សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ចំណេះដឹងផ្នែកហិរញ្ញវត្ថុ គឺជាបំណិនជីវិតដ៏សំខាន់មួយ ដែលមនុស្សគ្រប់រូបចាំបាច់ត្រូវមាន ដើម្បីឱ្យការរស់នៅកាន់តែប្រសើរ។ បន្ថែមពីលើចំណេះដឹងហិរញ្ញវត្ថុទូទៅ បច្ចុប្បន្ននេះសង្គមបានវិវត្តទៅដល់ការប្រើបច្ចេកវិទ្យានៅក្នុងវិស័យហិរញ្ញវត្ថុ (Fintech) ដែលកាន់តែទាមទារឱ្យប្រជាជនមានការយកចិត្តទុកដាក់កាន់តែខ្លាំង។ ប៉ុន្តែទោះជាយ៉ាងណា គេនៅតែសង្កេតឃើញមានបញ្ហាប្រឈមមួយចំនួនដែលរារាំងដល់ការទទួលបានចំណេះដឹងផ្នែកបច្ចេកវិទ្យាហិរញ្ញវត្ថុ។
ថ្លែងក្នុងកិច្ចពិភាក្សាស្ដីអំពី «អក្ខរកម្មឌីជីថល និងសុវត្ថិភាពឌីជីថលក្នុងបរិបថ AI» លោក រ៉ូន្នី ឧត្តម ប្រធាននាយកដ្ឋានត្រួតពិនិត្យហានិភ័យបច្ចេកវិទ្យា និងនវានុវត្តន៍នៃអគ្គនាយកដ្ឋានត្រួតពិនិត្យរបស់ធនាគារជាតិនៃកម្ពុជាបានឱ្យដឹងថា លោកសង្កេតឃើញមានបញ្ហាធំៗចំនួន២នៅបន្តរារាំងដល់ការទទួលបានចំណេះដឹងផ្នែកហិរញ្ញវត្ថុ និងបច្ចេកវិទ្យាហិរញ្ញវត្ថុ គឺបញ្ហាភាសា និងការផ្សព្វផ្សាយ។
លោក រ៉ូន្នី ឧត្តម បានរៀបរាប់យ៉ាងដូច្នេះថា៖
« ភាគច្រើន ព័ត៌មាន ឬក៏ទិន្នន័យទាំងអស់ដែលពាក់ព័ន្ធជាមួយនឹងវិស័យហិរញ្ញវត្ថុ ឬក៏ប្រព័ន្ធឌីជីថលគឺភាគច្រើនមកជាភាសាបរទេស…ហើយនៅពេលដែលយើងទទួលយកព័ត៌មានទាំងនោះមក យើងបកមកជាភាសាខ្មែរ ពេលខ្លះក៏បកត្រូវ តែមួយចំនួនធំគឺបកអត់ត្រូវទេ»។
បកមិនត្រូវក៏ដោយសារតែពាក្យបច្ចេកទេសមានលក្ខណៈស៊ីជម្រៅ ដែលទាមទារការពន្យល់ឱ្យបានច្បាស់លាស់។ ការពន្យល់នេះទៀតសោត ក៏នៅមានភាពស្មុគស្មាញសម្រាប់ប្រជាជនមួយចំនួនដែលចំណេះដឹងផ្នែកបច្ចេកវិទ្យារបស់ពួកគេនៅមានកម្រិត។ នេះបើតាមការបកស្រាយបន្ថែមរបស់លោក រ៉ូន្នី ឧត្តម។
បន្ថែមពីលើនេះ លោកបន្តឱ្យដឹងថា សកម្មភាពផ្សព្វផ្សាយអំពីចំណេះដឹងបច្ចេកវិទ្យាហិរញ្ញវត្ថុ បានធ្វើហើយ ក៏ប៉ុន្តែការផ្សព្វផ្សាយនៅមិនទាន់ទៅដល់ទីកន្លែង និងចំគោលដៅ។
ក្នុងន័យនេះ លោកបានគូសបញ្ជាក់យ៉ាងដូច្នេះថា៖
«ខ្ញុំឃើញថាមានកម្មវិធីច្រើនហើយដែលធ្វើនៅតាមសាលារៀន តាមស្ថាប័ននានា ប៉ុន្តែជនរងគ្រោះភាគច្រើនគឺគាត់អត់នៅក្នុងតំបន់ទាំងអស់ហ្នឹងទេ តាមអ្វីដែលខ្ញុំធ្លាប់ជួបគឺប្រជាជនមូលដ្ឋាន ហើយនឹងប្រជាជនដែលនៅតាមតំបន់ដាច់ស្រយាល ទៅសួរពួកគាត់ទៅគឺគាត់អត់ដែលបានមើលវីដេអូទាំងអស់ហ្នឹងទេ ហើយបញ្ហាមួយទៀត ដែលធ្វើឱ្យមាតិកាផ្សព្វផ្សាយមិនបានទៅដល់ពួកគេ គឺដោយសារពួកគេមិនសូវខ្វល់ខ្វាយ រួមផ្សំនឹងការមិនយល់ដឹងច្រើនពាក់ព័ន្ធជាមួយហានិភ័យបច្ចេកវិទ្យានេះឯង»។
យោងតាមរបាយការណ៍ពី UNESCO កាលពីឆ្នាំ ២០២០ បានឱ្យដឹងថា ប្រជាជនកម្ពុជាត្រឹមតែចំនួន ៣២ភាគរយប៉ុណ្ណោះ ដែលមានមូលដ្ឋានចំណេះដឹងផ្នែកឌីជីថល ហើយមានត្រឹមតែ ៥%ប៉ុណ្ណោះ ដែលមានចំណេះដឹងមធ្យម និងត្រឹមតែ១%ប៉ុណ្ណោះ ដែលមានជំនាញឌីជីថលកម្រិតខ្ពស់៕
Account
Security
Favourite Content