ភ្នំពេញ ៖ ដីប្លី ជាដំណាំមួយប្រភេទដែលមានលក្ខណៈស្រដៀងនឹងម្រេច ទាំងដើម និងផ្លែ ជាពិសេសផ្លែរបស់វាគេអាចយកផ្សំជាឱសថបុរាណសម្រាប់ធ្វើថ្នាំចិនសែក៏បាន និងធ្វើជាគ្រឿងទេសដូចម្រេចក៏បាន។ ដោយសារមើលឃើញពីតម្រូវការ និងផលប្រយោជន៍ទាំងនេះ កសិករម្នាក់បានឆ្លៀតដាំដំណាំដីប្លីនៅលើដីទំនេរក្រោយផ្ទះ ខណៈដែលការមើលថែក៏មានភាពងាយស្រួល និងទទួលបានតម្លៃថ្លៃគួរសម។

លោក និន ចាន់នី ជាកសិករដាំដំណាំដីប្លីនៅស្រុកគិរីវង់ ខេត្តតាកែវ បានមានប្រសាសន៍ថា៖

«សម្រាប់ដីប្លី យើងដាំជាលក្ខណៈគ្រួសារ មានជាង ១០០ជន្លង់នៅក្រោយផ្ទះ ។ ខ្ញុំដាំវាដោយសារវាងាយស្រួលដាំ មិនពិបាកថែទាំ ដែលការមើលថែទាំនេះគឺឆ្លៀតនៅពេលទំនេរពីការងារធ្វើស្រែចំការ ដែលអាចរកចំណូលបន្ថែមចូលគ្រួសារ»។

លោកបន្តថា ៖

«វាមិនពិបាកលក់នោះទេ ឱ្យតែមានគេមករកទិញដល់កន្លែង ដែលអាចលក់ក្នុងតម្លៃចាប់ពី ១៧ ០០០រៀល ដល់ ៣ម៉ឺនរៀល អាស្រ័យតាមរដូវកាល ហើយដីប្លីនេះគេដាំតាំងពីដូនតាមក ដែលវាមានរសជាតិហឹរ ។ កាលពីមុនគេហាលវាឱ្យស្ងួត និងបុកប្រើជំនួសម្រេចបាន ឬអ្នកខ្លះទៀតនិយមប្រើជាថ្នាំចិនសែ តែផ្លែដីប្លីក៏មានលក្ខណៈស្រដៀងនឹងម្រេចច្រើនតាំងដើម ជាជន្លង់ ហើយផ្លែវានៅខ្ចីក៏អាចយកមកចម្អិនម្ហូបបានដូចម្រេចផងដែរ»។

ពាក់ព័ន្ធទៅនឹងការដាំដុះវិញ គឺមានភាពងាយស្រួល ដោយគេអាចកាត់យកទងណាខ្ចីៗទៅដាក់ដាំតាមជន្លង់ ក្នុងមួយគុម្ពត្រូវការតែ ២ទងប៉ុណ្ណោះ ហើយជីគេត្រូវការតែជីលាមកគោមកបន្ថែមបំប៉ន។ ចំពោះអាយុវិញ ដំណាំនេះអាចប្រមូលផលបានរហូតឱ្យតែយើងមើលថែវា ឬថែរក្សាជន្លង់របស់វាឱ្យបានល្អដោយប្រើជាប្រភេទជន្លង់ឈើសម្រាប់ឱ្យវាបោះដៃ។

នៅពេលដាក់ដាំដំបូងរហូតដល់រយៈពេលប្រមាណ២សប្ដាហ៍ គេត្រូវការគ្រប់ជៀសវាងត្រូវពន្លឺ ឬកំដៅថ្ងៃខ្លាំងដែលអាចស្វិតស្រពោន។ ដំណាំប្រភេទនេះអាចដុះលូតលាស់បានល្អនៅតំបន់ដីលាយគ្រួស ឬជាដីភ្នំ ពោលស្ថានភាពសម្រាប់ដាំដុះគឺដូចគ្នាទៅនឹងដីដាំដុះម្រេចដែរ។

ដំណាំដីប្លីចាប់ផ្ដើមចេញផ្លែនៅពេលវារឡើងជន្លង់ តែដើមនៅតូចផ្លែក៏បានតិច ដល់ពេលវារឡើងពេញជន្លង់ មានមែកច្រើនទើបផ្លែបានច្រើន ជាក់ស្ដែងនៅពេលវាចាស់ដើម ក្នុងមួយជន្លង់វាអាចឱ្យផលប្រមាណ ៨គីឡូក្រាមផ្លែស្រស់ ឬស្មើនឹង ២គីឡូក្រាមផ្លែស្ងួត។ នេះជាអ្វីដែលកសិករខាងលើបានលើកឡើង។

ក្រៅពីនេះ នៅចន្លោះរងគេក៏អាចដាំដំណាំរយៈពេលខ្លីផ្សេងទៀត ដូចជា ខ្ជាយ រមៀត ត្រាវ រំដេង ជាដើម ដែលអាចរកចំណូលបន្ថែមប្រចាំថ្ងៃផ្សេងទៀត។ ជាចុងក្រោយ លោក ចាន់នី​ ក៏បានចែករំលែកដែរថា សម្រាប់បងប្អូនដែលទំនេរពីការងារធ្វើស្រែចំការ ឬមានដីទំនេរនៅជុំវិញផ្ទះ​ គួរតែងាកមកដាំដំណាំ មិនថាដីប្លី ឬដំណាំចម្រុះនោះទេ ព្រោះវាអាចផ្ដល់ផលចំណេញច្រើន ងាយស្រួលដាំ ជាពិសេសអាចផ្ដល់ចំណូលបន្ថែមសម្រាប់ជីវភាពគ្រួសារ៕