គន្លឹះ៣ ដែលសហស្ថាបនិក Brown ចែករំលែកដល់សហគ្រិននៅកំពត

នាព្រឹកថ្ងៃទី២៧ ខែមេសា ឆ្នាំ២០២៤ សមាគមសហគ្រិនវ័យក្មេងកម្ពុជាសាខាកំពត-កែប បានរៀបចំកម្មវិធី ជំនួបសហគ្រិនវ័យក្មេងកំពតកែប លើកទី៤ ឆ្នាំ២០២៤ ក្រោមប្រធានបទ  “យុទ្ធសាស្រ្តក្នុងការពង្រឹង និងពង្រីកអាជីវកម្ម” ក្រោមអធិបតីភាពដ៏ខ្ពង់ខ្ពស់  ឯកឧត្តម ពេញ ធារម្យ អភិបាលរងនៃគណៈអភិបាលខេត្តកំពត ឧកញ៉ា បុិច បូឡែន  ប្រធានសមាគមសហគ្រិនវ័យក្មេងកម្ពុជា លោក ឃឹម ប៊ុនឡែន ប្រធានសមាគមសហគ្រិនវ័យក្មេងកម្ពុជា សាខាកំពត-កែប និងវាគ្មិនកិត្តិយសលោក លីវ ឈួង អគ្គនាយក និងសហស្ថាបនិក ប្រោនកាហ្វេ BROWN Coffee and Bakery ព្រមទាំងសហគ្រិន អាជីវករ និងក្រុមការងារពាក់ព័ន្ធសរុបប្រមាណជាង ៦០នាក់ នៅ Amber Kampot ក្នុងខេត្តកំពត។ 

​​​ក្នុងកម្មវិធីនេះ  វាគ្មិនកិត្តិយសលោក លីវ ឈួង អគ្គនាយក និងសហស្ថាបនិក ប្រោនកាហ្វេ Brown Coffee បានធ្វើការចែករំលែកនូវបទពិសោធន៍ និងយុទ្ធសាស្រ្តសំខាន់ៗក្នុងការពង្រឹង និងពង្រីកអាជីវកម្មមួយអោយទទួលបានភាពជោគជ័យ។ ក្នុងនោះ លោកបានលើកឡើងអំពីធាតុសំខាន់ៗ៣ចំណុចដែលយើងគួរតែយកចិត្តទុកដាក់រួមមានដូចជា៖ ក្រុមការងារ បទពិសោធន៍ពីអតិថិជន និងភាពច្នៃប្រឌិត។ 

ក្រុមការងារគឺសំដៅទៅលើការគុណតម្លៃរបស់ក្រុមការងារទាំងអស់ ដែលមានផ្នត់គំនិត និងឥរិយាបថត្រឹមត្រូវ មានការអត់ធ្មត់ ភាពជាម្ចាស់ការ ហើយអាចសម្រេចការងារតាមផែនការ និងការចាំបាច់។ មួយវិញទៀតក្រុមការងារទាំងអស់ត្រូវមានសមត្ថភាព ជំនាញដែលឆ្លើយតបនឹងតម្រូវការការងារ ហើយចេះអភិវឌ្ឍខ្លួនឯងជាប្រចាំ និងចាប់យកការបណ្តុះបណ្តាល ពីក្រុមហ៊ុន។ លើសពីនឹងទៀតសោត ការដែលមានវប្បធម៌ការងារល្អ ទម្លាប់ការងារដែលត្រឹមត្រូវ ជាការផ្សារភ្ជាប់នូវបុគ្គលទៅបុគ្គល បុគ្គលទៅក្រុមការងារ ដែលពោរពេញទៅភាពរីករាយ និងបរិយាកាសការងារដ៏គួរអោយចាប់អារម្មណ៍។ 

ចំពោះបទពោសោធន៍អតិថិជន គឺជាការយល់ចិត្តអតិថិជន ចំណង់ចំណង់ចំណូលចិត្ត និងក្តីរំពឹងរបស់អតិថិជនរបស់ពួកគេ  ដែលអាចផ្តល់ជូននូវការហ្វេ និងនំ ដែលមានរសជាតិឆ្ងាញ់ ការបម្រើអតិថិជនចេញពីបេះដូង ហើយបង្កើតបរិយាកាសនៅហាងកាហ្វេអោយអតិថិជនមានអារម្មណ៍មានភាពជាកម្មសិទ្ធិ និងក្តីសុខនៅពេលមកទីតាំងយើង។ 

ការច្នៃប្រឌិត គឺគន្លឹះទីបីដែលនាំអោយប្រោណបានមានឈ្មោះបោះសម្លេងមកដល់សព្វថ្ងៃ។ ការស្វែងរកវីធីថ្មីៗ ដើម្បី
អោយខ្លួនឯងកាន់តែរីកចម្រើន ដូចជាការលក់របស់ដដែលទៅកាន់ភ្ញៀវដដែលអោយបានច្រើនជាងមុន អភិវឌ្ឍមុខទំនិញ ហើយលក់ទៅកាន់ភ្ញៀវដដែលេ ដែលពួកគាត់នឹងទិញច្រើនជាងមុន លក់ទំនិញដដែលទៅកាន់ភ្ញៀបថ្មីៗ  អភិវឌ្ឍផលិតផលថ្មីដើម្បីការលក់កើនឡើង និងលក់ទៅតាមរបៀបថ្មីៗផ្សេងៗទៀត។

ក្រៅពីនេះ លោកក៏បានផ្តល់នូវគន្លឹះល្អៗជាច្រើនទៀតសម្រាប់ជាដើមទុនគំនិតក្នុងការបើកដំណើរការអាជីវកម្មមួយអោយទទួលបានផ្លែផ្កាយូរអង្វែង។ យើងខ្ញុំក៏សូមថ្លែងអំណរគុណដល់លោក លីវ ឈួង ដែលបានចំណាយពេលវេលាដ៏មានតម្លៃធ្វើការចែករំលែកនូវបទពិសោធន៍របស់លោកជូនដល់សហគ្រិនក្នុងខេត្តកំពត-កែប ព្រមទាំងបាននាំយកភេសជ្ជៈកាហ្វេប្រោនរសជាតិទុរេនដ៏ឈ្ងុយឆ្ងាញ់មកចែកជូនអ្នកចូលរួមក្នុងកម្មវិធីនេះផងដែរ។ 

ទន្ទឹមនឹងនេះ យើងខ្ញុំក៏សូមថ្លែងអំណរគុណដល់ ក្រុមការងារសមាគមសហគ្រិនវ័យក្មេងកម្ពុជាសាខាកំពត-កែបដែលបានចំណាយពេលវេលារៀបចំកម្មវិធីនេះឡើងដើម្បីជួបជុំចែករំលែកចំណេះដឹង និងដើម្បីអភិវឌ្ឍសហគ្រិនភាពនៅកំពត-កែបអោយកាន់តែរីកចម្រើនថែមទៀត។ 

ចំពោះបងប្អូន អាជីវករ ពាណិជ្ជករ តូចធំ​ នៅខេត្តកំពតកែប ដែលចង់ក្លាយទៅជាសមាជិក ដើម្បីអោយអាជីវកម្មខ្លួននឯងកាន់តែរីកចម្រើន សូមទាក់ទងមកកាន់ផេកសមាគមផ្ទាល់ ឬក្រុមការងារលេខាធិការដ្ឋា ០៧៨៤៥៣៥៤៥/០៧០៥៨១៥៥៥។