សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ជាការពិត ការសន្សំប្រាក់ជាផ្នែកមួយនៃការរៀបចំផែនការហិរញ្ញវត្ថុ ហើយវាមានសារៈសំខាន់សម្រាប់មនុស្សគ្រប់វ័យតែម្ដង។ ទម្លាប់នៃការសន្សំប្រាក់នេះ ជាការបង្កាទុកមុននូវបញ្ហាផ្សេងៗដែលអាចកើតឡើងជាយថាហេតុ។
មនុស្សគ្រប់វ័យត្រូវបានគេលើកទឹកចិត្តឱ្យមានទម្លាប់សន្សំប្រាក់ ដែលវាប្រៀបបានទៅនឹងការមានវិន័យផ្ទាល់ខ្លួនដូច្នោះដែរ។ និយាយដោយឡែក សម្រាប់យុវជន ថ្វីត្បិតថាជាវ័យមួយដែលមិនទាន់មានចំណូលជាក់លាក់ ប៉ុន្តែការសន្សំក៏នៅតែត្រូវបានគេលើកទឹកចិត្តផងដែរ។
ទាក់ទិននឹងចំណុចនេះ លោក ហេង រមណី នាយកប្រតិបត្តិអាជីវកម្មសន្សំ និងសេវាកម្មរបស់មីក្រូហិរញ្ញវត្ថុ AMK បានឱ្យដឹងថា ទម្លាប់សន្សំនេះគួរតែត្រូវបានឪពុកម្ដាយបណ្ដុះបណ្ដាលកូនតាំងតែពីពួកគេធំដឹងក្ដីមកម្លេះ។
លោកបន្តឱ្យដឹងទៀតថា ៖
«នៅពេលដែលយុវជនម្នាក់ធំធាត់ឡើងជាមួយនឹងទម្លាប់សន្សំ គេនឹងចេះគិតគូរវែងឆ្ងាយមុននឹងសម្រេចចិត្តទិញអ្វីមួយដែលមានតម្លៃថ្លៃ ហើយអ្វីដែលសំខាន់បំផុត គឺគេមានការអត់ធ្មត់ខ្ពស់»។
ត្រូវនឹងបរិបថសង្គមនាពេលបច្ចុប្បន្នដែលយុវជនមានទំនោរទៅរកសម្ភារៈនិយមផងនោះ វាអាចជាដើមចមនៃបញ្ហាអសន្តិសុខមួយចំនួនប្រសិនបើគ្រួសារមិនមានលទ្ធភាពផ្ដល់ឱ្យ។ នេះបើតាមការបញ្ជាក់របស់អ្នកជំនាញខាងលើ។
លោក ហេង រមណី បានគូសបញ្ជាក់ទៀតថា ៖
«ខ្ញុំលើកជាឧទាហរណ៍ជាក់ស្ដែងដែលយុវជនម្នាក់គាត់ចង់ទិញម៉ូតូ ហើយឪពុកម្ដាយមិនមានលទ្ធភាពទិញឱ្យ ដែលករណីនេះនាំឱ្យកើតមាននូវការប្រើប្រាស់អំពើហិង្សា និងខ្លះទៀតមានការបំផ្លិចបំផ្លាញទ្រព្យសម្បត្តិរបស់ឪពុកម្ដាយជាដើម។ ករណីខ្លះទៀត ដោយចង់បំពេញតាមបំណងរបស់កូន ឪពុកម្ដាយត្រូវបង្ខំចិត្តដកប្រាក់ចេញពីចំណែកណាមួយរបស់ខ្លួន ដែលករណីបែបនេះវាអាចប៉ះពាល់ដល់ស្ថានភាពហិរញ្ញវត្ថុរបស់គ្រួសារទាំងមូល»។
អ្នកជំនាញរូបនេះបានបន្តទៀតថា ផ្ទុយទៅវិញ ប្រសិនបើយុវជនមានទម្លាប់សន្សំផ្ទាល់ខ្លួន ពួកគេអាចយកប្រាក់សន្សំនោះដើម្បីទៅទិញអ្វីដែលខ្លួនចង់បាន។ មិនត្រឹមតែប៉ុណ្ណោះ យុវជនដែលចេះសន្សំមានការប្រុងប្រយ័ត្នលើការចំណាយរបស់ខ្លួន ហើយឱ្យតម្លៃទៅលើប្រាក់ដែលពួកគេខំសន្សំមកដោយលំបាក។
ជារួម លោកនៅតែលើកទឹកចិត្តឱ្យមនុស្សគ្រប់វ័យ ជាពិសេសគឺយុវជនចាប់ផ្ដើមបណ្ដុះទម្លាប់សន្សំ ប្រាក់ផ្ទាល់ខ្លួន ដែលការចេះគ្រប់គ្រងហិរញ្ញវត្ថុផ្ទាល់ខ្លួនបែបនេះ ជាចំណែកដ៏ធំមួយក្នុងការជំរុញ សេដ្ឋកិច្ច និងភាពស្ងប់សុខទាំងក្នុងគ្រួសារ និងសង្គមជាតិ៕
Account
Security
Favourite Content