បរទេស ៖ ជាទូទៅ កសិករចិន និងកសិដ្ឋានតូចៗនៅក្នុងតំបន់តែងនិយមទិញកូនជ្រូកដែលគ្រប់គីឡូពីក្រុមហ៊ុនអ្នកចិញ្ចឹមសត្វជ្រូកធំៗ ហើយយកមកចិញ្ចឹមបំប៉នឱ្យធំធាត់ ដែលជាទម្លាប់ និងជាយុទ្ធសាស្ត្រក្នុងការបង្កើនតម្លៃមុនពេលលក់ចេញនៅលើទីផ្សារ។

ជាក់ស្តែងបច្ចេកទេសរបស់កសិករចិន ក៏ដូចជាអ្នកចិញ្ចឹមជ្រូកសាច់បន្ត ភាគច្រើនពួកគេចំណាយលុយទិញយកជ្រូកជំទង់ពីក្រុមហ៊ុនអ្នកចិញ្ចឹមធំៗ ហើយយកមកបំប៉នចំណីបន្ថែមក្នុងរយៈពេល ៣ ទៅ ៤ខែ ដើម្បីទទួលបានគីឡូសត្វជ្រូកបន្ថែមយ៉ាងហោចណាស់ពី៤០ ទៅ ៥០គីឡូក្រាមក្នុងមួយក្បាល ឬច្រើនជាងនេះ ដើម្បីអាចរកប្រាក់ចំណេញមកវិញបានច្រើនតាមដែលអាចធ្វើទៅបាន។ ប៉ុន្តែយ៉ាងណាក្តី ក្នុងស្ថានភាពដែលមានជម្លោះពាណិជ្ជកម្មជាមួយនឹងអាមេរិកផង ជុំវិញបញ្ហាការនាំចូលចំណីអាហារផង និងក្នុងគោលបំណងថែរក្សាតម្លៃសាច់ជ្រូកឲ្យមានស្ថិរភាពផងនោះ បច្ចុប្បន្នអាជ្ញាធរចិនបានសម្រេចរៀបចំ និងដាក់ឱ្យអនុវត្តនូវបច្ចេកទេសថ្មី តាមរយៈការកំណត់គីឡូរបស់សត្វជ្រូកកុំឲ្យឡើងខ្ពស់ពេក (slimmer pigs) មុនពេលនាំយកទៅដល់ទីផ្សារ។

សារព័ត៌មានរ៉យទ័របានរាយការណ៍ថា បច្ចេកទេសចិញ្ចឹមសត្វជ្រូកក្នុងបរិបទបច្ចុប្បន្ននេះ បានធ្វើឲ្យនិយ័តករចិនបង្ហាញការព្រួយបារម្ភថា វាអាចជាកត្តាជំរុញឲ្យតម្លៃលក់កាន់ខ្ពស់ ហើយមិនត្រឹមតែប៉ុណ្ណោះវាក៏បានធ្វើឲ្យខ្ជះខ្ជាយដល់ចំណីប្រភេទគ្រាប់ធញ្ញជាតិដែលប្រើប្រាស់សម្រាប់ការចិញ្ចឹមសត្វជ្រូកទាំងនោះផងដែរ។ ករណីនេះត្រូវបាននិយ័តករចិនយកមកធ្វើការពិចារណា ហើយរកឃើញថា វាកំពុងធ្វើឲ្យប៉ះពាល់ខ្លាំងទៅដល់គោលនយោបាយកាត់បន្ថយការប្រើប្រាស់គ្រាប់ធញ្ញជាតិនៅក្នុងវិស័យចិញ្ចឹមសត្វយកសាច់របស់ចិន ជាពិសេសក្នុងអំឡុងពេលដែលកំពុងមានជម្លោះពាណិជ្ជកម្មជាមួយនឹងសហរដ្ឋអាមេរិក និងវិបត្តិនៃការផ្គត់ផ្គង់ចំណីអាហាររបស់សកលលោក។

អ្នកវិភាគជាន់ខ្ពស់នៅធនាគារ ហូឡង់ លោក Pan Chenjun ដែលមានជំនាញខាងសារធាតុចិញ្ចឹមសត្វ (Animal Protein) បានលើកឡើងថា របៀបចិញ្ចឹមជ្រូកយកសាច់បែបនេះអាចប្រឈមមុខទៅនឹងបញ្ហាខ្វះខាតការផ្គត់ផ្គង់ក្នុងរយៈពេលខ្លីណាមួយ ឬករណីជួបហានិភ័យណាមួយ ដូចជា ជំងឺឆ្លងជាដើម នោះវានឹងធ្វើឲ្យតម្លៃសាច់ជ្រូកកាន់តែខ្ពស់ ហើយបង្កផលលំបាកក្នុងការគ្រប់គ្រងទីផ្សារឲ្យត្រឡប់មកល្អដូចដើមវិញណាស់។

គួរឲ្យដឹងដែរថា ប្រទេសចិន គឺជាប្រទេសដែលប្រើប្រាស់សាច់ជ្រូកច្រើនជាងគេបំផុតរបស់ពិភពលោក ហើយបច្ចុប្បន្នកំពុងប្រឈមមុខនឹងតម្រូវការចុះខ្សោយ ខណៈដែលការផ្គត់ផ្គង់កំពុងលើសកម្រិត។ ជាការកត់សម្គាល់ តម្លៃសាច់ជ្រូកនៅលើទីផ្សារបានធ្លាក់ចុះបន្តិចប្រហែល ១៤យ័នក្នុងមួយគីឡូក្រាម ពោលគឺបានធ្លាក់ចុះពីកម្រិតខ្ពស់បំផុតពី ២១យ័ន។ នេះបើយោងតាមទិន្នន័យរបស់ MySteel៕