ស្ថិតក្នុងស្ថានភាពដែលពិភពលោកកំពុងរួមរឹតទៅដោយបញ្ហាគ្រប់ទីកន្លែងនោះ វិបត្តិសកលក៏បាន និងកំពុងរីករាលដាលនៅតាមតំបន់ជាច្រើនដូចគ្នាដែរ។ វិបត្តិកូវីដតាំងតែពីឆ្នាំ២០២១ បានធ្វើឲ្យប៉ះពាល់ដល់សេដ្ឋកិច្ចពិភពលោកធ្ងន់ធ្ងរបន្ថែមជាមួយនឹងវិបត្តិនៅអ៊ុយក្រែនឆ្នាំ២០២២ ព្រមទាំងបញ្ហាតូចធំជាច្រើនទៀតក្នុងឆ្នាំនេះ បានរុញច្រានពិភពលោកធ្លាក់ចូលទៅក្នុងវិបតិ្តកាន់តែជ្រៅមិនអាចជៀសរួចឡើយ។ ទោះបីជាយ៉ាងណាក្តី វិបត្តិសកលនឹងមិនអាចកើតឡើងជារៀងរហូតនោះទេ ប៉ុន្តែក្នុងអំឡុងពេលនេះ ផលវិបាកជាច្រើននឹងធ្វើឲ្យមនុស្សគ្រប់គ្នាអាចនឹងទទួលបានបទពិសោធ ជាពិសេសបញ្ហាហិរញ្ញវត្ថុតែម្តង។

អំឡុងពេលដែលវិបត្តិសកលកំពុងរីករាលដាល អ្នកជំនាញជាច្រើនបានណែនាំឲ្យមានការប្រុងប្រយ័ត្នខ្លាំងទៅលើការគ្រប់គ្រងហិរញ្ញវត្ថុផ្ទាល់ខ្លួន ជាពិសេសការចំណាយដែលមិនចាំបាច់ និងការថែរក្សាកញ្ចប់ថវិកាបម្រុងទុកជាបន្ទាន់ជាដើម។

ទោះបីជាយ៉ាងណាក្តី ក្នុងចំណោមវិធីសាស្ត្រត្រៀមទុកជាមុនទាំងនោះ អ្នកជំនាញបរទេសជាច្រើនក៏បានក្រើនរំលឹកមនុស្សភាគច្រើនមិនត្រូវបោះបង់ពេលវេលាចោលឡើយដើម្បីប្រឹងប្រែងអភិវឌ្ឍខ្លួនបន្ថែមទៀត ដោយផ្តោតទៅលើការអភិវឌ្ឍជំនាញវិជ្ជាជីវៈ ក៏ដូចជាការពង្រីងវិជ្ជាជីវៈរបស់ខ្លួនដែលមានស្រាប់ផងធ្វើយ៉ាងណាអាចធានាបាននូវការប្រកួតប្រជែងទីផ្សារការងារដែលច្បាស់ណាស់វានឹងមានភាពកាន់តែចង្អៀតឡើងៗក្នុងពេលដែលវិបត្តិសកលចាប់ផ្តើមធ្វើទុក្ខ និងអូសបន្លាយ។

ក្រុមអ្នកជំនាញបានពន្យល់ថា ការអភិវឌ្ឍ និងពង្រឹងសមត្ថភាពវិជ្ជាជីវៈបានផ្តល់អត្ថប្រយោជន៍ទាំងបុគ្គលផ្ទាល់ខ្លួន និងទៅដល់អាជីវកម្មព្រមទាំងសេដ្ឋកិច្ចរបស់សង្គមជាតិទាំងមូលផងដែរ។ វិស័យរដ្ឋ និងឯកជន គួរតែផ្តោតទៅលើការកិច្ចការងារនេះជាជាងការកាត់បន្ថយចំនួនបុគ្គលិក ដើម្បីរំដោះបញ្ហាហិរញ្ញវត្ថុដោយការពិចារណាកាត់បន្ថយប្រាក់កម្រៃ និងបង្កើនផលិតភាពឲ្យបានច្រើនជាងមុនវិញ ពីព្រោះថាវាគឺជាត្រៀមខ្លួនបានយ៉ាងល្អបំផុតនៅពេលដែលស្ថានភាពវិបត្តិនឹងត្រឡប់មកល្អប្រសើរវិញភ្លាមៗ។

សម្រាប់អ្នកដឹកនាំដែលមានទស្សនៈវែងឆ្ងាយ យុទ្ធសាស្ត្រនេះនឹងក្លាយទៅជាអត្ថប្រយោជន៍មិនអាចគណនាបានឡើយសម្រាប់អនាគតរបស់អង្គភាព និងសង្គមជាតិរបស់ពួកគេ ពីព្រោះថាមិនត្រឹមតែអាចរក្សាប្រតិបត្តិការអាជីវកម្ម និងថែរក្សាចំនួនការងារនោះទេ វាថែមទាំងអាចជួយបង្កើនជំនាញក្នុងទីផ្សារផ្សេងៗដែលកំពុងមានតំរូវការ និងអាចជួយឲ្យវិស័យរដ្ឋ និងឯកជនអាចបត់បែនបានគ្រប់កាលៈទេសៈដើម្បីជំនះលើការប្រកួតប្រជែង និងទាញរកប្រាក់ចំណូលក្នុងពេលវេលាដ៏លំបាកបំផុតណាមួយ។

សម្រាប់បុគ្គលផ្ទាល់ខ្លួនវិញ ការបង្កើនសមត្ថភាពខ្លួនឯងលើជំនាញវិជ្ជាជីវៈ គឺជាការបង្កើតឱកាសក្នុងការបង្កើនប្រាក់ចំណូល និងដើម្បីរំដោះខ្លួនចេញពីបញ្ហាហិរញ្ញវត្ថុក្នុងករណីដែលពួកគេអាចនឹងបាត់បង់ការងារ ឬប្រភពចំណូលណាមួយដោយជំនួសមកវិញនូវប្រភពចំណូលថ្មីផ្សេងវិញ។ គួរឲ្យដឹងដែរថា កម្ពុជាបច្ចុប្បន្នកំពុងដំណើរការផ្តល់ឱកាសហ្វឹកហាត់ជំនាញវិជ្ជាជិវៈយ៉ាងច្រើននៅតាមសាលារៀន ស្ថាប័នរដ្ឋទាំងធំ និងតូចដោយមិនមានការគិតគូរថ្លៃសិក្សាឡើយ ដូចជានៅក្រសួងទេសចរណ៍ និងក្រសួងការងារជាដើម ដែលវាគឺជាសញ្ញាដ៏ល្អមួយបញ្ជាក់ថាយើងនឹងអាចបង្កើនភាពធន និងជាការសាងរបាំងដ៏រឹងម៉ាំមួយប្រៀបដូចជាអាវក្រោះក្នុងពេលវេលានៃវិបត្តិជាសកល៕