ភ្នំពេញ ៖ ស្ថិតក្នុងយុគសម័យនៃភាពរីកចម្រើនផ្នែកឌីជីថលនាពេលបច្ចុប្បន្ន ទាំងការរស់នៅប្រចាំថ្ងៃ ទាំងការប្រកបអាជីវកម្ម ក៏ដូចជាការបំពេញការងារផ្សេងៗសុទ្ធតែពឹងផ្អែកទៅលើចំណេះដឹង និងការចេះប្រើបច្ចេកវិទ្យាជាជំនួយដើម្បីអាចទទួលបានភាពល្អប្រសើរ។ ដោយឡែក នៅក្នុងវិស័យអចលនទ្រព្យក៏ដូចគ្នា ជាពិសេស ភ្នាក់ងារដែលបម្រើសេវាស្វែងរកអតិថិជន ទិញ-លក់-ជួល អចលនទ្រព្យ ក៏ត្រូវពឹងផ្អែកមួយចំណែកធំលើបច្ចេកវិទ្យាដែរ។

អ្នកស្រី ប្រាក់ សូលី អគ្គនាយិការក្រុមហ៊ុន 24H Synergy (Cambodia) Co., Ltd ក្នុងពិធីជំនួបសំណេះសំណាលជាមួយអ្នកជំនាញអចលនទ្រព្យ ម្ចាស់អាជីវកម្ម និងភ្នាក់ងារអចលនទ្រព្យ​កម្ពុជានារសៀលថ្ងៃទី២៣ ខែឧសភា ឆ្នាំ២០២៥ នៅមជ្ឈមណ្ឌល Factory Phnom Penh បានលើកឡើងថា បច្ចេកវិទ្យាបានជះឥទ្ធិពលយ៉ាងខ្លាំងទៅដល់ការរស់នៅ និងរបៀបនៃការធ្វើអាជីវកម្ម ជាពិសេសនៅក្នុងយុគសម័យ AI ដូច្នេះ បើដើរមិនទាន់បច្ចេកវិទ្យានោះទេនឹងជួបបញ្ហាជាច្រើន ជាពិសេស ពិបាកនៅក្នុងការឈរជើងនៅលើទីផ្សារដែលពោរពេញទៅដោយការប្រកួតប្រជែង។

អ្នកស្រីបានបញ្ជាក់ថា ៖

«ដូចដែលបានលើកឡើងខាងលើនេះហើយបានជំរុញឱ្យ 24H Synergy Cambodia សហការជាមួយក្រុមហ៊ុនបច្ចេកវិទ្យាមកពីសង្ហបុរី បង្កើតបច្ចេកវិទ្យាអចលនទ្រព្យមួយដែលមានឈ្មោះថា 24H.rentals នេះឡើង ដើម្បីជាជំនួយដល់បណ្តាម្ចាស់អាជីវកម្ម ភ្នាក់ងារទិញ-លក់-ជួល ជាពិសេសអ្នកដែលពាក់ព័ន្ធនៅក្នុងទីផ្សារអចលនទ្រព្យតែម្ដង។ ទាំងអស់នេះគឺជាបដិវត្តថ្មីមួយនៅក្នុងទីផ្សារជួលអចលនទ្រព្យ ហើយវាមានគុណតម្លៃយ៉ាងខ្លាំងចំពោះភ្នាក់ងារអចលនទ្រព្យទាំងអស់ តាមរយៈបច្ចេកវិទ្យាអចលនទ្រព្យនេះ ហើយក៏ជាបទពិសោធន៍ថ្មីសម្រាប់អតិថិជនដែលកំពុងស្វែងរកអចលនទ្រព្យជួល មានភាពងាយស្រួល សម្បូរបែប គ្រប់តម្លៃ គ្រប់ទីកន្លែង ផ្តល់ទំនុកចិត្តខ្ពស់ ជាពិសេសផ្តល់ព័ត៌មានអចលនទ្រព្យត្រឹមត្រូវច្បាស់លាស់»។

សូមបញ្ជាក់ថា 24H.rentals គឺជាបច្ចេកវិទ្យាអចលនទ្រព្យដែលគាំទ្រដោយបច្ចេកវិទ្យា AI ផ្ដល់នូវដំណោះស្រាយ និងជំនួយជាច្រើនដល់ភ្នាក់ងារអចលនទ្រព្យដូចជា៖ ជំនួយនៅក្នុងការតបសារអតិថិជន ២៤ម៉ោង, ជំនួយក្នុងការជូនភ្ញៀវទៅមើលអចលនទ្រព្យនៅពេលដែលភ្នាក់ងារជាប់រវល់ ការផ្ដល់ជូននូវ AI Chatbot មិនគិតថ្លៃចំពោះភ្នាក់ងារអចលនទ្រព្យ។ ក្រៅពីនេះនៅមានប្រព័ន្ធគ្រប់គ្រងការជួល និងប្រព័ន្ធគ្រប់គ្រងអចលនទ្រព្យ ដាក់ឲ្យដំណើរការប្រើប្រាស់មិនគិតថ្លៃ ដែលជាប្រវត្តិសាស្ត្រមួយនៅក្នុងវិស័យអចលនទ្រព្យ។ ​ ភ្នាក់ងារអចលនទ្រព្យទាំងអស់នឹងអស់ក្តីបារម្ភអំពីការបាត់ភ្ញៀវ បាត់កម្រៃជើងសារ ឬបាត់បង់អត្ថប្រយោជន៍ផ្សេងៗ ប្រព័ន្ធគ្រប់គ្រងប្រាក់កម្រៃជើងសារ ជាប្រព័ន្ធអេកូឡូស៊ី ដែលកត់ត្រាអតិថិជន និងបែងចែកប្រាក់កម្រៃជើងសារទៅដល់បុគ្គលដែលពាក់ព័ន្ធមិនឲ្យបាត់បង់ផលប្រយោជន៍ ក្រៅពីនេះក៏មានប្រព័ន្ធគ្រប់គ្រងអតិថិជនដោយស្វ័យប្រវត្តិផងដែរ។

លោក Win Moe Kyaw ដែលជាអ្នកជំនាញអចលនទ្រព្យមកពីប្រទេសភូមា ក៏បានបង្ហាញចំណាប់អារម្មណ៍ និងការពេញចិត្តយ៉ាងខ្លាំងចំពោះ 24H Synergy (Cambodia) ដែលជាក្រុមហ៊ុនបែបអេកូឡូស៊ី ផ្ដល់នូវជំនួយគាំទ្រលើការវិនិយោគអចលនទ្រព្យ ជំនួយការផ្លូវច្បាប់ និងការប្រឹក្សាយោបល់ហិរញ្ញវត្ថុ ព្រមទាំងពន្ធដាផងដែរ។ លោកក៏បានអំពាវនាវឲ្យបណ្ដារអ្នកវិនិយោគនៅប្រទេសភូមាងាកមកសិក្សាស្វែងយល់ពីឱកាសវិនិយោគនៅក្នុងព្រះរាជណាចក្រកម្ពុជាដែលពោរពេញទៅដោយសក្តានុពល៕