ្យលក់ដាច់ ទទួលបានកម្រៃជើងសារ ទោះបីជាគម្រោងនោះ ទៅជាយ៉ាងណាក៏ពួកគាត់លែងខ្វល់ ហើយភ្នាក់ងារបានរុញបញ្ហាទៅឱ្យអ្នកអភិវឌ្ឍន៍វិញ។ ភ្នាក់ងារលក់ខ្លះបានផ្សព្វផ្សាយលើសពីអ្វីដែលក្រុមហ៊ុនអភិវឌ្ឍគ្រោងនឹងធ្វើដែលអាចធ្វើឱ្យមានបញ្ហានៅពេលអនាគត។”
ក្រៅតែពីអ្វីដែលបានលើកឡើងខាងលើនេះ បច្ចុប្បន្នចំពោះទីផ្សារដីឡូត៍ក៏មានបញ្ហាជាបន្តបន្ទាប់ផងដែរ រហូតមានគម្រោងធំៗមួយចំនួនដែលម្ចាស់ក្រុមហ៊ុនអភិវឌ្ឍន៍សុទ្ធតែមានគោរមងារជាអ្នកឧកញ៉ា ឬជាឧកញ៉ា ក៏កំពុងកើតមានបញ្ហារហូតមានការបង្គាប់ឃាត់ខ្លួនដាក់ពន្ធនាគារក្រោយតុលាការទទួលពាក្យបណ្តឹងពីសំណាក់ប្រជាពលរដ្ឋដែលជាអតិថិជនរងគ្រោះនៅក្នុងគម្រោង។
លោក សន សៀប បានបញ្ជាក់ផងដែរថា វិវាទដីធ្លី ជាបញ្ហាដែលអាចបង្កជាវិបត្តិ និងបញ្ហាប្រឈមដែរ ហើយកន្លងមកវិវាទនេះក៏ត្រូវបានដោះស្រាយជាបន្តបន្ទាប់ ដើម្បីបញ្ជៀសបញ្ហាដែលនឹងអាចកើតឡើង ប៉ុន្តែក៏មិនអាចដោះស្រាយបានអស់នោះទេ។ ក្រៅពីនេះ ផ្នែកហេដ្ឋារចនាសម្ព័ន្ធ ក៏ធ្វើឱ្យវិស័យអចលនទ្រព្យជួបប្រទះនឹងបញ្ហាដែរ ជាពិសេសនៅតំបន់ជាយក្រុង និងតាមបណ្ដាឆ្ងាយៗមួយចំនួន។ យ៉ាងណាក៏ដោយ នៅតាមតំបន់មួយចំនួនយើងក៏ឃើញមានហេដ្ឋារចនាសម្ព័ន្ធគ្រប់គ្រាន់ក្នុងការទាក់ទាញការវិនិយោគពីក្នុង និងក្រៅប្រទេស។ និយាយជារួម សកម្មភាពកន្លងមក ក៏ដូចជាបញ្ហាដែលកំពុងកើតមាបនាពេលបច្ចុប្ប្នន្ននេះ គឺជាមេរៀនសម្រាប់មនុស្សទាំងអស់គ្នារៀនសូត្រដើម្បីកែលម្អ។ ទាំងអាជ្ញាធរ និងវិស័យឯកជនត្រូវរួមគ្នា ក្នុងការពង្រឹងច្បាប់គតិយុត្តិក៏ដូចជាតាមដាននៅក្នុងវិស័យនេះ ដើម្បីកុំឱ្យបញ្ហានេះកើតមានឡើងដដែលៗ ៕
Account
Security
Favourite Content